Numela

19 Ne toe faipati atu a Ieova ki a Mose mo Alona, ana muna: 2 “Tenei te tulafono fakavae ne fakatonu mai ne Ieova, ‘Fai atu ki tino Isalaelu me e ‵tau o avatu ne latou ki a koe se pulumakau fafine kula kae ‵lei telā e seai sena pona+ kae e seki ai foki se amoga ne amo ne ia. 3 E ‵tau o tuku atu ne koe ki a Eleasalo te faitaulaga, kae ka ‵taki ne ia ki tua mo te fakai kae tamate atu i ana mua. 4 Tenā ko puke ei ne Eleasalo te faitaulaga ne mu toto ki tena matikao lima kae fakamotimoti atu ana toto fakafitu taimi ki mua o te faleie o maopoopoga.+ 5 Ko ‵sunu atu ei a te pulumakau i ana mua. Ka ‵sunu foki ana pa‵kili mo ana ‵kano mo ana toto mo ana fekau.+ 6 Kae ka puke ne te faitaulaga a kaula o te lakau ko te alasi, te isopo+ mo te filo lanu kula kae ‵pei atu ki loto i te afi telā e ‵sunu ei te pulumakau. 7 Tenā ko ‵ta ei ne te faitaulaga ana gatu kae koukou ki vai, ka oti ko mafai ei o vau a ia ki loto i te fakai; kae ka se ‵ma a te faitaulaga ke oko eiloa ki te afiafi.

8 “‘A te tino telā ne ‵sunu ne ia te pulumakau e ‵tau o ‵ta ana gatu ki vai kae koukou foki ki vai, kae ka se ‵ma eiloa a ia ke oko ki te afiafi.

9 “Ka ‵luku fakatasi ne se tagata ‵ma a lefu o te pulumakau+ kae tuku atu i se koga ‵ma mai tua o te fakai, kae e ‵tau o tausi a mea konā ne te fakapotopotoga o tino Isalaelu ke fakatoka ei te vai telā ka fakaaoga mō te faka‵māga.+ A te mea tenā se taulaga mō agasala. 10 A te tino telā e ‵luku ne ia a lefu o te pulumakau e ‵tau o ‵ta ana gatu kae ka se ‵ma eiloa a ia ke oko ki te afiafi.

“‘Ka fai a te mea tenei e pelā me se tulafono fakavae tumau ki tino Isalaelu mo te tino fakaa‵tea telā e ‵nofo fakatasi latou.+ 11 So se tino e patele ki se tino mate ka se ‵ma eiloa a ia i aso e fitu.+ 12 E ‵tau mo te tino tenā o faka‵ma a ia eiloa ki te vai* i te tolu o aso, kae i te fitu o aso ko ‵ma ei a ia. Kae kafai e se faka‵ma ne ia a ia eiloa i te tolu o aso, i te fitu o aso ka se ‵ma eiloa a ia. 13 So se tino e patele ki te foitino mate o se tino kae e se faka‵ma a ia ko fakalailai ne ia te faleie tapu o Ieova,+ kae e ‵tau o tapale kea‵tea* a te tino tenā mai Isalaelu.+ Ona ko te vai o te faka‵māga+ ne seki fakamatulutulu atu ki luga i a ia, e tumau eiloa a ia i te sē ‵ma. E tumau loa tena tulaga sē ‵ma.

14 “‘Tenei te tulafono e fakaaoga māfai e mate se tagata i loto i se faleie: So se tino e ulu ki loto i te faleie mo so se tino telā ko nofo i loto i te faleie ka se ‵ma i aso e fitu. 15 So se mea e matala kae e seai se ‵pono i ei e se ‵ma.+ 16 So se tino i te vao e patele ki se tino ne tamate ki se pelu io me se foitino mate io me ko ivi o se tagata io me se tanuga ka se ‵ma eiloa i aso e fitu.+ 17 E ‵tau o puke ne latou mō te tino telā e se ‵ma ne mu lefu mai te taulaga mō agasala telā ne ‵sunu kae ‵ligi atu a vai ki ei i te mea telā e tuku i ei. 18 Tenā ko puke ei ne se tagata ‵ma+ te lakau ko te isopo,+ ufi atu ki loto i te vai kae fakamotimoti ki luga i te faleie mo ana mea katoa e tausi ei a mea mo tino kolā e ‵nofo atu i konā mo te tino telā ne patele ki te ivi io me se tino telā ne tamate io me se foitino mate io me se tanuga. 19 Ka fakamotimoti atu ne te tino ‵ma a te vai ki luga i te tino sē ‵ma i te tolu o aso mo te fitu o aso, kae ka faka‵ma ne ia a te tino tenā mai i ana agasala i te fitu o aso;+ tenā ko ‵ta ei ne ia ana gatu kae koukou ki vai, ko ‵ma ei a ia i te afiafi.

20 “‘Kae ko te tagata telā e se ‵ma kae e se faka‵ma a ia eiloa, e ‵tau o tapale kea‵tea* mai te fakapotopotoga+ me ko oti ne fakalailai ne ia te koga tapuaki o Ieova. A te vai o te faka‵māga ne seki fakamatulutulu ki luga i a ia, tela la e se ‵ma eiloa a ia.

21 “‘Ka fai a te mea tenei e pelā me se tulafono fakavae tumau mō latou: A te tino telā e fakamotimoti ne ia a vai mo fai te faka‵māga+ e ‵tau o ‵ta ana gatu, kae ko te tino telā e patele ki te vai mo fai te faka‵māga ka se ‵ma eiloa ke oko ki te afiafi. 22 So se mea e patele ki ei te tino telā e se ‵ma ka se ‵ma eiloa, kae ko te tino telā e patele ki ei ka se ‵ma eiloa ke oko ki te afiafi.’”+