Te Muamua Samuelu

4 Ne oko atu te fekau a Samuelu ki Isalaelu kātoa.

Tenā ne olo atu ei a tino Isalaelu o taua ki tino Filisitia; ne ‵nofo latou i tafa o Epenesa, kae ko tino Filisitia ne ‵nofo i Afeka. 2 Ne fakatoka a tino Filisitia o taua ki Isalaelu, kae ne seki manuia te faiga o te taua me ne fakatakavale a Isalaelu ne tino Filisitia, kae kāti e toko 4,000 tāgata kolā ne ‵ta ne latou i te taua. 3 I te taimi ne ‵foki atu ei a sotia ki te lotou koga ‵nofo, ne fai atu a toeaina o Isalaelu: “Kaia ne talia ei ne Ieova ke fakatakavale* tatou ne tino Filisitia i te aso nei?+ Tatou ka olo o puke mai a te pusa o te feagaiga a Ieova mai Sailo,+ ko te mea ke ‵nofo fakatasi mo tatou kae ke faka‵sao i ei tatou mai lima o ‵tou fili.” 4 Tenā ne uga atu ei ne latou ne tāgata ke olo ki Sailo, kae ne amo mai ne latou mai i konā a te pusa o te feagaiga a Ieova o kautau, telā e sagasaga i tena nofogaaliki mai luga* o kelupi.+ Ne olo fakatasi atu foki a tama tāgata e tokolua a Eli, ko Hofeni mo Fineaso+ mo te pusa o te feagaiga a te Atua tonu.

5 I te taimi eiloa ne oko atu ei te pusa o te feagaiga a Ieova ki te lotou koga ‵nofo, ne paka‵laga ki luga a tino Isalaelu katoa, tenā ne galulu ei te laukele. 6 I te taimi ne lagona ei ne tino Filisitia a tino e paka‵laga, ne fai aka latou: “Kaia ko paka‵laga ei a tino Epelu?” Ne iloa fakamuli aka ne latou me ko oko atu a te Pusa a Ieova ki te lotou koga ‵nofo. 7 Ne kamata o ma‵taku a tino Filisitia me ne fai aka latou: “Ko oko atu a te Atua ki te lotou koga ‵nofo!”+ Tenā ne fai aka ei latou: “Fakaa‵lofa tatou me seki ai eiloa se mea penei ne tupu muamua! 8 Fakaa‵lofa tatou! Ko oi ka faka‵sao ne ia tatou mai lima o te Atua fakaofoofogia tenei? Tenei te Atua telā ne ‵ta valevale ne ia a tino Aikupito i te koga lavaki.+ 9 Ke loto ‵toa kae fai pelā me ne tāgata, koutou e tino Filisitia, ko te mea ke mo a ma tavini atu koutou ki tino Epelu e pelā mo latou ne tavini atu ki a koutou.+ Fai pelā me ne tāgata kae taua atu!” 10 Tenā ne taua atu ei a tino Filisitia kae ne taka‵vale a tino Isalaelu,+ kae ne ‵tele atu a tino taki tokotasi ki olotou faleie. Ne tokouke ‵ki a tino ne tamate; e toko 30,000 a sotia Isalaelu ne ‵mate. 11 Tenā ne puke ei te Pusa a te Atua, kae ko tama tāgata e tokolua a Eli, ko Hofeni mo Fineaso ne ‵mate katoa.+

12 Ne tele mai se tagata Peniamina mai te taua kae oko atu ki Sailo i te aso tenā mo ana gatu e masae‵sae mo ‵pefu i tena ulu.+ 13 I te okoatuga a te tagata tenā, kae ko Eli e sagasaga i tafa o te auala kae kilokilo atu eiloa, me ko oko loa i ana polepole ona ko te Pusa a te Atua tonu.+ Ne fanatu te tagata ki loto i te fakai kae fakailoa atu ne ia te tala, kae ne kamata o ‵tagi a te fakai kātoa. 14 I te lagonaga ne Eli a tino e ‵tagi, ne fesili atu a ia: “Se a katoa te logoa tenei?” Ne fanatu fakavave te tagata tenā kae fakailoa atu te tala ki a Eli. 15 (I te taimi nei a Eli ko 98 ana tausaga, kae kilo ‵tonu atu eiloa ki mua, kae ko se mafai o lavea ne ia se mea.)+ 16 Tenā ne fai atu ei te tagata tenā ki a Eli: “Au ko te tino telā ne tele mai te taua! Ko te aso nei ne tele mai ei au mai te taua.” Kae ne fesili atu a ia: “Taku tama, se a te mea ko tupu?” 17 Tenā ne fai atu ei ne ia te tala: “A tino Isalaelu ko ‵tele kea‵tea mai tino Filisitia, kae ko takavale masei eiloa ‵tou tino;+ a au tama tāgata e tokolua, ko Hofeni mo Fineaso, ko oti foki ne ‵mate,+ mo te Pusa a te Atua tonu ko oti ne puke kea‵tea.”+

18 I te taimi eiloa ne fai atu ei tou tagata e uiga ki te Pusa a te Atua tonu, ne fiti a Eli ki ana tua mai tena nofoga i tafa o te mataloa, kae ne fati tena ua kae mate, me i a ia ko toeaina kae ‵mafa foki. Ne fai a ia mo famasino o Isalaelu i tausaga e 40. 19 A te avaga a tena tama ko Fineaso e faitama kae ko pili eiloa o fanau. I tena logoga i te tala me ko oti ne puke a te Pusa a te Atua tonu e pelā foki mo te tamana o tena avaga fakatasi mo tena avaga ko ‵mate, ne punou ifo a ia ki lalo kae ne ‵mae fakavave tena tua, fanau ei a ia. 20 I te taimi ko pili ei a ia o mate, ne fai atu a fāfine kolā e ‵tu i ana tafa: “Sa mataku, me i tau tama se tagata.” Ne seki tali atu tou fafine kae ne seki fia saga atu foki ki a latou.* 21 Kae ne fakaigoa ne ia te tamaliki tagata ki a Ikapoti,*+ ana muna: “A te ‵malu ko ave kea‵tea mai Isalaelu me ko oti ne ave fakapagota,”+ kae ne fakasino atu eiloa ki te Pusa a te Atua tonu telā ko oti ne puke mo te mea ne tupu ki te tamana o tena avaga mo tena avaga.+ 22 Ne fai atu a ia: “A te ‵malu ko ave kea‵tea mai Isalaelu me ko oti ne ave fakapagota, me i te Pusa a te Atua tonu ko oti ne puke.”+