Teutelonome

11 “E ‵tau mo koe o alofa ki a Ieova tou Atua+ kae fai tou tiute ki a ia kae fakalogo faeloa ki ana tulafono fakavae, ana ikuga o fakamasinoga mo ana fakatonuga. 2 E iloa ne koutou me e faipati atu au ki a koutou i te aso nei, kae e se ki otou tama tāgata kolā e se iloa kae seki lavea foki ne latou a polopolokiga a Ieova te otou Atua,+ tena tulaga sili,+ tena lima malosi+ mo tena lima mafi. 3 Ne seki lavea ne latou ana fakailoga mo ana faifaiga fakaofoofogia kolā ne fai i Aikupito ki te Falao, te tupu o Aikupito mo tena fenua kātoa;+ 4 io me ko mea ne fai ne ia ki kautau o Aikupito, ki solofanua mo kaliota tau a te Falao, kolā ne ‵goto ki lalo i te Tai Kula i te taimi ne afuli ei ne latou a koutou, kae ne fakaseai katoatoa latou ne Ieova.+ 5 Ne seki lavea ne latou a mea ne fai ne ia mō koutou i te koga lavaki ke oko ki te taimi ne oko mai ei koutou ki te koga tenei, 6 io me ko mea ne fai ne ia ki a Tatano mo Apilamo, ko tama tāgata a Eliapo te tama tagata a Leupena, i te taimi ne mavaelua ei te laukele kae folo atu a latou, fakatasi mo olotou kāiga mo olotou faleie mo mea ola katoa a latou, i mua eiloa o tino Isalaelu katoa.+ 7 Ne lavea eiloa ne koutou ki otou mata a faifaiga fakaofoofogia katoa ne fai ne Ieova.

8 “E ‵tau mo koutou o faka‵logo ki te fakatonuga kātoa tenei e tuku atu ne au ki a koutou i te aso nei, ko te mea ke gasolo aka koutou o ma‵losi kae ke olo atu ki te suā feitu ki te fenua telā ka puke mō koutou, 9 kae ke mafai o ola leva+ koutou i te fenua ne tauto a Ieova ke tuku atu ki otou tupuga mo olotou tama,*+ se fenua telā e ‵tafe i ei a susu mo hani.+

10 “A te fenua telā ka puke mō koutou e ‵kese mo te fenua o Aikupito ne ‵mai koutou i ei, telā e ‵toki fuaga sāle koutou i ei kae fakasiusiu ki otou vae,* e pelā me se fatoaga vesiapolo. 11 Kae ko te fenua telā ka olo koutou ki ei ke puke mō koutou se fenua o mauga kae e uke a vanu i ei.+ E inu ne ia a vai kolā e ‵to ifo mai te lagi;+ 12 se fenua telā e tausi ne Ieova tou Atua. A mata o Ieova tou Atua e kilokilo faeloa ki ei, mai te kamataga o te tausaga ke oko ki te fakaotiga o te tausaga.

13 “Kae kafai e faka‵logo katoatoa koutou ki aku fakatonuga kolā e fakatonu atu ne au ki a koutou i te aso nei kae a‵lofa ki a Ieova te otou Atua kae tavini atu ki a ia mo otou loto kātoa mo otou ola kātoa,+ 14 ka faka‵to ifo foki ne au a vaiua ki te otou fenua i tena taimi tonu, ko vaiua i te tau e ‵to ei a lau o lakau mo vaiua i te tau e ‵somo ei a lau o lakau, kae ka ‵luku mai ne koutou otou fuataga mo otou uaina ‵fou mo otou sinu.+ 15 Kae ka fai ne au ke ola a lakau valevale i otou manafa ma otou lafu manu, kae ko koutou ka ‵kai kae ma‵kona.+ 16 Fakaeteete ke mo a ma takitaki ‵se otou loto kae ‵fuli atu koutou o tapuaki ki nisi atua kae ifo ki a latou.+ 17 I te mea ma kaitaua a Ieova ki a koutou, kae ‵pono ne ia te lagi ke se ‵to mai a vaiua+ kae ke se ‵fua mai foki ne te laukele ana fuataga kae ka fakaseai fakavave atu koutou mai te fenua ‵lei telā ka tuku atu ne Ieova ki a koutou.+

18 “E ‵tau o masaua ne koutou aku pati konei i otou loto mo otou foitino kae ‵sai e pelā me se fakamasauaga ki luga i otou lima, kae e ‵tau o fai e pelā me se mea ‵sai ulu i otou lae.*+ 19 Akoako atu a mea konā ki otou tama‵liki māfai e saga‵saga koutou i otou fale kae māfai e sa‵sale koutou i te auala kae māfai e ta‵kato koutou ki lalo kae māfai foki ko ‵tu aka koutou ki luga.+ 20 Tusi a mea konā ki pou mataloa o otou fale mo mataloa o otou fakai, 21 ko te mea ke mafai o ola leva+ koutou mo otou tama tāgata i te fenua ne tauto a Ieova ke tuku atu ki otou tupuga,+ e pelā eiloa mo te leva e tu mai ei te lagi mai luga o te lalolagi.

22 “Kafai e tau‵tali fakamaoni koutou ki fakatonuga konei e tuku atu ne au ki a koutou kae faka‵logo koutou ki ei, ke a‵lofa ki a Ieova te otou Atua,+ ke sa‵sale i ana auala katoa kae ‵piki ‵mau ki a ia,+ 23 ka afuli kea‵tea ne Ieova a fenua katoa konei mai i otou mua,+ kae ka fakatakavale ne koutou a fenua e ‵lasi kae tokouke atu i lō koutou.+ 24 So se koga e ‵tu ki ei otou vae ka fai eiloa mō koutou.+ Mai te koga lavaki o fanaka ki Lepanona, mai te Vaitafe, te vaitafe ko Eufilate, ke oko ki te tai* i te feitu ki togala, tenā eiloa te otou tuakoi.+ 25 E seai se tino e mafai o tu atu o ‵teke koutou.+ Ka fai ne Ieova ko tino i luga i te fenua kātoa telā ka sa‵sale koutou i ei ke ma‵taku kae pole‵pole i a koutou,+ e pelā eiloa mo tena tautoga ki a koutou.

26 “Kiloke, ko tuku atu ne au i otou mua i te aso nei a te manuia mo te malaia:+ 27 ko te manuia māfai e faka‵logo koutou ki fakatonuga a Ieova te otou Atua kolā e fakatonu atu ne au ki a koutou i te aso nei,+ 28 mo te malaia māfai e se faka‵logo koutou ki fakatonuga a Ieova te otou Atua+ kae fulitua koutou ki te auala ne fakatonu atu au ke tau‵tali koutou i ei i te aso nei, kae tau‵tali eiloa koutou i atua kolā e se iloa ne koutou.

29 “Kafai ko aumai ne Ieova tou Atua a koe ki te fenua telā ka puke mō koe, e ‵tau mo koe o fakamanuia a tino i te Mauga o Kelisima kae fakamalaia a tino i te Mauga o Epalu.+ 30 E a, e se ‵tu atu a mauga konā i te suā feitu o te Iolitana i te feitu ki togala, i te fenua o tino Kanana kolā e ‵nofo i te Alapaa, i te suā feitu o Kilikala, i tafa o lakau ‵lasi o Mole?+ 31 Me ka olo atu koutou ki te suā feitu o te Iolitana o ulu ki loto kae puke a te fenua telā e tuku atu ne Ieova te otou Atua mō koutou.+ Kafai ko puke mō koutou te fenua kae ‵nofo i ei, 32 e ‵tau mo koutou o faka‵logo faka‵lei ki tulafono fo‵liki katoa mo ikuga o fakamasinoga kolā ka tuku atu ne au ki otou mua i te aso nei.+