Numela
17 Muna a Ieova ki a Mose: 2 “Faipati atu ki tino Isalaelu kae puke mai i a latou e takitasi a tokotoko mō kāiga takitasi i olotou tamana, mai takitaki o kāiga takitasi i olotou tamana,+ e 12 katoa a tokotoko. Tusi atu a igoa o latou taki tokotasi ki luga i olotou tokotoko. 3 E ‵tau o tusi ne koe te igoa o Alona ki luga i te tokotoko o Levi, me e tasi fua te tokotoko mō ulu o kāiga takitasi i olotou tamana. 4 Tuku atu a tokotoko konā ki loto i te faleie o maopoopoga i mua o te pusa o te Feagaiga,+ ko te koga telā e fakasae sāle atu ei au ki a koutou.+ 5 Kae ko te tokotoko a te tagata telā ka filifili+ ne au ka ‵somo mai i ei a laulakau, kae ka fakagata aka ne au a te mui‵mui o tino Isalaelu ki a au,+ kae penā foki ki a koulua.”+
6 Ne faipati atu a Mose ki tino Isalaelu, kae ne tuku atu ne takitaki katoa olotou tokotoko ki a ia—e takitasi a tokotoko mō takitaki o kāiga i olotou tamana, e 12 a tokotoko—kae ne aofia a te tokotoko o Alona i olotou tokotoko. 7 Tenā ne tuku atu ei ne Mose a tokotoko konā i mua o Ieova i loto i te faleie o te Feagaiga.
8 I te suā aso i te taimi ne fanatu ei a Mose ki loto i te faleie o te Feagaiga, kae kiloke! ko ‵somo mai a laulakau, pulalakau mo fuataga ‵sulu o te alamoni i luga i te tokotoko o Alona, mai te kāiga o Levi. 9 Tenā ne aumai ei ne Mose ki tua a tokotoko katoa mai i mua o Ieova ki tino Isalaelu katoa. Ne ‵kilo atu latou ki ei, kae ne puke ne tāgata taki tokotasi olotou tokotoko.
10 Tenā ne fai atu ei a Ieova ki a Mose: “Fakafoki te tokotoko o Alona+ ki mua o te pusa o te Feagaiga kae tausi i ei mo fai se fakailoga+ ki tino ‵teke+ konei, ke fakagata aka ei te lotou mui‵mui ki a au kae ke se ‵mate foki latou.” 11 Ne fai fakavave ne Mose a te mea telā ne fakatonu atu ne Ieova ki a ia. Ne fai eiloa ne ia a te mea tenā.
12 Tenā ne fai atu ei a tino Isalaelu ki a Mose: “Nei la a matou ka ‵mate eiloa, a matou ka ‵galo atu eiloa, a matou ka fakaseai atu katoa! 13 So se tino telā e fakapilipili atu ki te faleie tapu o Ieova, ka mate eiloa!+ E a, e ‵tau mo matou o ‵mate i te auala tenā?”+