Teutelonome

20 “Kafai e fano koe o taua atu ki ou fili kae lavea ne koe me e uke atu olotou solofanua, kaliota mo kautau i a koe, sa mataku i a latou, me i a Ieova tou Atua telā ne aumai ne ia koe ki tua mo Aikupito e fakatasi atu ki a koe.+ 2 Kafai ko pili koutou o olo ki te taua, e ‵tau o fanatu te faitaulaga o faipati atu ki tino.+ 3 E ‵tau o fai atu a ia ki a latou, ‘Faka‵logo mai e Isalaelu, ko pili koutou o taua atu ki otou fili. Sa loto vāi‵vai. Sa ma‵taku io me pole‵pole io me manava‵se ona ko latou, 4 me i a Ieova te otou Atua e māti fakatasi mo koutou o taua mō koutou ki otou fili kae faka‵sao ne ia koutou.’+

5 “E ‵tau foki mo ofisa o fai atu ki tino, ‘Ko oi te tino ne faite ne ia se fale fou kae seki fakaulufale ne ia? Tuku atu ke foki ki tena fale. I te mea ma mate a ia i te taua kae fakaulufale ne te suā tagata tena fale. 6 Kae ko oi te tino ne ‵toki tena togavine kae seki fakaaoga ne ia? Tuku atu ke foki ki tena fale. I te mea ma mate a ia i te taua kae fakaaoga ne te suā tagata tena togavine. 7 Ko oi te tino ne ‵sai feagaiga mo se fafine kae seki avaga mo ia? Tuku atu ke foki ki tena fale.+ I te mea ma mate a ia i te taua kae avaga te suā tagata mo te fafine tenā.’ 8 E ‵tau foki o fesili atu a ofisa ki tino, ‘Ko oi te tino e mataku kae loto vāivāi?+ E ‵tau o foki ki tena fale, i te mea ma fai ne ia ke loto vāi‵vai ana taina e pelā mo ia.’+ 9 Kafai ko oti ne fai‵pati a ofisa ki tino, e ‵tau o faka‵sopo aka ne latou ne takitaki o kautau ke takitaki ne latou a tino.

10 “Kafai e fanatu koe ki se fakai o taua atu ki ei, e ‵tau foki o fakailoa atu ne koe a mea kolā e ‵tau o fai ne te fakai tenā ke maua ei te filemu.+ 11 Kafai e tuku mai i ei se tali filemu ki a koe kae ‵tala mai olotou mataloa ki a koe, a tino katoa i loto i te fakai tenā ka fai mo tino faigaluega a koe, kae ka tavini atu latou ki a koe.+ 12 Kae kafai e se talia mo te filemu ne latou koe kae fai taua atu ki a koe, e ‵tau o nikoi ne koe te fakai, 13 kae ka tuku atu eiloa ne Ieova tou Atua a te fakai tenā ki ou lima, kae e ‵tau mo koe o tamate a tāgata katoa i loto i ei ki te pelu. 14 Kae ko fāfine, tama‵liki, lafu manu mo mea katoa i loto i te fakai, ko mea katoa ne ‵toe mai i te taua, e mafai o puke ne koe ma koe,+ kae ka kai koe ki mea a tou fili ne ‵toe mai i te taua, kolā ne tuku atu ne Ieova tou Atua ki a koe.+

15 “Konā mea e ‵tau o fai ne koe ki fakai katoa kolā e ‵mao ‵ki mai i a koe kolā e se ne fakai o atufenua konei e ‵pili mai. 16 Kae i fakai o tino konei, kolā ka tuku atu ne Ieova tou Atua ki a koe e pelā me se tofi, e se ‵tau mo koe o talia so se mea ola ke ola i ei.+ 17 I lō te fai penā, e ‵tau o ‵ta fakapalele atu ne koe a tino katoa konā, ko tino Heti, tino Amoli, tino Kanana, tino Pelise, tino Hivi mo tino Iepuse,+ e pelā eiloa mo te fakatonuga a Ieova tou Atua ki a koe; 18 ko te mea ke se akoako ne latou a koutou ke tau‵tali i olotou faifaiga fakatakalia‵lia katoa kolā ne fai ne latou ki olotou atua, kae fai ei ke agasala koe ki a Ieova te otou Atua.+

19 “Kafai ne nikoi ne koe se fakai kae puke ne koe mai tua o te fia o aso ne taua atu ei koe ki ei, e se ‵tau o fakamasei ne koe a lakau i ei mai te ‵kati ki te takū. E mafai o kai koe ki ei, kae e se ‵tau o ‵kati ne koe ki lalo.+ E mata, e ‵tau o nikoi ne koe a lakau o se vao e pelā mo te mea e fai ne koe ki se tagata? 20 E mafai fua o fakamasei ne koe se lakau telā e se kaina. E mafai o ‵kati ne koe ki lalo mo faite a ‵pui e fakatamilo ei te fakai mai tino kolā e taua atu ki a koe, ke oko ki te taimi e takavale ei.