Esoto

2 I te taimi tenā, ne avaga se tagata mai te kāiga o Levi ki se tamaliki fafine a Levi.+ 2 Ne faitama te fafine tenā kae fanau mai ne ia se tamaliki tagata. I te laveaga ne ia te tinogali o te tamaliki tenā, ‵funa ei ne ia i loto i se tolu masina.+ 3 I te taimi ne seki toe mafai ei ne ia o ‵funa te tamaliki,+ ne puke mai ne ia se ato kome* kae pēni ki te kolotā, tuku te tamaliki ki loto i ei, kae ave ke tapeapea i va o mouku ‵loa i te kaugutu o te vaitafe ko te Naila. 4 Kae ko tena tuagane+ ne tu i se koga tai ‵mao o onoono me se a te mea e mafai o tupu ki te tamaliki tenā.

5 I te taimi ne fanatu ei te tama fafine a te Falao o koukou i te vaitafe ko te Naila, ne sa‵sale atu ana tavini fāfine i te kaugutu o te Naila. Kae ne matea ne ia te ato i va o mouku ‵loa. Ne uga fakavave atu ne ia tena pologa fafine ke puke mai te ato.+ 6 I te ‵talaga ne ia te ato, matea ei ne ia te tamaliki tagata e tagi. Ne alofa malosi a ia ki ei kae ne fai atu a ia: “A te tamaliki tenei se tamaliki a se tino Epelu.” 7 Tenā ne fai atu ei tena tuagane ki te tama fafine a te Falao: “E fano au o puke mai se fafine mai tino Epelu ke tausi ne ia te tamaliki tenei ma koe?” 8 Muna a te tama fafine a te Falao ki tou fafine: “Fano la!” Fano fakavave ei a te tamaliki fafine o puke mai te mātua o te tamaliki tenā.+ 9 Muna a te tama fafine a te Falao ki te fafine: “Puke a te tamaliki tenei kae tausi ne koe ma aku, kae ka ‵togi ne au a koe.” Ne puke ne te fafine tenā a te tamaliki kae tausi ne ia. 10 I te taimi ko matua ei te tamaliki, ne avatu ne te fafine a ia ki te tama fafine a te Falao, kae ne fai a ia mo fai tena tama.+ Ne fakaigoa ne ia a te tamaliki ki a Mose* kae fai atu: “Ona ko te mea ne aumai ne au a ia ki tua mai te vai.”+

11 I aso konā, i te taimi ko matua* ei a Mose, ne fanatu a ia o onoono ki galuega ‵mafa+ e fai ne ana taina, kae ne matea ne ia se tino Aikupito e ta ne ia se tino Epelu, se tokotasi o ana taina. 12 Ne kilokilo a ia ki ana feitu katoa kae e se matea ne ia se tino, tamate ei ne ia te tino Aikupito kae tanu atu ki one.+

13 Kae ne toe fanatu a ia i te suā aso kae matea ne ia a tāgata Epelu e tokolua e taua. Ne fai atu a ia ki te tino telā e ‵se: “Kaia e ta ei ne koe tou taina?”+ 14 Muna a te tagata tenā: “Ko oi ne ‵tofi ne ia koe mo fai se pelenise mo se famasino ki luga i a māua? E a, ka tamate foki ne koe au e pelā mo te tamatega ne koe a te tino Aikupito?”+ Ne mataku a Mose kae fai aka: “Ko salalau valevale a te tala tenei!”

15 Tenā ne logo ei a te Falao i te mea tenei, kae ne taumafai a ia o tamate a Mose. Ne sola kea‵tea a Mose mai te Falao kae fanatu o nofo i te fenua ko Mitiana,+ kae ne sagasaga ifo a ia i tafa o se vaikeli. 16 E tokofitu a tama fāfine a te faitaulaga o Mitiana,+ kae ne o‵mai latou o asu vai kae faka‵fonu a tali fainu manu ke inu a te lafu manu a te lotou tamana. 17 Kae pelā mo te masani, ne o‵mai a tausi mamoe kae afuli atu latou kea‵tea. Ne tu aka a Mose ki luga kae fesoasoani atu ki fāfine konā ke fainu olotou lafu manu. 18 I te lotou ‵fokiatuga ki te fale, ne fai atu te lotou tamana ko Leuelu:*+ “Kaia ko ‵foki vave mai ei koutou i te aso nei?” 19 Ne tali atu latou: “Ne faka‵sao matou ne se tino Aikupito+ mai tausi mamoe kae ne asu mai foki ne ia omotou vai kae fainu a te lafu manu.” 20 Ne fai atu a ia ki ana tama fāfine: “Kae tefea la a ia? Kaia ne tiaki ei ne koutou a te tagata tenā? Kalaga ki ei ke vau, ko te mea ke ‵kai tatou.” 21 Mai tua ifo i ei, ne talia ne Mose ke nofo a ia i te tagata tenā, kae ne tuku atu ne te tagata tenā a tena tama fafine ko Sepola+ ke avaga mo Mose. 22 Fakamuli loa, ne fanau ne tou fafine se tamaliki tagata kae ne fakaigoa ne Mose ki a Kelesoma,+ me ne fai mai a ia: “Ko fai au e pelā me se tino fakaa‵tea i se fenua fakaa‵tea.”+

23 Mai tua o se taimi leva,* ne mate te tupu o Aikupito,+ kae ne ‵tagi fi‵ta faeloa a tino Isalaelu ona ko te lotou ‵nofo pologa kae ne fameo faeloa latou, kae ko te lotou ‵tagi mō se fesoasoani ne fanaka faeloa ki luga i te Atua tonu ona ko te lotou ‵nofo pologa.+ 24 Fakamuli loa, kae lagona ne te Atua te lotou ‵tagi fi‵ta+ kae ne masaua foki ne te Atua tena feagaiga ne fai ki a Apelaamo, Isaako mo Iakopo.+ 25 Ne kilo atu a te Atua ki tino Isalaelu; kae ne saga atu a ia ki a latou.