Iosua

10 I te taimi ne logo ei a te tupu o Ielusalema ko Atonisateko me ko oti ne puke ne Iosua a Ai kae ne fakaseai katoatoa atu, kae fai ne ia ki Ai mo tena tupu+ a mea ne fai foki ne ia ki Ieliko mo tena tupu,+ mo te auala ne fai ei ne tino e ‵nofo i Kipeona ke maua ne latou se va filemu mo Isalaelu+ kae ke ‵nofo fakatasi mo latou, 2 ne ofo malosi tou tagata,+ me i Kipeona se fakai lasi eiloa, e pelā eiloa mo fakai kolā e isi ne tupu i ei. E lasi atu i lō Ai,+ kae ko tāgata katoa i ei ne toa ‵mafi katoa. 3 Tenā ne avatu ei ne Atonisateko te tupu o Ielusalema a tena fekau ki a Ohama te tupu o Hepelona,+ Pilama te tupu o Ialamuta, Iafia te tupu o Lakisa, mo Tipeli te tupu o Ekeloni:+ 4 “O‵mai o fesoasoani mai ki a au ke ‵ta ne tatou a tino Kipeona, me ko maua ne latou se va filemu mo Iosua mo tino Isalaelu.”+ 5 Ona ko te mea tenā, ne maopoopo fakatasi ei a tupu e tokolima o tino Amoli+​—te tupu o Ielusalema, te tupu o Hepelona, te tupu o Ialamuta, te tupu o Lakisa mo te tupu o Ekeloni​—fakatasi mo olotou kautau, kae ne olo atu latou o nikoi a Kipeona kae taua atu ki ei.

6 Tenā ne avatu ei ne tāgata Kipeona se fekau ki a Iosua i Kilikala:+ “Sa fakapuli ne koe au pologa.+ Vau fakavave! Faka‵sao matou kae fesoasoani mai! A tupu katoa o tino Amoli i koga maugā ko oti ne maopoopo o taua mai ki a matou.” 7 Tenā ne olo aka ei mai Kilikala a Iosua mo sotia mo toa ‵mafi katoa.+

8 Ne fai atu a Ieova ki a Iosua: “Sa mataku i a latou,+ me ko oti ne tuku atu ne au latou ki a koe.+ E seai se tino i a latou e mafai o tu o ‵teke atu ki a koe.”+ 9 Ne oko fakapoi atu a Iosua o taua ki a latou mai tua o te lotou mātimaiga i te po kātoa mai Kilikala. 10 Ne fai ne Ieova ke ‵numi valevale latou i mua o Isalaelu,+ kae ne ‵ta valevale latou ne tino Isalaelu i Kipeona, kae afuli atu latou i te auala o fanaka ki Peta-holono kae tamate latou ke oko ifo ki lalo i Aseka mo Maketa. 11 I te taimi ne ‵tele ei latou kea‵tea mai Isalaelu kae olo ifo i te auala ki Peta-holono, ne faka‵to ifo ne Ieova a vaiua fatu mai te lagi ki a latou ke oko atu eiloa ki Aseka, kae ne ‵mate atu latou i ei. A te ‵tonuga loa, e tokouke atu a tino ne ‵mate i te vaiua fatu i lō te pelu a tino Isalaelu.

12 Ko te taimi eiloa tenā, i te aso telā ne fakatakavale ei ne Ieova a tino Amoli i mua o tino Isalaelu, ne fai atu ei a Iosua ki a Ieova i mua o Isalaelu:

13 Tenā ne tu eiloa te la kae ko te masina foki ko se gasue ke oko ki te taimi e fakatakavale ei ne te fenua ana fili. E a, e se tusi a mea konā i te tusi a Iasela?+ Ne tu ‵mautakitaki a te la i te kogāloto o te lagi, kae seki tō eiloa i te aso kātoa tenā. 14 E seai eiloa se aso penā mai i ana mua io me mai tua ifo, ne fakalogo ei a Ieova ki te leo o se tagata,+ me i a Ieova e taua atu mō Isalaelu.+

15 I te otiga o te mea tenā, ‵foki atu ei a Iosua fakatasi mo Isalaelu kātoa ki te koga e ‵nofo ei latou i Kilikala.+

16 I te taimi tenā, ne ‵tele a tupu e tokolima o ‵muni i te ana i Maketa.+ 17 Tenā ne oko atu ei te lipoti ki a Iosua: “Ko oti ne maua atu a tupu e tokolima e ‵muni i te ana i Maketa.”+ 18 Muna a Iosua: “Faka‵teka atu ne fatu ‵lasi ki te gutu o te ana kae ‵tofi ne tāgata ke leoleo ne latou. 19 Kae sa ‵nofo a koutou katoa i konā. Olo o afuli otou fili kae ‵ta latou mai te feitu ki tua.+ Sa talia ne koutou ke ulu atu latou ki olotou fakai, me ko oti ne tuku atu latou ne Ieova te otou Atua ki otou lima.”

20 I te otiga ne ‵ta valevale latou ne Iosua mo tino Isalaelu, ke oko ki te tulaga ko fakaseai atu ei a latou kae na ko nai tino fua kolā ne ‵sao kae ne ulu atu ki loto i olotou fakai e puipui faka‵lei, 21 ne ‵foki atu a tino katoa mo te filemu ki a Iosua i te lotou koga ‵nofo i Maketa. E seai eiloa se tagata ne mafai o taku fakamasei ne ia a tino Isalaelu. 22 Tenā ne fai atu ei a Iosua: “‵Tala te gutu o te ana kae aumai ki tua a tupu e tokolima konā ki a au.” 23 Ne aumai ne latou a tupu e tokolima konei mai te ana ki a ia: te tupu o Ielusalema, te tupu o Hepelona, te tupu o Ialamuta, te tupu o Lakisa mo te tupu o Ekeloni.+ 24 I te aumaiga ne latou a tupu konei ki a Iosua, ne fakatonu atu a ia ki tāgata Isalaelu katoa kae fai atu ki takitaki o sotia kolā ne olo fakatasi mo ia: “O‵mai ki mua! ‵Laka otou vae i tua o ua o tupu konei.” Ne o‵mai latou ki mua kae ‵laka olotou vae i tua o ua o tupu konā.+ 25 Tenā ne fai atu ei a Iosua ki a latou: “Sa ma‵taku io me pole‵pole.+ Ke loto ‵toa kae loto ma‵losi, me tenei te mea ka fai ne Ieova ki otou fili katoa kolā e taua atu ki a koutou.”+

26 Ne ‵ta ne Iosua a latou kae tamate atu kae fakatau‵tau i luga i pou* e lima, kae ne tau‵tau eiloa latou i luga i pou konā ke oko ki te afiafi. 27 I te taimi ne tō ei te mata o te la ne fakatonu atu a Iosua ke tuku ifo latou ki lalo mo pou+ konā kae ‵pei atu ki loto i te ana telā ne ‵muni ei latou. Tenā ne tuku atu ei ne latou a fatu ‵lasi i te gutu o te ana, kae koi ‵tu eiloa a mea konei ke oko mai ki te aso nei.

28 Ne puke ne Iosua a Maketa+ i te aso tenā kae ‵ta ne ia ki te pelu. Ne tamate ne ia tena tupu mo tino katoa i ei, kae seai eiloa se tino ne sao.+ Ne fai ne ia ki te tupu o Maketa+ a te mea ne fai ne ia ki te tupu o Ieliko.

29 Tenā ne olo atu ei a Iosua mo Isalaelu kātoa mai Maketa ki Lipina o taua atu ki Lipina.+ 30 Ne tuku atu foki ne Ieova a Lipina mo tena tupu+ ki lima o Isalaelu, kae ne ta ne latou fakatasi mo tino katoa i ei ki te pelu, kae seai eiloa se tino ne sao i ei. Ne fai ne latou ki tena tupu a te mea ne fai ne latou ki te tupu o Ieliko.+

31 Ne toe olo atu a Iosua mo Isalaelu kātoa mai Lipina ki Lakisa+ o ‵nofo i ei kae taua atu ki ei. 32 Ne tuku atu ne Ieova a Lakisa ki lima o Isalaelu, kae ne puke ne latou i te lua o aso. Ne ta ne latou fakatasi mo tino katoa i ei ki te pelu,+ e pelā eiloa mo te mea ne fai ne latou ki Lipina.

33 Tenā ne fanatu ei a Holamo te tupu o Kesela+ o fesoasoani ki Lakisa, kae ne ta ne Iosua a ia mo ana tino ke oko ki te taimi ko seai eiloa se tino e ‵toe.

34 Ne toe olo atu a Iosua mo Isalaelu kātoa mai Lakisa ki Ekeloni+ o ‵nofo i ei kae taua atu ki ei. 35 Ne puke ne latou a Ekeloni i te aso tenā kae ta ne latou ki te pelu. Ne tamate ne latou a tino katoa i ei i te aso tenā, e pelā eiloa mo te mea ne fai ne latou ki Lakisa.+

36 Tenā ne toe olo aka ei a Iosua mo Isalaelu kātoa mai Ekeloni ki Hepelona+ kae taua atu ki ei. 37 Ne puke ne latou te fakai tenā kae ta ne latou a tena tupu, ana fakai fo‵liki, mo tino katoa i ei ki te pelu kae seai se tino ne fakasao ne latou. E pelā eiloa mo tena mea ne fai ki Ekeloni, ne tamate foki ne ia a tino katoa i ei.

38 Fakamuli loa, ne ‵fuli atu a Iosua mo Isalaelu kātoa ki Tipeli+ kae taua atu ki ei. 39 Ne puke ne ia a Tipeli, tena tupu, mo ana fakai fo‵liki katoa, kae ‵ta ne ia ki te pelu, kae fakaseai+ atu a tino katoa i ei, kae seai se tino ne fakasao ne latou.+ Ne fai ne ia ki Tipeli mo tena tupu a te mea ne fai ne ia ki Hepelona mo Lipina mo tena tupu.

40 Ne fakatakavale ne Iosua a fenua katoa i koga maugā, ko te Nekepi, te Sefila,*+ mo feitu mauga mo olotou tupu katoa, kae seai se tino ne fakasao; ne fakaseai+ atu ne ia a mea ola katoa, e pelā eiloa mo te fakatonuga a Ieova te Atua o Isalaelu.+ 41 Ne fakatakavale ne Iosua a latou mai Katesa-panea+ ke oko ki Kasa+ mo fenua katoa o Kosena+ ke oko atu ki luga i Kipeona.+ 42 Ne puke ne Iosua a tupu katoa konei mo olotou fenua i te taimi eiloa e tasi, me i a Ieova te Atua o Isalaelu e taua eiloa mō Isalaelu.+ 43 Tenā ne ‵foki atu ei a Iosua mo Isalaelu kātoa ki te lotou koga ‵nofo i Kilikala.+