Te Muamua Samuelu

15 Tenā ne fai atu ei a Samuelu ki a Saulo: “A Ieova ne uga mai ne ia au o fakasopo koe ke fai mo tupu o ana tino Isalaelu;+ nei la, fakalogo ki pati a Ieova.+ 2 Konei a pati ne fai mai ne Ieova o kautau: ‘Ka taui atu ne au a te mea ne fai ne tino Amaleka ki tino Isalaelu ona ko te lotou ‵teke atu ki a latou i te lotou auala o ‵mai ki tua mo Aikupito.+ 3 Fano o ‵ta a tino Amaleka,+ kae fakaseai atu latou+ fakatasi mo olotou mea katoa. E se ‵tau mo koe o faka‵sao* latou. E ‵tau eiloa o tamate ne koe a latou,+ ko tāgata e pelā foki mo fāfine, tama‵liki e pelā foki mo pepe, pulumakau tāgata e pelā foki mo mamoe, kamela e pelā foki mo asini.’”+ 4 Ne fakamaopooo mai ne Saulo a tino kae lau a latou i Telaima: E ‵tusa mo te toko 200,000 sotia sa‵sale mai nisi matakāiga o Isalaelu kae toko 10,000 mai tāgata Iuta.+

5 Ne fanatu a Saulo ke oko eiloa ki te fakai o Amaleka kae ‵muni i te vanu. 6 Tenā ne fai atu ei a Saulo ki tino Keni:+ “Olo kea‵tea mai tino Amaleka, ko te mea ke se ‵ta fakapalele ne au koutou fakatasi mo latou.+ Me ne fakaasi atu ne koutou a te alofa fakamaoni ki tino Isalaelu katoa+ i te taimi ne o‵mai ei latou ki tua mo Aikupito.” Tenā ne tiaki ei ne tino Keni a Amaleka. 7 Oti aka, fanatu ei a Saulo o ‵ta a tino Amaleka+ mai Havila+ ke oko atu ki Sula,+ telā e tu i tafa o Aikupito. 8 Ne puke ne ia a Akako+ te tupu o Amaleka kae e se tamate, kae ko nisi tino aka katoa ne tamate ne ia ki te pelu.+ 9 Kae ko Saulo mo ana tino ne faka‵sao ne latou a Akako mo toe manu ‵lei i te lafu mamoe, te lafu pulumakau, ko manu puta‵puta, ko mamoe ma‵tua mo mea ‵lei katoa.+ Ne seki ma‵nako latou ke tamate atu a mea konā. Kae ko mea katoa kolā e se aoga kae e se manakogina ne tamate katoa ne latou.

10 Muna a Ieova ki a Samuelu: 11 “Au ko fanoanoa me ne fai ne au a Saulo ke fai mo tupu, me i a ia ko ‵fuli kea‵tea o se tautali mai i a au kae e seki fakalogo a ia ki aku pati.”+ Ne fanoanoa malosi a Samuelu i ei, kae ne tagi atu faeloa a ia ki a Ieova i te po kātoa.+ 12 I te taimi ne tu aka ei a Samuelu i te tafataeao ke fetaui mo Saulo, ne avatu te fakailoaga ki a Samuelu: “A Saulo ne fano ki Kalamelu,+ kae ne fakatu ne ia i konā se mā fakamanatu mō ia.+ Tenā ne ‵fuli ei tou tagata o fano ki Kilikala.” 13 I te okoatuga a Samuelu ki a Saulo, ne fai atu a Saulo ki a ia: “Ke fakamanuia koe ne Ieova. Ko oti ne fai ne au te fakatonuga a Ieova.” 14 Muna a Samuelu: “Kae ne a ‵tagi o mamoe konei e lagona ne au ki oku taliga mo te ‵tagi o pulumakau?”+ 15 I konā ne fai atu ei a Saulo: “A mea konā ne puke mai i tino Amaleka, me ne faka‵sao ne tino a toe manu ‵lei mai te lafu mamoe mo te lafu pulumakau ke ofo atu ne latou e pelā me ne taulaga ki a Ieova tou Atua; kae ko mea kolā ne ‵toe ne tamate katoa.” 16 Kae ne fai atu a Samuelu ki a Saulo: “Ko lava! Ke fakamatala atu ne au a pati ne fai mai ne Ieova ki a au i te po.”+ Tenā ne fai atu ei a ia: “Faipati mai!”

17 Ne toe fai atu a Samuelu: “E a, ne seki mafaufau koe me i a koe ko te ‵toe tino sē taulia+ eiloa i te taimi ne fai ei koe mo takitaki o matakāiga o Isalaelu, mo te taimi ne fakasopo ei koe ne Ieova ke fai mo tupu o Isalaelu?+ 18 Fakamuli ifo, a koe ne uga ne Ieova ke fano o fai se galuega kae fai atu, ‘Fano o ‵ta fakapalele a tino agasala, kolā ko tino Amaleka.+ Taua atu ki a latou ke oko ki te taimi ko oti ei ne ‵ta fakapalele ne koe latou.’+ 19 Tela la, kaia ne seki fakalogo ei koe ki te leo o Ieova? I lō te fai penā, ne tele fakavave atu koe mo te kaimanako o puke a mea mai te taua+ kae fai se mea masei i te kilokiloga a Ieova!”

20 Kae ne fai atu a Saulo ki a Samuelu: “Kae ko au ne fakalogo eiloa ki te leo o Ieova! Ne fano au o fai te galuega telā ne uga au ne Ieova ke fai, kae ne puke mai ne au a Akako te tupu o Amaleka, kae ne ‵ta fakapalele ne au a tino Amaleka.+ 21 Kae ne puke ne tino a mamoe mo pulumakau mai te taua, ko toe mea tafasili i te ‵lei i mea kolā ne tamate, ke ofo e pelā me ne taulaga ki a Ieova tou Atua i Kilikala.”+

22 Tenā ne fai atu ei a Samuelu: “E mata, e sili atu te fiafia o Ieova ki taulaga ‵sunu mo nisi taulaga+ i lō tena fiafia māfai e fakalogo koe ki te leo o Ieova? Kiloke! E sili atu te fakalogo i lō te faiga o taulaga,+ kae sili foki te saga tonu atu i lō gako+ o mamoe ma‵tua; 23 me i te ‵teke atu+ e ‵pau eiloa mo te agasala ko te fai mea fakataulaitu,+ kae ko te fakamatamata e ‵pau eiloa mo te faivailakau mo te ifo ki tupua. Ona ko koe ne ‵teke ki te fakatonuga a Ieova,+ ko ‵teke foki ne ia koe mai te fai pelā me se tupu.”+

24 Tenā ne fai atu ei a Saulo ki a Samuelu: “Au ko agasala, me ko oti ne soli ne au te fakatonuga a Ieova mo au pati, me i a au ne mataku ki tino kae fakalogo ki olotou pati. 25 Kae nei la, fakamolemole fakamagalo mai taku agasala, kae ke ‵foki fakatasi tāua ko te mea ke mafai o totuli ifo au i mua o Ieova.”+ 26 Kae ne fai atu a Samuelu ki a Saulo: “Au e se ‵foki fakatasi mo koe, me ko oti ne ‵teke ne koe te fakatonuga a Ieova, kae ko ‵teke foki ne Ieova a koe mai te fai faeloa pelā me se tupu o Isalaelu.”+ 27 I te mafuliga a Samuelu o fano, ne ‵lave atu a Saulo ki te fele o tena gatu, kae ne masae kea‵tea. 28 Kae ne fai atu a Samuelu ki a ia: “Ko oti ne ‵sae kea‵tea ne Ieova a te pulega fakatupu o Isalaelu mai i a koe i te aso nei, kae ka tuku atu ne ia ki se tino e tokotasi o au tāgata telā e ‵lei atu i a koe.+ 29 E se gata i ei, a te Atua ‵Malu o Isalaelu+ e se mafai o loi+ io me fulifuli tena mafaufau, me i a Ia e sē se tagata fua e penei mo tatou telā e ‵tau o fulifuli tena mafaufau.”*+

30 Kae ne fai atu a ia: “Au ko agasala. Kae fakamolemole, ke faka‵malu ne koe au i mua o toeaina o oku tino mo tino Isalaelu. Tāua e ‵foki, kae ka totuli ifo au i mua o Ieova tou Atua.”+ 31 Tenā ne foki ei a Samuelu mai tua o Saulo, kae ne totuli ifo a Saulo i mua o Ieova. 32 Kae ne fai atu a Samuelu: “Aumai a Akako te tupu o Amaleka ke pili mai ki a au.” Tenā ne fanatu ei a Akako mo te mataku ki a ia, me i a Akako ne fai ifo faeloa ki a ia: ‘E mautinoa eiloa me ka se tamate au.’ 33 Ne fai atu a Samuelu: “E pelā eiloa mo tau pelu telā ne fai ne ia ke mafatia a fāfine ona ko olotou tama, tela la, a tou mātua ka sili atu tena mafatia i lō fāfine katoa.” I konā ne katikati fakalikiliki ne Samuelu a Akako i mua o Ieova i Kilikala.+

34 Ne fano a Samuelu ki Lama, kae fanatu a Saulo ki tena fale i Kipea te fenua o Saulo. 35 Ne seki toe lavea ne Samuelu a Saulo ke oko ki te aso ne mate ei a ia, me ne fanoanoa eiloa a Samuelu ona ko Saulo.+ Kae ko Ieova ne fanoanoa me ne fai ne ia a Saulo ke fai mo tupu o Isalaelu.+