Numela

15 Ne toe faipati atu a Ieova ki a Mose, ana muna: 2 “Faipati ki tino Isalaelu kae fai atu ki a latou, ‘Kafai ko oko koutou ki te fenua telā ka tuku atu ne au ke ‵nofo koutou i ei+ 3 kae fai ne koutou se taulaga e ofo atu i luga i te afi ki a Ieova mai te lafu pulumakau io me mai te lafu mamoe​—faitalia me se taulaga ‵sunu+ io me se taulaga e fai mō se tautoga fakapito io me se taulaga o te lotomalie+ i otou ‵kaiga fia‵fia i loto i te tausaga,+ ko te mea ke manogi gali ki a Ieova+​— 4 a te tino telā e ofo atu tena taulaga e ‵tau foki mo ia o ofo atu ki a Ieova se taulaga meakai o falaoa ‵mata kae ‵lei,+ se tasi-vae-sefulu o te efa,* telā ne palu fakatasi mo te tasi-vae-fa o te hini* o te sinu. 5 E ‵tau foki o ofo atu ne koe a te uaina e pelā me se taulaga meainu, se tasi-vae-fa o te hini, fakatasi mo te taulaga ‵sunu+ io me ko te taulaga o tamā mamoe tāgata takitasi. 6 Io me kafai e ofo atu se mamoe tagata, e ‵tau o fai ne koe se taulaga meakai o te lua-vae-sefulu o te efa o falaoa ‵mata kae ‵lei kolā e palu fakatasi mo te tasi-vae-tolu o te hini o te sinu. 7 Kae e ‵tau o ofo atu ne koe a te uaina e pelā me se taulaga meainu, se tasi-vae-tolu o te hini, e pelā me se mea manogi gali ki a Ieova.

8 “‘Kae kafai e ‵tau o ofo atu ne koe se pulumakau tagata e pelā me se taulaga ‵sunu+ io me se taulaga ke fai se tautoga fakapito+ io me ne taulaga ‵kai fakatasi ki a Ieova,+ 9 e ‵tau foki o ofo atu ne koe te pulumakau tagata fakatasi mo se taulaga meakai+ o te tolu-vae-sefulu o te efa o falaoa ‵mata kae ‵lei kolā ne palu fakatasi mo te āfa hini o te sinu. 10 E ‵tau foki o ofo atu ne koe a te uaina e pelā me se taulaga meainu,+ se āfa hini, e pelā me se taulaga e ofo atu i luga i te afi, e pelā me se mea manogi gali ki a Ieova. 11 Tenei te mea e ‵tau o fai ki pulumakau tāgata takitasi io me ko tamā mamoe takitasi io me ko kouti. 12 Faitalia me pefea te uke o au mea e ofo atu, tenā eiloa te mea e ‵tau o fai ne koe ki manu takitasi konā, e ‵tusa mo te lotou aofaki. 13 Tenei te auala e ‵tau ei o ofo atu ne tino kolā ne fa‵nau i loto i tino Isalaelu se taulaga e ofo atu i luga i te afi, e pelā me se mea manogi gali ki a Ieova.

14 “‘Kafai e isi se tino fakaa‵tea e ‵nofo fakatasi mo koutou io me ne nofo faeloa i a koutou i te fia o kautama, e ‵tau foki o fai ne ia se taulaga e ofo atu i luga i te afi, e pelā me se mea manogi gali ki a Ieova, e pelā mo te mea e fai ne koutou.+ 15 E tasi eiloa te tulafono fakavae mō koutou kolā e aofia i te fakapotopotoga mo te tino fakaa‵tea telā e ‵nofo fakatasi mo koutou. Ka fai a te mea tenā e pelā me se tulafono fakavae tumau i otou kautama katoa. E ‵tau eiloa o ‵pau a koutou mo te tino fakaa‵tea i mua o Ieova.+ 16 E ‵tau eiloa o tasi te tulafono kae tasi te ikuga o fakamasinoga mō koutou mo te tino fakaa‵tea telā e ‵nofo fakatasi mo koutou.’”

17 Ne toe fai atu a Ieova ki a Mose: 18 “Faipati atu ki tino Isalaelu kae fai atu ki a latou, ‘Kafai e oko koutou ki te fenua telā ka aumai ne au koutou ki ei 19 kae ‵kai koutou ki meakai* o te fenua tenā,+ e ‵tau o fai ne koutou se meaalofa ki a Ieova. 20 E ‵tau o fai ne koutou se meaalofa mai fuataga muamua+ o otou saito e pelā me ne falaoa puku‵puku. E ‵tau o fai otou meaalofa e pelā mo meaalofa o te koga tuki saito. 21 E ‵tau o tuku atu ne koutou a nisi fuataga muamua o otou saito e pelā me se meaalofa ki a Ieova i otou kautama katoa.

22 “‘Kafai e fai ne koutou se mea ‵se kae e se tausi ki fakatonuga katoa konei ne fai atu ne Ieova ki a Mose, 23 ko mea katoa kolā ne fakatonu mai ne Ieova ki a koutou e auala i a Mose mai te aso ne fakatonu mai ei a Ieova o fano ki mua i otou kautama katoa, 24 kae kafai e isi se mea ‵se ne fai e aunoa mo te iloa ne te fakapotopotoga, e ‵tau o ofo atu ne te fakapotopotoga kātoa se tamā pulumakau tagata e pelā me se taulaga ‵sunu e manogi gali ki a Ieova, fakatasi mo tena taulaga meakai mo tena taulaga meainu e ‵tusa mo faifaiga masani+ e ‵tau o fai, kae tasi te tamā kouti e pelā me se taulaga mō agasala.+ 25 Ka fai ne te faitaulaga a te faka‵māga mō te fakapotopotoga kātoa o tino Isalaelu, kae ka fakamagalo ei latou,+ me i te mea tenā se mea ‵se, kae ne aumai ne latou mo fai te lotou taulaga, se taulaga telā e ofo atu i luga i te afi ki a Ieova mo te lotou taulaga mō agasala i mua o Ieova mō te lotou mea ‵se ne fai. 26 Ka fakamagalo eiloa a te fakapotopotoga kātoa o tino Isalaelu mo te tino fakaa‵tea telā e nofo i a latou, me i te mea tenā se mea ‵se ne fai ne tino katoa.

27 “‘Kafai ne agasala se tino e aunoa mo te iloa, e ‵tau mo ia o ofo atu se kouti fafine telā ko tasi tena tausaga mo fai se taulaga mō agasala.+ 28 Kae ka fai ne te faitaulaga te faka‵māga i mua o Ieova mō te tino telā ne agasala ona ko te mea ‵se telā ne fai kae seki mafaufau ki ei, ko te mea ke fai se faka‵māga ki ei, kae ka fakamagalo ei a ia.+ 29 Kae mō te tino telā ne fanau i loto i tino Isalaelu mo se tino fakaa‵tea telā e nofo i a latou, e ‵tau eiloa o tasi te tulafono mō koutou e uiga ki te mea ‵se telā ne fai kae seki mafaufau ki ei.+

30 “‘Kae ko te tino telā e fai ne ia se mea mo te iloa tonu,+ faitalia me se tino o te fenua io me se tino fakaa‵tea, ko muna masei a ia ki a Ieova kae e ‵tau o tapale kea‵tea* mai ana tino. 31 Ona ko te mea ne fakaseaoga ne ia a pati a Ieova kae ofa ana fakatonuga, e ‵tau o tapale fakavave a ia kea‵tea.+ E fakasala eiloa a ia ona ko tena mea ‵se tenā.’”+

32 I te taimi ne ‵nofo atu ei a tino Isalaelu i te koga lavaki, ne maua ne latou se tagata e fai fafie i te Sapati.+ 33 A latou kolā ne maua ne latou a tou tagata e fai fafie ne aumai ne latou a ia ki a Mose mo Alona mo te fakapotopotoga kātoa. 34 Ne taofi fakapagota+ ne latou a ia me ne seki fakamautinoa aka te mea ka fai ki a ia.

35 Kae ne fai atu a Ieova ki a Mose: “E ‵tau o tamate fakavave a te tagata tenā,+ kae e ‵tau o peipei a ia ki fatu ne te fakapotopotoga kātoa i tua o te fakai.”+ 36 Ne ave a ia ne te fakapotopotoga kātoa ki tua o te fakai kae peipei atu ki fatu ke mate, e pelā eiloa mo te fakatonuga a Ieova ne fai ki a Mose.

37 Ne fai atu a Ieova ki a Mose: 38 “Faipati ki tino Isalaelu kae fai atu ki a latou me e ‵tau mo latou o fai ne fele i kapakapa o olotou gatu i olotou kautama katoa, kae e ‵tau o faka‵piki ne latou se filo lanu moana mai luga i fele o olotou gatu.+ 39 ‘E ‵tau o isi ne otou fele penei ko te mea ke ‵kilo koutou ki ei kae masaua a fakatonuga katoa a Ieova kae tausi ki ei.+ E se ‵tau mo koutou o tau‵tali i otou loto mo mea e lavea ne koutou ki otou mata, kolā e takitaki ei koutou ki te faiga o faifaiga talitāgata i te feitu faka-te-agaga.+ 40 Ka fesoasoani atu a te mea tenei ke masaua kae tausi ne koutou aku fakatonuga katoa kae ke fakatapu foki koutou i mua o te otou Atua.+ 41 Au ko Ieova te otou Atua, telā ne aumai ne ia koutou kea‵tea mai te fenua o Aikupito ko te mea ke fai au mo fai te otou Atua.+ Au ko Ieova te otou Atua.’”+