Numela

31 Ne fai atu a Ieova ki a Mose: 2 “Ke fakaoko atu te taui ma sui+ ki tino Mitiana+ ona ko mea kolā ne fai ne latou ki tino Isalaelu. Ka oti ko tanu ei koe e pelā mo ou tino.”*+

3 Ne faipati atu a Mose ki tino, ana muna: “Fakatoka ne tāgata mai i a koutou ke taua atu ki Mitiana kae ke fakaoko atu te taui ma sui a Ieova ki Mitiana. 4 E ‵tau o uga atu ne koutou ki te kautau e taki toko 1,000 mai matakāiga takitasi o matakāiga katoa o tino Isalaelu.” 5 Tela la, mai te fia afe o tino Isalaelu,+ e taki toko 1,000 ne ‵tofi mai matakāiga takitasi, e toko 12,000 ne fakatoka ke taua atu.

6 Tenā ne uga atu ei latou ne Mose, e taki toko 1,000 mai matakāiga takitasi ki te kautau, fakatasi mo Fineaso+ te tama tagata a Eleasalo te faitaulaga o te kautau, telā e nofo mo meāfale tapu kae puke ne ia te pu+ i tena lima. 7 Ne taua atu latou ki Mitiana, e pelā eiloa mo te fakatonuga a Ieova ne fai ki a Mose, kae ne tamate ne latou a tāgata katoa. 8 I tafa o nisi tino kolā ne tamate, ne tamate foki ne latou a tupu o Mitiana, ko Evi, Lekima, Siula, Hulo mo Lepa, ko tupu e tokolima o Mitiana. Ne tamate foki ne latou a Palaamo+ te tama tagata a Piolo ki te pelu. 9 Kae ne ave fakapagota ne tino Isalaelu a fāfine mo tama‵liki Mitiana. Ne puke foki ne latou olotou manu fagai katoa, olotou lafu manu katoa, mo olotou kope katoa. 10 Kae ko olotou fakai katoa kolā ne ‵nofo latou i ei mo olotou koga ‵nofo kolā e ‵pui faka‵lei ne ‵sunu ki te afi. 11 Kae puke ne latou a mea katoa kolā ne maua i te taua, e aofia i ei a tino mo manu. 12 Tenā ne aumai ei ne latou a pagota, mea ne ‵fao mai ne latou, mo mea katoa kolā ne puke mai i te taua ki a Mose mo Eleasalo te faitaulaga, mo te fakapotopotoga o tino Isalaelu, ki te koga e ‵nofo ei latou i te koga laugatasi o Moapi+ i tafa o te Iolitana i Ieliko.

13 Ne olo atu a Mose mo Eleasalo te faitaulaga mo takitaki katoa o te fakapotopotoga o fakafetaui ki a latou i tua o te koga e ‵nofo latou i ei. 14 Kae ne kaitaua a Mose ki tāgata kolā ne filifili aka ke ‵kau i te kautau, ko takitaki o te fia afe o tino mo takitaki o te fia selau o tino kolā ne o‵mai mai te taua. 15 Muna a Mose ki a latou: “E a, ne faka‵sao ne koutou a fāfine katoa? 16 Kiloke! Ko latou konā ne fakakolekole ne Palaamo ke faka‵se ne latou a tino Isalaelu ke se fakamaoni+ ki a Ieova i te mea telā ne tupu i Peolo,+ tenā ne oko atu ei a te mala ki te fakapotopotoga a Ieova.+ 17 Nei la, e ‵tau o tamate ne koutou a tama‵liki tāgata katoa kae tamate a fāfine katoa kolā ko oti ne ‵moe fakatauavaga mo se tagata. 18 Kae e ‵tau o faka‵sao ne koutou a ola o tamafine kolā e seki ‵moe fakatauavaga mo se tagata.+ 19 Kae e ‵tau o ‵nofo koutou i tua o te fakai i aso e fitu. Ko koutou katoa kolā e isi ne otou tino ne tamate mo koutou katoa kolā ne fakapa‵tele ki se tino ne tamate+ e ‵tau o faka‵ma koutou+ i te tolu o aso mo te fitu o aso, ko koutou mo otou tino ne puke fakapagota. 20 E ‵tau o faka‵ma ne koutou mai i te agasala so se gatu, so se mea ne faite ki pa‵kili o manu, so se mea ne faite ki fulufulu o kouti, mo so se mea ne faite ki lakau.”

21 Tenā ne fai atu ei a Eleasalo te faitaulaga ki tāgata o te kautau kolā ne olo ki te taua: “Tenei te tulafono fakavae ne fakatonu atu ne Ieova ki a Mose, 22 ‘Ko te aulo fua, te siliva, te kopa, te fiti, te kāpa mo te pōlo fiti, 23 ko mea katoa kolā e se ‵ka i te afi, e ‵tau o tuku ne koutou i luga i te afi ko ‵ma ei. Kae e ‵tau foki o faka‵ma ki te vai ke ‵ma.+ So se mea telā e ‵ka i te afi e ‵tau o tuku ne koutou ki te vai. 24 Kae e ‵tau o ‵ta ne koutou otou gatu i te fitu o aso ko ‵ma ei koutou, tenā ko mafai ei ne koutou o ulu mai ki loto i te fakai.’”+

25 Tenā ne fai atu ei ne Ieova a pati konei ki a Mose: 26 “Lau aka a mea katoa kolā ne puke mai i te taua, lau aka foki a tino mo manu kolā ne puke fakapagota; kae ke fai ne koulua mo Eleasalo te faitaulaga mo ulu o kāiga o te fakapotopotoga i olotou tamana a te mea tenei. 27 Vaevae a mea kolā ne puke mai i te taua ki vaega e lua ma latou katoa kolā ne aofia i te kautau kae ne olo atu i te taua mo tino katoa o te fakapotopotoga.+ 28 E pelā me se lafoga ki a Ieova, e ‵tau o puke ne koutou mai i sotia kolā ne olo atu ki te taua se tokotasi mai i taki toko 500, o tino, lafu pulumakau, lafu asini mo te lafu mamoe. 29 E ‵tau o puke ne koutou te āfa o latou o avatu ki a Eleasalo te faitaulaga e pelā me se meaalofa ki a Ieova.+ 30 Mai i te āfa telā ne tuku atu ki tino Isalaelu, e ‵tau o puke ne koutou e tasi mai te taki 50 o tino, te lafu pulumakau, te lafu asini, te lafu mamoe mo vaegā manu fagai katoa, kae tuku atu ki tino Levi,+ kolā e tausi ne latou a tiute fai i loto i te faleie tapu o Ieova.”+

31 Ne fai ne Mose mo Eleasalo te faitaulaga a mea ne fakatonu atu ne Ieova ki a Mose. 32 A te aofaki o mea katoa ne puke mai ne tino kolā ne olo atu i te taua, e ‵tusa mo te 675,000 o te lafu mamoe, 33 e 72,000 o te lafu pulumakau, 34 kae 61,000 asini. 35 A te aofaki o tamafine kolā e seki ‵moe fakatauavaga mo se tagata+ e ‵tusa mo te 32,000. 36 A te āfa o mea konā, telā ko te tusaga o latou kolā ne olo ki te taua e ‵tusa mo te 337,500 o te lafu mamoe. 37 A te aofaki o te lafoga ki a Ieova mai te lafu mamoe e ‵tusa mo te 675. 38 Kae e ‵tusa mo te 36,000 a te lafu pulumakau, kae ko te lafoga o latou mō Ieova e 72. 39 Kae e ‵tusa mo te 30,500 asini, kae ko te lafoga o latou mō Ieova e 61. 40 Kae e toko 16,000 a tino, kae ko te lafoga o latou mō Ieova e toko 32 tino. 41 Tenā ne tuku atu ei ne Mose a te lafoga ki a Eleasalo te faitaulaga e pelā me se meaalofa ki a Ieova,+ e ‵tusa mo te fakatonuga a Ieova ki a Mose.

42 Mai te āfa telā ne tuku ki tino Isalaelu telā ne ‵vae ne Mose mai te vaega o tāgata kolā ne olo ki te taua, 43 a te āfa o te lafu mamoe tenā e ‵tusa mo te 337,500 te lotou aofaki, 44 kae ko te lafu pulumakau e ‵tusa mo te 36,000, 45 kae ko asini e 30,500, 46 kae ko tino e toko 16,000. 47 Tenā ne puke ei ne Mose mai te āfa telā ne tuku ki tino Isalaelu e tasi mai te taki 50 o tino mo manu, kae tuku atu ki tino Levi,+ kolā e tausi ne latou a tiute fai i loto i te faleie tapu o Ieova,+ e pelā eiloa mo te fakatonuga a Ieova ki a Mose.

48 Kae ko tāgata filifilia mai te fia afe o kautau,+ ko takitaki o te fia afe o tino mo takitaki o te fia selau o tino, ne olo atu ki a Mose, 49 kae fai atu ki a Mose: “Ko oti ne lau aka ne au tavini a te aofaki o tāgata o te taua kolā e ‵nofo mai lalo i te motou tausiga, kae e seai se tino i a latou ne galo mai i a matou.+ 50 Tela la, ka avatu ne matou taki tokotasi a mea ne maua ne matou e pelā me ne taulaga ki a Ieova, ko mea ne faite ki aulo, filifili i fatugugu, taulima, mama fakamailoga, ligi mo nisi mea fakagali‵gali ke mafai o fai te faka‵māga mō matou i mua o Ieova.”

51 Ne talia ne Mose mo Eleasalo te faitaulaga, a aulo mai i a latou mo mea fakagali‵gali katoa. 52 A meaalofa aulo katoa kolā ne tuku atu ne latou ki a Ieova e ‵tusa mo te 16,750 sekela* te lotou aofaki, mai i takitaki o te fia afe o tino mo takitaki o te fia selau o tino. 53 E isi katoa ne mea a tāgata o te kautau ne puke mai i te taua ma latou eiloa. 54 Ne talia ne Mose mo Eleasalo te faitaulaga a aulo mai i takitaki o te fia afe o tino mo te fia selau o tino kae aumai a mea konā ki loto i te faleie o maopoopoga e pelā me se fakamasauaga mō tino Isalaelu i mua o Ieova.