Numela
34 Kae ne toe faipati atu a Ieova ki a Mose, ana muna: 2 “Tuku atu a fakatonuga konei ki tino Isalaelu: ‘Kafai e olo koutou ki te fenua o Kanana,+ tenei te fenua ka maua ne koutou e pelā me ko te otou tofi, ko te fenua o Kanana mo ana tuakoi.+
3 “‘A te otou tuakoi ki saute e vau mai te koga lavaki o Siina i tafatafa o Etoma, kae ko te otou tuakoi ki saute i te feitu ki saegala e kamata mai i te feitu ki lalo o te Tai ‵Kona.*+ 4 Ka mafuli te otou tuakoi ki saute o fano i te auala ki Akalapima+ o fanatu eiloa ki Siina, kae ko tena mata ko te feitu ki saute o Katesa-panea.+ Ko toe fanatu ei ki Hasala-ata+ ke oko eiloa ki Asamona. 5 Ka toe mafuli a te tuakoi i Asamona o fano ki te Vanu o Aikupito kae ka gata mai i te Tai.*+
6 “‘A te otou tuakoi i te feitu ki togala ko te Tai Lasi* mo te tafatai. Tenei te otou tuakoi i te feitu ki togala.+
7 “‘Kae tenei te otou tuakoi i te feitu ki mātū: Mai te Tai Lasi ke oko ki te Mauga o Holo, tenā te otou tuakoi.+ 8 Mai te Mauga o Holo ka tele atu eiloa te otou tuakoi ki Lepo-hamata,*+ kae ko te mata fakaoti o te tuakoi ko Setata.+ 9 E oko atu eiloa te tuakoi ki Sifolono, kae ko tena mata fakaoti ko Hasala-enanu.+ Tenei te otou tuakoi i te feitu ki mātū.
10 “‘Tenā ko fakamailoga ei ne koutou a te otou tuakoi i te feitu ki saegala mai i Hasala-enanu ke oko atu ki Sefama. 11 A te tuakoi ka tele mai Sefama ke oko ki Lipila i te feitu ki saegala o Aino, ko tele ifo ei te tuakoi ki lalo o fano ki te feitu ki saegala o te Tai o Tinelete.*+ 12 Ka oko atu te tuakoi ki te Iolitana, kae ko tena mata fakaoti ko te Tai ‵Kona.+ Tenei eiloa te otou fenua+ mo ana tuakoi.’”
13 Ne fakatonu atu a Mose ki tino Isalaelu, ana muna: “Tenei te fenua ka vaevae ne koutou mō koutou mai te faiga o se vili,+ e ‵tusa eiloa mo te fakatonuga a Ieova ke tuku atu ki matakāiga e iva mo te āfa. 14 Ko oti ne puke a tofi o te matakāiga o tino Leupena i kāiga i olotou tamana, te matakāiga o tino Kato i kāiga i olotou tamana, mo te āfa o te matakāiga o Manase.+ 15 A matakāiga e lua mo te āfa ko oti ne puke te lotou tofi i te feitu ki saegala o te kogā koga o te Iolitana i Ieliko.”+
16 Ne toe faipati atu a Ieova ki a Mose, ana muna: 17 “Konei a igoa o tāgata kolā ka vaevae ne latou te fenua ke fai mō koutou: ko Eleasalo+ te faitaulaga mo Iosua+ te tama tagata a Nuno. 18 Kae ka puke mai ne koutou a takitaki e taki tokotasi mai matakāiga takitasi ke vaevae te fenua ke fai mo tofi o koutou.+ 19 Konei a igoa o tāgata konā: mai te matakāiga o Iuta,+ ko Kalepo+ te tama tagata a Iefune; 20 mai te matakāiga o tama tāgata a Simeona,+ ko Semuelu te tama tagata a Amiuta; 21 mai te matakāiga o Peniamina,+ ko Elitata te tama tagata a Tisilona; 22 mai te matakāiga o tama tāgata a Tanu,+ telā se takitaki, ko Puki te tama tagata a Iokila; 23 mai tama tāgata a Iosefa+ mai te matakāiga o tama tāgata a Manase,+ telā se takitaki, ko Hanielu te tama tagata a Efota; 24 mai te matakāiga o tama tāgata a Efalaima,+ telā se takitaki, ko Kemuelu te tama tagata a Sifatana; 25 mai te matakāiga o tama tāgata a Sepulona,+ telā se takitaki, ko Elisafana te tama tagata a Panako; 26 mai te matakāiga o tama tāgata a Isakala,+ telā se takitaki, ko Palatielu te tama tagata a Asana; 27 mai te matakāiga o tama tāgata a Asela,+ telā se takitaki, ko Aiuta te tama tagata a Selomi; 28 mai te matakāiga o tama tāgata a Nafatali,+ telā se takitaki, ko Petaelu te tama tagata a Amiuta.” 29 Konei a tino ne fakatonu ne Ieova ke vaevae ne latou te fenua ki tino Isalaelu i te fenua ko Kanana.+