Malaki

2 “Nei la, e faitaulaga, tenei te fakatonuga mō koutou.+ 2 Kafai e ita koutou ma faka‵logo kae puke ‵mau i otou loto ke faka‵malu i ei toku igoa,” ko muna a Ieova o kautau, “ka uga atu ne au te malaia ki luga i a koutou,+ kae ka ‵fuli ne au otou fakamanuiaga ki fakamalaiaga.+ Ao, ko oti ne ‵fuli ne au a fakamanuiaga ki fakamalaiaga, me ne seki puke ‵mau koutou ki ei i otou loto.”

3 “Kiloke! Ka fakamasei* ne au otou fuaga ne ‵toki ona ko koutou,+ kae ka laku tatela ne au a fekau o manu ki otou mata, ko fekau o manu mai i otou ‵kaiga fia‵fia; kae ka avatu koutou ki ei.* 4 Tenā ko iloa ei ne koutou me ne tuku atu ne au te fakatonuga tenei ki a koutou ko te mea ke fakatumau taku feagaiga mo Levi,”+ ko muna a Ieova o kautau.

5 “Taku feagaiga mo ia se feagaiga o te ola mo te filemu, telā ne tuku atu ne au ki a ia, fakatasi mo te mataku.* Ne mataku a ia ki a au, ao, ne tu a ia mo te ofo i toku igoa. 6 A te tulafono* o te munatonu e maua i loto i tena gutu,+ kae seai se amio sē tonu e maua i ana laugutu. Ne sa‵sale fakatasi a ia mo au i te filemu mo te fai mea tonu,+ kae ne ‵fuli kea‵tea ne ia a tino e tokouke mai te mea ‵se. 7 Me i laugutu o se faitaulaga e ‵tau o puipui ne ia te iloaga, kae e ‵tau mo tino o ‵sala ki te tulafono* mai i tena gutu,+ me i a ia ko te avefekau a Ieova o kautau.

8 “Kae ko oti koutou ne ‵fuli kea‵tea mai te auala. Ne fai ne koutou a tino e tokouke ke ‵siga e ‵tusa mo te tulafono.*+ Ko oti ne fakamasei ne koutou te feagaiga mo Levi,”+ ko muna a Ieova o kautau. 9 A koutou ka fai ne au ke takalialiagina kae fakamalalo ifo i mua o tino katoa, me ne seki tausi ne koutou oku auala kae ne fakaasi atu ne koutou te fakailoga tino i te fakagaluegaga o te tulafono.”+

10 “E a, a tatou katoa e se tasi te ‵tou tamana?+ E a, e se tokotasi te Atua ne faite ne ia tatou? Tela la, kaia e fakatogafiti ei ne tatou te suā tino ki te suā tino,+ kae taku fakamasei i ei te feagaiga a ‵tou tupuga? 11 A Iuta ne fai ne ia a faifaiga faitogafiti, kae isi se mea fakatakalialia ne fai i Isalaelu mo Ielusalema; me ko oti ne taku fakamasei ne Iuta a te ‵malu* o Ieova,+ telā e alofa a Ia ki ei, kae ko oti ne puke ne ia te tama fafine a se atua fakaa‵tea mo fai tena avaga.+ 12 Ka ‵kati kea‵tea ne Ieova mai i faleie o Iakopo so se tino e fai ne ia te mea tenei, faitalia me ko oi a ia,* faitalia me e ofo atu ne ia se taulaga ki a Ieova o kautau.”+

13 “Kae e isi aka foki se isi* mea telā e fai ne koe, telā e iku atu ei ki te ufiga o te fatafaitaulaga a Ieova ki loimata mo te ‵tagi mautuutu kae mānava fi‵ta, ko se toe fia saga mai ei a ia ki tau taulaga io me kilo atu mo te fiafia ki so se mea mai i tou lima.+ 14 Kae fai mai koe, ‘Se a te pogai?’ Ona ko Ieova ne fai pelā me se molimau i te va o koe mo tau avaga telā ne fai kae koi talavou koe, telā ne fakatogafiti ne koe, faitalia me fai tou fafine mo fai tou soa mo tau avaga e auala i te feagaiga.*+ 15 Kae isi se tino e tokotasi ne seki fai ne ia te mea tenei, me ne isi i a ia a te ‵toega o te agaga. Kae se a te mea e ‵sala ki ei te tino tenā? Ko te tama* a te Atua. Tela la, ke puipui ne koutou otou loto, kae sa fakatogafiti ne koutou otou avaga ne fai i te taimi koi talavou ei koutou. 16 Me i a au e takalialia* ki te ‵talaga o avaga,”+ ko muna a Ieova te Atua o Isalaelu, “mo te tino telā e ufi tena gatu ki fakasauaga,”* ko muna a Ieova o kautau. “Kae ke puipui otou loto, kae ke mo a ma fai ne koutou a faifaiga faitogafiti.+

17 “Ko oti ne fakafi‵ta ne koutou a Ieova ki otou pati.+ Kae e fai mai koutou, ‘I te auala fea ne fakafi‵ta ei ne matou a ia?’ Mai te fai atu, ‘A tino katoa e fai ne latou a mea ma‵sei, ne mea ‵lei i te kilokiloga a Ieova, kae e fiafia a ia ki te tino tenā,’+ io me mai te fai atu, ‘Tefea te Atua o te fakamasinoga tonu?’”