Luta

4 Ne fanatu a Poasa ki te mataloa o te fakai+ kae sagasaga i konā. Kae kiloke! ne sasale mai a te kāiga pili*+ ko ia telā ne faipati a Poasa e uiga ki ei. Tenā ne fai atu ei Poasa ki a ia: “Vau ki konei o sagasaga ki lalo.” Kae ne fanatu tou tagata o sagasaga ki lalo. 2 Tenā ne aumai ei ne Poasa a toeaina+ e tokosefulu o te fakai kae fai atu: “Saga‵saga i konei.” Tenā ne saga‵saga ifo ei latou.

3 Ne fai atu a Poasa ki te tino tenā e kāiga pili:+ “A Naomi telā ko oti ne foki mai i laukele o Moapi,+ e ‵tau o fakatau atu ne ia a te manafa o te tā taina ko Elimeleka.+ 4 Kae ne mafaufau aka au me e ‵tau o fakailoa atu ne au ki a koe a te mea tenei kae fai atu, ‘‵Togi a te manafa tenā i mua o tino mo toeaina o toku fenua.+ Kafai e toe ‵togi ne koe, ko ‵togi la. Kae kafai e se toe ‵togi ne koe, fakailoa mai ke iloa ne au, me ko koe eiloa te tino e ‵tau o toe ‵togi ne koe te manafa, kae ko au e tafa atu ki a koe.’” Ne tali atu tou tagata: “Au e loto fiafia o toe ‵togi te manafa.”+ 5 Tenā ne fai atu ei a Poasa: “I te aso e ‵togi ei ne koe te manafa mai i a Naomi, e ‵tau foki mo koe o ‵togi mai a te mea tenā mai i a Luta te fafine Moapi, ko te avaga a te tagata telā ko mate, ko te mea ke mafai o toe fakafoki mai a te igoa o te tagata telā ko mate ki tena tofi.”+ 6 Kae ne fai atu te tino tenā e kāiga pili: “E se mafai ne au o toe ‵togi a te manafa, i te mea ma fakamasei ne au toku tofi. Toe ‵togi ne koe ma koe mai lalo i toku saolotoga, me e se mafai ne au o toe ‵togi te manafa.”

7 Tenei te tuu masani i Isalaelu i aso mua e uiga ki te saolotoga o se tino ke toe ‵togi kae fesuiaki se mea ke fakamaoni aka ei te mea tenā: E ‵tau o tapale ne se tagata tena taka+ kae tuku atu ki te suā tino, kae tenā te auala e fakamautinoa aka ei ne tino Isalaelu a te feagaiga* telā ko oti ne fai. 8 Tela la, i te taimi ne fai atu ei te tino tenā e kāiga pili ki a Poasa, “‵Togi mō koe te manafa,” tapale ei ne ia tena taka. 9 Tenā ne fai atu ei a Poasa ki toeaina mo tino katoa: “Ko molimau+ koutou i te aso nei me ka ‵togi ne au mai i a Naomi a mea katoa a Elimeleka mo mea katoa a Kiliona mo Malona. 10 Ka ‵togi foki ne au a Luta te fafine Moapi, te avaga a Malona, mo fai taku avaga ke toe fakafoki mai te igoa o te tagata telā ko mate ki tena tofi,+ ko te mea ke mo a ma tapale kea‵tea te igoa o te tagata telā ko mate mai i ana taina mo tino o te fakai.* A koutou ko fai mo molimau i te aso nei.”+

11 I konā ne fai atu ei a tino katoa i loto i te fakai fakatasi mo te kau toeaina: “A matou ko molimau! Ke fai eiloa ne Ieova a tau avaga telā ka ulu atu ki tou fale ke pelā mo Lasela mo Lea, kolā ne ‵mai ei te kāiga o Isalaelu.+ Ke manuia koe i Efalata+ kae fai se igoa ‵lei i Peteleema.+ 12 Kae ke fai tou kāiga e pelā mo te kāiga o Falesa,+ te tama a Iuta i a Tamala, e auala i te fanau telā ka tuku atu ne Ieova ki a koe mai te fafine tenei.”+

13 Tenā ne puke ei ne Poasa a Luta mo fai tena avaga. Ne ‵moe fakatauavaga lāua, kae ne fai ne Ieova ke faitama a ia kae fanau mai ne ia se tamaliki tagata. 14 Kae ne fai atu a fāfine ki a Naomi: “Ke vikia a Ieova me ne seki tiaki ne ia koe e aunoa mo se tino ke toe ‵togi ne ia koe i te aso nei. Ke vikia eiloa te igoa o te tamaliki i Isalaelu! 15 Ko oti ne toe fakafoki* mai ne ia* tou ola kae ka tausi ne ia koe i te taimi ko lomatua ei koe, me ne fanau mai a ia ne te avaga a tau tama, telā e alofa ki a koe+ kae ‵lei atu ki a koe i lō tama tāgata e tokofitu. 16 Ne puke ne Naomi te tamaliki kae ‵sai mai ki ana fatafata, tausi ei ne tou fafine a ia. 17 Tenā ne fakaigoa ei ne ana tuakoi fāfine a te tamaliki tenā. Ne fai atu latou, “Ko fanau mai se tamaliki tagata a Naomi,” fakaigoa ei ne latou ki a Opeta.+ A ia ko te tamana o Iese,+ te tamana o Tavita.

18 Tenei te gafa o te kāiga o Falesa:+ A Falesa ko te tamana o Eselona;+ 19 Eselona ko te tamana o Alama; Alama ko te tamana o Aminatapu;+ 20 Aminatapu+ ko te tamana o Nasona; Nasona ko te tamana o Salemona; 21 Salemona ko te tamana o Poasa; Poasa ko te tamana o Opeta; 22 Opeta ko te tamana o Iese;+ kae ko Iese ko te tamana o Tavita.+