3 Kae koi kai* a ia i te fale o Simona te lepela i Petania, ne fanatu se fafine mo se fagu* sinu manogi ne faite mai te tinā nato, kae ‵togi ‵mafa ‵ki. Ne ‵tala ne ia te fagu sinu kae kamata o ‵ligi atu ki luga i te ulu o Iesu.+ 4 Ona ko te mea tenei ne fai aka a nisi tino o latou mo te sē fia‵fia: “Kaia ne fakamāumāu ei te sinu manogi tenei? 5 Me ne mafai o fakatau atu a te sinu manogi tenei ki tupe e silia atu i te 300 tenali,* ko tuku atu ei a tupe ki tino ma‵tiva!” Kae ne kaitāua malosi latou ki* tou fafine. 6 Kae ne fai atu a Iesu: “Tuku malie ei a ia. Kaia e taumafai ei koutou o fakalavelave atu ki te fafine tenei? Ne fai ne ia se mea ‵lei ki a au.+ 7 Me e ‵nofo faeloa koutou mo tino ma‵tiva,+ kae mafai o fai ne koutou a mea ‵lei ki a latou i so se taimi e ma‵nako koutou ki ei, kae ko au e se ‵nofo faeloa mo koutou.+ 8 Ko fai ne ia a te mea e mafai ne ia o fai. Ne ‵ligi ne ia a te sinu manogi ki toku foitino kae koi tuai au o tanu.+ 9 Au e fai ‵tonu atu ki a koutou, i so se koga o te lalolagi e talai atu ei te tala ‵lei tenei,+ ka fakamatala atu foki i ei a te mea ne fai ne te fafine tenei e pelā me se fakamasauaga ki a ia.”+

12 E ono aso mai mua o te Paseka kae oko atu a Iesu ki Petania, te koga ne nofo i ei a Lasalo+ telā ne fakatu aka ne Iesu mai te mate. 2 Tenā ne fai ei ne latou se ‵kaiga mō Iesu i te afiafi tenā, kae ne laulau ne Maleta a meakai,+ kae ko Lasalo se tokotasi o tino kolā ne ‵kai* fakatasi mo ia. 3 Ne puke ne Malia se pauna* o te sinu manogi ne faite mai te tinā nato, e ‵togi ‵mafa ‵ki, kae ‵ligi ne ia ki vae o Iesu, kae ‵solo ana vae ki ana laulu. Ne pusaki atu te manogi o te sinu tenā ki te fale kātoa.+ 4 Kae ko Iuta te Isikaliota,+ se tokotasi o ana soko, telā ko pili o fakatogafiti ne ia a Iesu, ne fai atu penei: 5 “Kaia e se fakatau atu ei a te sinu manogi tenei ki se 300 tenali* kae tuku atu ki tino ma‵tiva?” 6 Ne seki fai atu ne ia a pati konei ona ko tena manavase ki tino ma‵tiva, kae ona ko ia se tino kaisoa kae ne nofo mo te pokisi tupe, ne kaisoa sāle ne ia a tupe kolā e lafo atu ki ei. 7 Ne fai atu a Iesu: “Tuku malie ei a ia, ko te mea ke fai ne ia te fakamanatuga tenei mō te aso e tanu ei au.+ 8 Me e ‵nofo faeloa koutou mo tino ma‵tiva,+ kae ko au e se ‵nofo faeloa mo koutou.”+