Iosua

2 Tenā ne uga lēmū atu ei ne Iosua, te tama tagata a Nuno, a tāgata e tokolua mai Sitima+ e pelā me ne sipai. Ana muna ki a lāua: “Olo o iloilo te fenua, maise eiloa ko Ieliko.” Ne olo atu lāua kae oko atu ki te fale o te fafine talitāgata e igoa ki a Lahapa,+ ‵nofo ei lāua i konā. 2 Ne fakailoa atu ki te tupu o Ieliko: “Kiloke! E isi ne tāgata Isalaelu ne o‵mai o iloilo te fenua i te po nei.” 3 Ne avatu te fekau a te tupu o Ieliko ki a Lahapa penei: “Aumai ki tua a tāgata kolā ne o‵mai kae e ‵nofo nei i tou fale, me ne o‵mai lāua o iloilo a te fenua kātoa.”

4 Kae ne puke ne te fafine tenā a tāgata e tokolua konā o faka‵muni. Ne fai atu tou fafine: “E tonu, ne o‵mai a tāgata konā ki a au, kae e se iloa ne au me ko lāua ne tāgata mai fea. 5 Kae i te taimi ko pouli ei kae ko pili eiloa o ‵pono a mataloa o te fakai, ne olo atu ki tua a tāgata konā. E se iloa ne au me ne olo ki fea a lāua, kae kafai e afuli fakavave ne koutou, e mafai eiloa o maua ne koutou a lāua.” 6 (Kae tela la, ko oti ne ave ne tou fafine a lāua ki luga i te tuafale kae faka‵muni ne ia ki kaula o te lakau ko te lino kolā ko oti ne fakalaina faka‵lei ne ia i luga i te tuafale.) 7 Ne afuli ne tāgata a lāua konā i te auala ki te asaga o te Iolitana,+ kae ‵pono te mataloa o te fakai i te taimi ne ‵to ei ki tua a tāgata kolā ne olo o afuli a lāua.

8 Kae koi tuai o ta‵kato ifo a tāgata konā o ‵moe, ne fanaka tou fafine ki a lāua i luga i te tuafale. 9 Ne fai atu tou fafine ki tāgata konā: “E iloa ne au me ka tuku atu ne Ieova te fenua+ ki a koutou, kae ko matou ko ma‵taku ona ko koutou.+ A tino katoa e ‵nofo i te fenua ko loto vāi‵vai ona ko koutou,+ 10 me ne ‵logo matou i te faiga ne Ieova ke ‵masa a vai o te Tai Kula i mua o koutou i te taimi ne tiaki ei ne koutou a Aikupito+ mo mea ne fai ne koutou ki te avā tupu o tino Amoli, ko Sekono+ mo Oko,+ kolā ne ‵ta fakapalele ne koutou i te suā feitu* o te Iolitana. 11 I te taimi ne ‵logo ei matou i mea konā, ne loto vāi‵vai matou, kae e seai eiloa se tino ne maua ne ia te loto toa ona ko koutou, me i a Ieova te otou Atua ko te Atua o te lagi i luga mo te lalolagi i lalo.+ 12 Fakamolemole, tauto mai nei ki a au i mua o Ieova, ona ko te mea ne fakaasi atu ne au te alofa fakamaoni ki a koulua, ka fakaasi mai foki ne koulua a te alofa fakamaoni ki te kāiga o toku tamana, kae e ‵tau mo koulua o tuku mai se fakailoga e mafai o fakamaoni mai i ei.* 13 E ‵tau mo koulua o faka‵sao a ola o toku tamana mo toku mātua, oku tuagane mo oku taina mo tino katoa kolā e ‵nofo mo latou, kae e ‵tau mo koulua o faka‵sao a matou mai te mate.”+

14 Ne fai atu a tāgata konā ki a ia: “Ka tuku atu ne māua mā ola mō koe!* Kafai e se fakailoa ne koe ki se tino e uiga ki a māua, ka fakaasi atu eiloa ne māua a te alofa fakamaoni mo te mā fakamaoni ki a koe māfai ko tuku mai ne Ieova ki a matou a te fenua tenei.” 15 Oti aka, tuku ei ne ia ke olo ifo lāua i se lōpu mai te famalama, me i tena fale e tu i te feitu o te ‵pui o te fakai. Ne nofo tonu eiloa a ia i luga i te ‵pui.+ 16 Muna a tou fafine ki a lāua: “Olo ki koga maugā kae ‵muni i ei i aso e tolu, ko te mea ke se maua koulua ne tino kolā ne olo o afuli koulua. Kafai ko oti ne ‵foki mai a latou, ko mafai ei o olo koulua i te lua auala.”

17 Ne fai atu ou tāgata ki tou fafine: “Ka saoloto māua mai i te agasala e uiga ki te tautoga tenei ne fai ne koe ke tauto+ māua ki ei 18 seiloga, ke o‵mai matou ki loto i te fenua kae ‵sai ne koe te uka kula tenei i te famalama telā ne olo ifo i ei māua. E ‵tau o fakamaopoopo mai ne koe tou tamana, tou mātua, ou tuagane mo kāiga katoa o tou tamana fakatasi mo koe ki loto i te fale.+ 19 Kae kafai e fano se tino ki tua mo tou fale ki te koga ateatea, ka ‵losi ki a ia tena mate,* kae ka saoloto māua mai te agasala. Kae kafai e pakia se tino i a koutou kolā e ‵nofo i loto i te fale, ka ‵losi ki a māua tena mate. 20 Kae kafai e fakailoa ne koe ki se tino e uiga ki a māua,+ ka saoloto māua mai te agasala e uiga ki te tautoga ne fai ne koe ke tauto māua ki ei.” 21 Ne tali atu tou fafine: “Ke fai eiloa penā e ‵tusa mo pati a koulua.”

Ne uga ne ia lāua ke olo, olo ei lāua i te lā auala. Oti aka, ‵sai ei ne ia te uka kula i te famalama. 22 Ne olo ou tāgata ki koga maugā kae ‵nofo i ei i aso e tolu, ke oko ki te taimi ne ‵foki ei a tino kolā ne olo o afuli lāua. Ne ‵sala ne tāgata konā a lāua i auala katoa, kae seki maua ne latou a lāua. 23 Ne olo ifo a tāgata e tokolua konā mai koga maugā kae olo atu ki te suā feitu o te vaitafe, kae ne olo atu ki a Iosua te tama tagata a Nuno. Ne fakamatala atu ne lāua ki a ia a mea katoa kolā ne ‵tupu ki a lāua. 24 Tenā ne fai atu ei lāua ki a Iosua: “Ko oti ne tuku mai ne Ieova a te fenua kātoa ki a tatou.+ A tino katoa e ‵nofo i te fenua ko loto vāi‵vai ona ko tatou.”+