Numela

21 I te taimi ne logo ei te tupu o Alata te tino Kanana,+ telā ne nofo i te Nekepi me i tino Isalaelu e olo atu i te auala o Atalima, ne taua atu a ia ki tino Isalaelu kae puke fakapagota ne ia a nisi tino i a latou. 2 Ne fai ne tino Isalaelu a te tautoga tenei ki a Ieova: “Kafai e tuku mai ne koe a tino konei ke fakatakavale ne matou, ka lepe eiloa ne matou olotou fakai.” 3 Ne fakalogo eiloa a Ieova ki te leo o tino Isalaelu kae tuku atu a tino Kanana ke fakatakavale ne latou, kae ne lepe ne latou olotou fakai kae ‵ta atu latou. Tela la, ne fakaigoa ne latou a te koga tenā ki a Holema.*+

4 I te lotou oloatuga mai te Mauga o Holo+ i te auala e tau atu ki te Tai Kula ko te mea ke olo atu latou i tafatafa o te fenua ko Etoma,+ ne kamata o fi‵ta a tino i te malaga. 5 Kae ne fai‵pati ‵teke atu faeloa a tino ki te Atua mo Mose,+ olotou muna: “Kaia ne aumai ei ne koe matou kea‵tea mai Aikupito ke ‵mate i te koga lavaki? E seai ne meakai kae seai ne vai,+ kae ko takalia‵lia matou i te falaoa masei tenei.”+ 6 Tenā ne uga mai ei ne Ieova a gata poisini ki tino, kae ne ū faeloa ne latou a tino, kae ne ‵mate ei a tino Isalaelu e tokouke.+

7 Ne o‵mai a tino ki a Mose kae fai atu: “Ko agasala matou i te motou fai‵pati ‵teke atu ki a Ieova e pelā foki mo koe.+ Ke na fakamolemole atu ki a Ieova ke ave kea‵tea ne ia a gata konei mai i a matou.” Kae ne fai eiloa ne Mose a te fakamolemole a tino konā.+ 8 Tenā ne fai atu ei a Ieova ki a Mose: “Faite se fakatusa o se gata poisini kae tuku ki luga i se pou. Kafai e isi se tino ne ū ne se gata, e ‵tau o kilo atu a ia ki te gata faite tenā ke ola a ia.” 9 Ne faite fakavave ne Mose se gata kopa+ kae tuku ki luga i te pou,+ kae i so se taimi e ū ei se tagata ne se gata poisini kae kilo aka a ia ki te gata kopa tenā, ko sao ei a ia.+

10 Mai tua i konā, ma‵laga atu ei a tino Isalaelu kae ‵nofo atu i Opoto.+ 11 Tenā ne tiaki ei ne latou a Opoto kae ‵nofo atu i Aiapalima,+ i te koga lavaki telā e fakafesagai atu ki Moapi, i te feitu ki te saegala. 12 Ne tiaki ne latou te koga tenā kae olo atu o ‵nofo i tafa o te Vanu o Seletai.+ 13 Ne toe tiaki ne latou te koga tenā kae olo atu o ‵nofo i te kogā koga o Alinona,+ telā e tu i te koga lavaki kae e oko atu eiloa ki te tuakoi o tino Amoli, me i te Alinona ko te tuakoi o Moapi, e tu i te va o Moapi mo tino Amoli. 14 Tenā te pogai e faipati ei te tusi o Taua a Ieova e uiga ki “Uaepa i Sufa mo vanu o Alinona, 15 mo te ‵sifoga o vanu, telā e oko atu eiloa ki te koga e tu ei a Alo kae soko atu ki te tuakoi o Moapi.”

16 Oti aka, olo atu ei latou ki Pia. Tenei te vaikeli ne fai atu ei a Ieova ki a Mose: “Fakamaopoopo mai a tino, kae ka tuku atu ne au a vai ki a latou.”

17 I te taimi tenā ne usu ei ne tino Isalaelu a te pese tenei:

“Te Vaikeli e, ‵puna mai!​—Tali* atu ki ei!

Tenā ne tiaki ei ne latou te koga lavaki kae olo atu ki Mataana, 19 mai Mataana ki Nalielu, kae mai Nalielu ki Pamota.+ 20 Ne olo atu latou mai Pamota ki te vanu telā e tu i loto i te kogā fenua o Moapi,+ mai luga o Peseka,+ telā e mafai o lavea atu ne latou i ei a Iesimoni.*+

21 Ne uga atu ne tino Isalaelu a avefekau ki a Sekono te tupu o tino Amoli, kae fai atu:+ 22 “Talia mai ke olo atu matou i loto i tou fenua. Ka se ui atu matou i loto i se fatoaga io me se togavine. Ka se inu foki matou ki vai mai so se vaikeli. Ka sa‵sale atu matou i te Auala o te Tupu ke oko loa ki te taimi e ‵to ei matou ki tua mo te otou fenua.”+ 23 Kae ne seki talia ne Sekono a tino Isalaelu ke ui atu i loto i tena kogā fenua. Kae ne fakamaopoopo mai ne Sekono ana tino katoa kae olo atu o taua ki tino Isalaelu i te koga lavaki kae ne oko atu latou ki Iasa kae kamata o taua atu ki tino Isalaelu.+ 24 Kae ne fakatakavale ne tino Isalaelu a ia ki te pelu+ kae puke mo latou a tena fenua+ mai i te Alinona+ ke oko eiloa ki Iapoka,+ i tafa o tino Amoni, me i a Iaseli+ ko te tuakoi o te kogā fenua o tino Amoni.+

25 Ne puke ne tino Isalaelu a fakai katoa konei, kae ne kamata o ‵nofo latou i fakai katoa o tino Amoli,+ i Hesepono mo ana fakai fo‵liki katoa. 26 Me i a Hesepono ko te fakai o Sekono, te tupu o tino Amoli, telā ne taua mo te tupu o Moapi kae ne puke ne ia ana laukele katoa ke oko atu eiloa ki te Alinona. 27 Tenā te mea ne sae aka ei te tugapati fakaitaita penei:

“Vau ki Hesepono.

Ke faite aka te fakai o Sekono ke ‵mautakitaki.

28 Me ne tō mai te afi mai Hesepono, se ulaga afi mai te fakai o Sekono.

Ne ‵sunu i ei a Alo i Moapi, ko aliki o koga ma‵luga o te Alinona.

29 Kalofa eiloa i a koe e Moapi! A koe ka fakaseai, koutou e tino Kemoso!+

E fai ne ia ana tama tāgata ke ‵sola kea‵tea kae ko ana tama fāfine ke puke fakapagota ne Sekono, te tupu o tino Amoli.

31 Ne kamata a tino Isalaelu o ‵nofo i te fenua o tino Amoli. 32 Tenā ne uga atu ei ne Mose a nisi tāgata ke olo o iloilo a Iaseli.+ Ne puke ne latou ana fakai fo‵liki kae afuli kea‵tea a tino Amoli kolā ne ‵nofo i ei. 33 Mai tua i konā, ne ‵fuli atu latou kae olo aka i te auala ki Pasana. Kae ko Oko+ te tupu o Pasana, ne o‵mai ki tua mo ana tino katoa o taua ki a latou i Etelei.+ 34 Muna a Ieova ki a Mose: “Sa mataku i a ia,+ me ka tuku atu ne au a ia mo ana tino katoa mo tena fenua ki ou lima,+ kae ka fai eiloa ne koe ki a ia a te mea telā ne fai ne koe ki a Sekono te tupu o tino Amoli, telā ne nofo i Hesepono.”+ 35 Ne ‵ta faeloa ne latou a ia, fakatasi mo ana tama tāgata mo ana tino katoa, ke oko ki te taimi ko seai ei sena tino ne sao,+ kae ne puke mo latou tena fenua.+