Te Muamua Samuelu

8 I te taimi ko toeaina ei Samuelu, ne faka‵sopo aka ne ia ana tama tāgata ke fai mo famasino o Isalaelu. 2 A te igoa o tena toekimua ko Ioelu, kae ko te igoa o tena tama i te tokolua ko Avia.+ Ne fai eiloa lāua mo famasino i Pelesepa. 3 Kae ko ana tama tāgata ne seki tau‵tali i ana auala; ne ma‵nako eiloa lāua ke maua a tupe fakaopoopo i se auala faitogafiti;+ ne talia ne lāua a tupe fakakolekole,+ kae fai a fakamasinoga i se auala sē tonu.+

4 Fakamuli ifo, ne maopoopo fakatasi a toeaina katoa o Isalaelu kae o‵mai ki a Samuelu i Lama. 5 Ne fai atu latou ki a ia: “Kiloke! A koe ko toeaina, kae ko au tama tāgata e se tau‵tali i ou auala. Nei la, ke fakasopo aka se tupu mō matou ke fakamasino ne ia matou e pelā eiloa mo nisi fenua katoa.”+ 6 Kae ne seki fiafia* a Samuelu i te lotou faimaiga: “Tuku mai se tupu ke fakamasino ne ia matou.” Tenā ne ‵talo atu ei a Samuelu ki a Ieova, 7 kae ne fai atu a Ieova ki a Samuelu: “Fakalogo ki pati katoa e fai atu ne tino ki a koe; me e se ‵teke atu latou ki a koe, kae e ‵teke mai eiloa latou ki a au e pelā me ko te lotou tupu.+ 8 E fai eiloa ne latou a mea kolā ne fai ne latou talu mai te aso ne aumai ei ne au latou kea‵tea mai Aikupito ke oko mai ki te aso nei; ne tiaki faeloa ne latou au+ kae tavini atu ki nisi atua,+ kae tenā foki te mea ko fai ne latou ki a koe. 9 Nei la, fakalogo ki a latou. Kae e ‵tau o fakailoa faka‵lei atu ne koe a ikuga ka maua ne latou; fai atu ki a latou a mea ka manako ki ei te tupu telā ka pule ki a latou.”

10 Tenā ne fai atu ei ne Samuelu a pati katoa a Ieova ki tino kolā ne fakamolemole atu ki a ia ke maua se lotou tupu. 11 Ana muna: “Konei a mea ka manako ki ei te tupu telā ka pule ki a koutou:+ Ka puke ne ia otou tama tāgata+ kae tuku atu ki luga i ana kaliota+ kae fai latou e pelā me ne ana tāgata faka‵tele solofanua,+ kae ko nisi ka ‵tele i mua o ana kaliota. 12 Kae ka faka‵sopo aka ne ia mō ia eiloa a takitaki o taki tokoafe+ mo takitaki o taki toko limasefulu,+ kae ko nisi tino ka fakamalū ana laukele,+ ‵kati ana fatoaga,+ kae faite ana meatau mo mea o ana kaliota.+ 13 Ka puke ne ia otou tama fāfine ke fai mo tino fai sinu,* tino kūka, mo tino fai falaoa.+ 14 Ka puke ne ia otou fatoaga tafasili i te ‵lei, otou togavine, mo otou togaolive+ kae ka tuku atu ne ia ki ana tavini. 15 Ka puke ne ia te tasi-vae-sefulu o otou togasaito mo otou togavine, kae tuku atu ne ia ki ana ofisa mo ana tavini. 16 Kae ka puke ne ia otou tavini tāgata mo tavini fāfine, otou lafu manu tafasili i te ‵lei, mo otou asini kae fakaaoga ne ia mo fai ana galuega.+ 17 Ka puke ne ia te tasi-vae-sefulu o otou lafu mamoe,+ kae ka fai koutou mo ana tavini. 18 Ka oko mai te aso ka ‵tagi ei koutou ona ko te otou tupu ne filifili ne koutou,+ kae ka se tali mai eiloa a Ieova ki a koutou i te aso tenā.”

19 Kae ne ita a tino ma faka‵logo ki pati ne fai atu ne Samuelu, kae ne fai atu latou: “Ikai, matou e ma‵nako eiloa ke pule mai se tupu. 20 Tenā ko ‵pau ei matou mo nisi atufenua, kae ka fakamasino matou ne te motou tupu kae takitaki ne ia matou kae taua foki i omotou taua.” 21 I te lagonaga ne Samuelu a pati katoa a tino, ne toe fai atu ne ia a pati konā ke lagona ne Ieova. 22 Ne fai atu a Ieova ki a Samuelu: “Fakalogo ki a latou, kae fakasopo aka se tupu ke pule ki a latou.”+ Tenā ne fai atu ei a Samuelu ki tāgata Isalaelu: “E ‵tau mo koutou taki tokotasi o toe ‵foki ki otou fakai.”