Numela

22 Tenā ne olo ei a tino Isalaelu kae ‵nofo atu i te kogā koga laugatasi o Moapi i te suā feitu o te Iolitana mai i Ieliko.+ 2 Kae ko Palako+ te tama tagata a Sipola ne lavea ne ia a mea katoa ne fai ne tino Isalaelu ki tino Amoli, 3 kae ne ma‵taku malosi a tino Moapi i tino konā ona ko te tokouke o latou; e tonu, ne ‵pikimakau eiloa a tino Moapi ona ko te ma‵taku i tino Isalaelu.+ 4 Ne fai atu a tino Moapi ki toeaina o Mitiana:+ “A te fakapotopotoga tenei ka ‵fao ne ia a laukele katoa i ‵tou tafa e pelā eiloa me se pulumakau tagata e folo ne ia a mouku i se malae.”

A Palako te tama tagata a Sipola ko te tupu o Moapi i te taimi tenā. 5 Ne uga atu ne ia a avefekau ki a Palaamo te tama tagata a Piolo i Petolo,+ telā e tu i tafa o te Vaitafe* i tena fenua. Ne fai atu a ia: “Kiloke! E isi ne tino konei ne o‵mai mai Aikupito. Kiloke! Ko oti ne faka‵fonu ne latou a te lalolagi kātoa,+ kae konei e ‵nofo mai fua i oku mua. 6 Fakamolemole vau o fetū aka a tino konei,+ me e ma‵losi atu latou i a au. E se taumate ka mafai ne au o fakatakavale latou kae afuli kea‵tea mai te fenua, me e iloa ‵lei ne au i te tino e fakamanuia ne koe e manuia eiloa, kae ko te tino e fakamalaia ne koe e malaia eiloa.”

7 Tenā ne faima‵laga atu ei a toeaina o Moapi mo toeaina o Mitiana mo te ‵togi o pati fetū i olotou lima kae olo atu ki a Palaamo+ o fakaoko atu te fekau a Palako ki ei. 8 Kae ne fai atu a ia ki a latou: “‵Moe i konei i te po nei, kae ka fakailoa atu ne au ki a koutou so se pati e fai mai ne Ieova ki a au.” Ne ‵nofo ei a pelenise o Moapi i a Palaamo.

9 Tenā ne fanatu ei a te Atua ki a Palaamo kae fai atu:+ “Ko oi a tāgata konei e ‵nofo mo koe?” 10 Ne fai atu a Palaamo ki te Atua tonu: “Ko Palako te tama tagata a Sipola, te tupu o Moapi, ne uga mai tena fekau ki a au, ana muna, 11 ‘Kiloke! A tino kolā ne o‵mai mai Aikupito ko faka‵fonu ne latou te lalolagi. Vau o fetū aka ne koe a latou mō oku.+ E se taumate ka mafai ne au o taua atu ki a latou kae afuli latou kea‵tea.’” 12 Kae ne fai atu a te Atua ki a Palaamo: “E se ‵tau mo koe o fano i a latou. E se ‵tau mo koe o fetū a tino konā, me ko oti ne fakamanuiagina latou.”+

13 Ne tu aka Palaamo i te tafataeao kae fai atu ki pelenise a Palako: “Olo ki te otou fenua me e se talia ne Ieova ke fanatu au i a koutou.” 14 Ne olo a pelenise o Moapi kae toe ‵foki atu ki a Palako kae fai atu: “A Palaamo e ita ma vau i a matou.”

15 Kae ne toe uga atu ne Palako a nisi pelenise e tokouke atu kae fakaaloalogina malosi atu i lō te potukau muamua. 16 Ne olo atu latou ki a Palaamo kae fai atu ki ei: “Konei a pati a Palako te tama tagata a Sipola ne fai mai, ‘Fakamolemole ke seai se mea e taofi ne ia koe mai tou vau ki a au, 17 me ka fakaaloalo malosi ne au a koe, kae ka fai ne au so se mea e fai mai koe ke fai. Tela la, fakamolemole vau aka o fetū ne koe a tino konei.’” 18 Kae ne tali atu a Palaamo ki tavini a Palako: “Kafai ne tuku mai ne Palako ki a au a tena fale e ‵fonu i siliva mo aulo, ka se mafai lele eiloa o fai ne au se mea telā e sili atu i te fakatonuga a Ieova toku Atua, faitalia me se mea foliki fua io me se mea lasi.+ 19 Kae fakamolemole, ‵nofo i konei i te po nei, ko te mea ke iloa aka ne au me ne a nisi pati a Ieova ka fai mai ki a au.”+

20 Tenā ne vau ei a te Atua ki a Palaamo i te po kae fai atu ki ei: “Kafai a tāgata konei ne o‵mai o ‵kami koe, olo la mo latou. Kae e ‵tau fua o faipati atu ne koe a pati kolā e fai atu ne au.”+ 21 Ne tu aka a Palaamo i te tafataeao, fakatoka tena asini* kae olo fakatasi mo pelenise o Moapi.+

22 Ne kaitaua malosi a te Atua i a Palaamo ne fano, kae ne tu atu se agelu a Ieova i te auala o ‵teke a ia. A Palaamo ne tele i luga i tena asini, kae ne olo fakatasi atu a ia mo ana tavini e tokolua. 23 Kae i te taimi ne lavea ei ne te asini a te agelu a Ieova e tu i te auala mo te pelu i tena lima, ne taumafai a ia o fano ki tua mo te auala o fanatu ki te vao. Kae ne kamata o ‵kini ne Palaamo te asini ke toe foki atu ki te auala. 24 Tenā ne tu atu ei a te agelu a Ieova i se tamā auala lauliki i te va o togavine e lua, fakatasi mo ‵pui fatu i te avā feitu. 25 I te taimi ne lavea ei ne te asini a te agelu a Ieova, ne faī atu a ia ki luga i te ‵pui kae ne i‵tia ei te vae o Palaamo i te ‵pui, kae ne toe ‵kini atu ne ia a te asini.

26 Ne toe fanatu te agelu a Ieova o tu i se koga lauliki telā ko seai eiloa se avanoaga ke ‵fuli atu ki te feitu fakaatamai io me ki te feitu fakamaui. 27 I te laveaga ne te asini a te agelu a Ieova, ne takato ifo ei a ia mai lalo o Palaamo, kae ne kaitaua malosi a Palaamo kae ‵kini faeloa ne ia a te asini ki tena tokotoko. 28 Fakamuli loa, kae fai ne Ieova ke faipati* te asini+ kae ne fai atu ki a Palaamo: “Ne a aku mea ne fai ki a koe ke ‵kini fakatolu ne koe au?”+ 29 Ne tali atu a Palaamo ki te asini: “Me ko oti ne fai ne koe au e pelā me se tino valea. Moi ne isi se pelu i toku lima ko tamate ne au a koe!” 30 Ne fai atu te asini ki a Palaamo: “E a, au e se ko tau asini telā ne tele sāle koe i ei i tou olaga kātoa ke oko mai eiloa ki te aso nei? Kai fai aka eiloa ne au se mea penei ki a koe i aso mua?” Ne tali atu tou tagata: “Ikai!” 31 Tenā ne fai ei ne Ieova ke ‵pula a mata o Palaamo,+ kae ne lavea ne ia te agelu a Ieova e tu i te auala mo te pelu e puke i tena lima. I konā eiloa, ne totuli a ia kae ifo ki lalo.

32 Tenā ne fai atu ei te agelu a Ieova ki tou tagata: “Kaia ne ‵kini fakatolu ei ne koe tau asini? Kiloke! Au ne vau o ‵pono koe, me i tou auala e se fetaui mo te mea e loto au ki ei.+ 33 Ne lavea au ne te asini kae taumafai o fakaseke fakatolu ne ia au.+ Moi ne seki fakaseke a ia mai i a au, penei ko oti ne tamate ne au a koe kae tuku ke ola te asini.” 34 Muna a Palaamo ki te agelu a Ieova: “Au ko agasala, me e seki iloa ne au me ko koe telā e tu mai i te auala o fakafetaui mai ki a au. Kae nei la, kafai e masei a te mea tenei i tau kilokiloga, au ka foki.” 35 Kae ne fai atu a te agelu a Ieova ki a Palaamo: “Olo mo tāgata konā, kae e ‵tau fua o faipati atu ne koe a pati kolā e fai atu ne au.” Tenā ne olo ei a Palaamo fakatasi mo pelenise a Palako.

36 I te logoga a Palako i a Palaamo ko vau, ne fanatu fakavave a ia o fakafetaui atu ki ei i te fakai o Moapi, telā e tu i kaugutu o te vanu o Alinona i te tuakoi o te fenua. 37 Muna a Palako ki a Palaamo: “E a, e seai saku fekau ne uga atu ki a koe? Kaia ne seki vau ei koe? E a, e mafaufau koe me e se mafai ne au o fakaaloalo malosi a koe?”+ 38 Ne tali atu a Palaamo ki a Palako: “Tenei au ko vau ki a koe. Kae e a, e mafai ne au o fai so se pati? E mafai fua ne au o faipati atu a pati kolā e tuku mai ne te Atua ki toku gutu.”+

39 Ne olo a Palaamo mo Palako kae ne oko atu lāua ki Kiliata-husota. 40 Ne ofo atu ne Palako a pulumakau mo mamoe kae avatu a nisi mea ki a Palaamo mo pelenise kolā ne olo atu mo ia. 41 I te tafataeao ne puke ne Palako a Palaamo kae ave ne ia ki luga i Pamota-paala; mai konā ne mafai ne ia o lavea a tino katoa.+