Numela

32 E uke ‵ki a lafu manu a tama tāgata a Leupena+ mo tama tāgata a Kato,+ kae ne lavea ne latou i laukele o Iaseli mo Kileata+ se kogā fenua ‵lei mō olotou lafu manu. 2 Ne olo atu a tama tāgata a Kato mo tama tāgata a Leupena ki a Mose, Eleasalo te faitaulaga, mo takitaki o te fakapotopotoga kae fai atu: 3 “Atalota, Tipono, Iaseli, Nimala, Hesepono,+ Eleale, Sipama, Nepo+ mo Peono,+ 4 ko laukele kolā ne fakatakavale ne Ieova i mua o te fakapotopotoga o tino Isalaelu+ ne laukele ‵lei mō lafu manu, kae ko au tavini e uke ‵ki olotou lafu manu.”+ 5 Ne toe fai atu latou: “Kafai e lotoma‵lie koutou ki ei, tuku mai a laukele konei ki otou tavini ke fai ma latou. Sa fai ke olo atu matou ki te suā feitu o te Iolitana.”

6 Tenā ne fai atu ei a Mose ki tama tāgata a Kato mo tama tāgata a Leupena: “E a, e tuku otou taina ke olo ki te taua kae ko koutou e ‵nofo faeloa i te koga tenei? 7 Kaia e fai ei ne koutou ke loto vāi‵vai a tino Isalaelu ke se olo atu ki te fenua telā ko oti ne fai ne Ieova ke tuku atu ki a latou? 8 Tenā te mea ne fai ne otou tamana i te taimi ne uga ei ne au latou mai Katesa-panea ke olo o onoono i te fenua.+ 9 I te lotou ologa ki luga i te Vanu o Esekolo+ kae lavea ne latou te fenua, ne faka‵tuka atu latou ki tino Isalaelu ke se olo ki te fenua telā ka tuku atu ne Ieova ki a latou.+ 10 Ne kaitaua malosi a Ieova i te aso tenā kae tauto atu:+ 11 ‘A tāgata kolā ne o‵mai ki tua mo Aikupito mai te 20 tausaga o fano ki luga ka se lavea ne latou a te fenua+ ne tauto au ke tuku atu ki a Apelaamo, Isaako mo Iakopo,+ me ne seki tau‵tali mai latou i a au mo olotou loto kātoa​— 12 kae na ko Kalepo+ te tama tagata a Iefune te tino Kinasa mo Iosua+ te tama tagata a Nuno, me ne tau‵tali lāua i a Ieova mo lā loto kātoa.’+ 13 Tenā ne kaitaua malosi ei a Ieova ki tino Isalaelu kae ne fai ne ia ke takasē‵se latou i loto i te koga lavaki i tausaga e 40,+ ke oko ki te taimi ne palele atu ei te kautama kātoa kolā ne fai ne latou a mea ma‵sei i mua o Ieova.+ 14 Kae nei ko ‵tu mai foki koutou i te tulaga ne ‵tu ei otou tamana e pelā me se fanau a tāgata agasala kolā e fai ne latou ke kaitaua malosi a Ieova ki tino Isalaelu. 15 Kafai e ‵fuli kea‵tea koutou kae e se tau‵tali atu i a ia, ka tiakina eiloa ne ia a tino i te koga lavaki, kae ka aumai ne koutou te fakamaseiga ki tino katoa.”

16 Fakamuli ifo, ne olo atu latou ki a ia kae fai atu: “Talia mai ke faite ne matou i konei ne lulu fatu mō motou lafu manu mo fakai mō motou tama‵liki. 17 Kae ka toka faeloa matou mō te taua+ kae olo atu i mua o tino Isalaelu ke oko ki te taimi e avatu ei ne matou latou ki te lotou koga ‵nofo, kae ko omotou tama‵liki ka ‵nofo eiloa i fakai e puipui faka‵lei kae maua ne latou te puipuiga mai tino o te fenua. 18 Ka se ‵foki eiloa matou ki omotou fale ke oko ki te taimi e maua ei ne tino Isalaelu taki tokotasi olotou laukele kolā ka fai pelā me ne tofi o latou.+ 19 Me ka se maua ne matou te motou tofi fakatasi mo latou i te suā feitu o te Iolitana mo laukele e ‵mao atu i ei, me ko oti ne maua ne matou te motou tofi i te feitu ki saegala o te Iolitana.”+

20 Ne tali atu a Mose ki a latou: “Kafai e fai ne koutou a te mea tenei: Fakatoka otou meatau mō te taua i mua o Ieova;+ 21 kae kafai e fakatoka ne koutou katoa otou meatau kae olo atu i mua o Ieova ki te suā feitu o te Iolitana i te taimi e afuli kea‵tea ei ne ia ana fili mai i ana mua+ 22 ke oko ki te taimi e fakatakavale ei te fenua i mua o Ieova,+ ka oti ko mafai ei ne koutou o ‵foki+ kae ko saoloto koutou mai te agasala i mua o Ieova mo tino Isalaelu. Tenā ko fai ei te laukele tenei mō koutou i mua o Ieova.+ 23 Kae kafai e se fai ne koutou a te mea tenei, ka agasala koutou i mua o Ieova. Kafai e penā loa, ke iloa la ne koutou me ka fakasala eiloa koutou ona ko te otou agasala. 24 Tenā la, ka mafai ei o faite ne koutou a fakai mō otou tama‵liki mo lulu mō otou lafu manu,+ kae e ‵tau mo koutou o fai a te mea ko oti ne tauto mai koutou ki ei.”

25 Ne fai atu ne tama tāgata a Kato mo tama tāgata a Leupena a pati konei ki a Mose: “Ka fai eiloa ne au tavini a mea ne fakatonu mai ne toku aliki. 26 A omotou tama‵liki, mo omotou avaga, mo omotou lafu manu mo omotou manu fagai katoa ka ‵nofo i konā i fakai o Kileata,+ 27 kae ko au tavini ka olo atu ki te suā feitu, ko tāgata katoa kolā ne fakatoka ki te taua ke taua atu i mua o Ieova,+ e ‵tusa eiloa mo pati a toku aliki.”

28 Tenā ne fai atu ei ne Mose se fakatonuga e uiga mō latou ki a Eleasalo te faitaulaga, Iosua te tama tagata a Nuno, mo ulu o matakāiga o Isalaelu i olotou tamana. 29 Ne fai atu a Mose ki a latou: “Kafai a tama tāgata a Kato mo tama tāgata a Leupena e olo fakatasi mo koutou ki te suā feitu o te Iolitana, ko tāgata katoa kolā ko toka mō te taua i mua o Ieova, kae fakatakavale atu te fenua i mua o koutou, tenā ko tuku atu ei ne koutou te fenua o Kileata ke fai mō latou.+ 30 Kae kafai e se fakatoka olotou meatau kae e se olo fakatasi atu foki mo koutou ki te suā feitu, tenā ka ‵nofo ei latou mo koutou i te fenua o Kanana.”

31 Kae ne tali atu a tama tāgata a Kato mo tama tāgata a Leupena: “A pati katoa ne fai atu ne Ieova ki au tavini ka fai eiloa ne matou. 32 Ka fakatoka eiloa a omotou meatau kae olo atu ki te suā feitu i mua o Ieova ki te fenua o Kanana,+ kae ko mea kolā ka fai mo omotou tofi ka maua eiloa i te feitu tenei o te Iolitana.” 33 Tenā ne tuku atu ei ne Mose ki a latou​—ki tama tāgata a Kato, tama tāgata a Leupena,+ mo te āfa o te matakāiga o Manase+ te tama tagata a Iosefa​—te fenua o Sekono,+ te tupu o tino Amoli, mo te fenua o Oko,+ te tupu o Pasana, ko laukele i fakai konā mo kogā fenua i ei, mo fakai ‵lasi i fenua i olotou tafa.

34 Ne faite* ne tama tāgata a Kato a Tipono,+ Atalota,+ Aloela,+ 35 Atalota-sofana, Iaseli,+ Iokopea,+ 36 Petanimala+ mo Peta-halana+ ne fakai e puipui faka‵lei, kae ne faite ne latou a lulu fatu mō olotou lafu manu. 37 Kae ko tama tāgata a Leupena ne faite ne latou a Hesepono,+ Eleale,+ Kiliataima,+ 38 Nepo+ mo Palameono+​—ne ‵fuli a igoa konā​—mo Sipama; kae ne toe fakaigoa ne latou a igoa o fakai kolā ne faite faka‵lei ne latou.

39 A tama tāgata a Makila+ te tama tagata a Manase, ne olo o taua atu ki Kileata kae puke ne latou te koga tenā kae afuli kea‵tea a tino Amoli kolā ne ‵nofo i ei. 40 Ne tuku ne Mose a Kileata ki a Makila te tama tagata a Manase, kae ne kamata a ia o nofo i ei.+ 41 Kae ko Iaila te tama tagata a Manase ne fanatu o taua atu ki a latou kae ne puke ne ia olotou fakai fo‵liki i te koga tenā, kae kamata o fakaigoa ne ia ki a Havota-iaila.*+ 42 Kae ko Nopaa ne fanatu o taua kae puke ne ia a Kenata mo ana fakai fo‵liki, kae fakaigoa ne ia ki tena igoa ko Nopaa.