Esoto

35 Fakamuli ifo, ne fakamaopoopo mai ne Mose a te fakapotopotoga kātoa o tino Isalaelu katoa kae fai atu ki a latou: “Konei a mea ne fakatonu mai a Ieova ke fai:+ 2 E mafai o fai a galuega i aso e ono, kae ko te fitu o aso ka fai pelā me se aso tapu ki a koutou, ko te sapati, se aso malōlō ki a Ieova.+ So se tino e fai galuega i te aso tenā e ‵tau o tamate.+ 3 E se ‵tau mo koutou o faka‵ka se afi i so se koga e ‵nofo ei koutou i te aso o te Sapati.”

4 Ne toe fai atu a Mose ki te fakapotopotoga kātoa o tino Isalaelu: “Tenei te fakatonuga mai i a Ieova, 5 ‘Fai ne otou meaalofa ki a Ieova.+ So se tino e loto fiafia+ o fai sena meaalofa ke avatu la tena meaalofa ki a Ieova: ne aulo, siliva, kopa, 6 filo lanu moana, vulu lanu violeta, filo lanu kula, laugatu lino ‵lei, fulufulu o kouti,+ 7 pa‵kili o mamoe ne vali ke kula, pa‵kili o takesa,* lakau ko te akasia, 8 sinu mō faka‵ka a moli, sinu pasama mo fai a te sinu mo faū a tino mo mea manogi ‵gali,+ 9 fatu ko te onika, mo nisi fatu tāua ke faka‵mau ki te efota+ mo te ufi fatafata.+

10 “‘A tino apo*+ katoa i a koutou e ‵tau o ‵mai o faite a mea katoa ne fakatonu mai ne Ieova, 11 ko te faleie tapu mo ana ufi, ana pine mo ana felemi laupapa, ana lakau faka‵lava, ana pou mo ana lagolago; 12 te Pusa+ mo ana amo,+ te ‵pono,+ mo te ‵pui laugatu+ e ‵pui i ei; 13 te taipola+ mo ana amo mo ana meāfale katoa mo te falaoa+ ne ofo atu ki te Atua; 14 te tugamoli+ mo fakamaina mo ana meāfale katoa mo ana moli mo te sinu mo faka‵ka a moli;+ 15 te fatafaitaulaga o mea ma‵nogi+ mo ana amo; te sinu mo faū a tino mo mea ma‵nogi;+ te ‵pui laugatu mō te mataloa o te faleie tapu; 16 te fatafaitaulaga o taulaga ‵sunu+ mo tena mea valavala kopa, ana amo mo ana meāfale katoa, te pesini mo tena tulaga;+ 17 ko ‵pui laugatu o te koga ateatea kolā e tau‵tau ki lalo,+ ana pou mo ana lagolago, te ‵pui laugatu o te mataloa ki te koga ateatea; 18 ko pine o te faleie tapu mo pine o te koga ateatea mo olotou uka;+ 19 ko gatu kolā ne ‵laga faka‵lei+ mō te taviniga i te koga tapuaki; ko gatu tapu mō te faitaulaga ko Alona,+ mo gatu o ana tama tāgata kolā e tavini atu e pelā me ne faitaulaga.’”

20 Tenā ne olo ei a te fakapotopotoga kātoa o tino Isalaelu mai i a Mose. 21 Kae ne o‵mai a tino katoa kolā ne loto fia‵fia+ mo tino katoa kolā ne lotoma‵lie o aumai olotou meaalofa mō Ieova ke fakaaoga i te faitega o te faleie o maopoopoga mo mea katoa kolā e fakaaoga i te taviniga, mo te faitega foki o gatu tapu. 22 Ne o‵mai faeloa latou, ko tāgata fakatasi mo fāfine, ne o‵mai eiloa mo te loto fia‵fia o tuku mai a pine fakagali‵gali, ligi, mama mo nisi mea fakagali‵gali tāua, e pelā foki mo mea kese‵kese e faite ki aulo. Ne avatu katoa ne latou olotou taulaga* aulo ki a Ieova.+ 23 A tino katoa kolā e isi ne olotou filo lanu moana, vulu lanu violeta, filo lanu kula, laugatu lino ‵lei, fulufulu o kouti, pa‵kili o mamoe ne vali ke kula, pa‵kili o takesa,* ne aumai katoa ne latou olotou mea konā. 24 A tino katoa kolā e isi ne olotou siliva mo kopa ne avatu katoa ne latou a mea konā e pelā me ne meaalofa ki a Ieova, kae ko latou katoa kolā e isi ne olotou lakau ko te akasia ne aumai ne latou mo faite a mea kolā e manakogina mō te galuega.

25 Ne mio ne fāfine apo+ katoa a filo ki olotou lima, kae aumai ne latou olotou mea konā ne mio: ko filo lanu moana, vulu lanu violeta, filo lanu kula, mo laugatu lino ‵lei. 26 Kae ko fāfine apo katoa kolā ne loto fia‵fia ne mio ne latou a fulufulu o kouti.

27 Ne aumai ne takitaki a fatu ko te onika mo nisi fatu tāua ke faka‵mau ki te efota mo te ufi fatafata,+ 28 mo te pasama mo te sinu mo faka‵ka a moli, te sinu mo faū+ a tino mo mea manogi ‵gali.+ 29 A tāgata mo fāfine katoa kolā ne loto fia‵fia ne aumai ne latou a mea mō fai te galuega telā ne fakatonu atu ne Ieova e auala i a Mose; ne aumai ne tino Isalaelu a mea konā e pelā me se taulaga o te lotomalie ki a Ieova.+

30 Tenā ne fai atu ei a Mose ki tino Isalaelu: “Kiloke, ko oti ne filifili ne Ieova a Pesaleli te tama tagata a Uli te tama tagata a Hulo mai te matakāiga o Iuta.+ 31 Ko oti ne faka‵fonu ne ia a tou tagata ki te agaga o te Atua, kae tuku atu ki a ia te poto, te malamalama mo te iloa i te faitega o vaegā mea kese‵kese katoa 32 te ‵lomiga o ata, te faitega o mea ki aulo, siliva mo kopa, 33 te ‵katiga mo te fakatokaga o fatu tāua, mo te faitega o mea ‵gali kese‵kese ki lakau. 34 Kae ko oti ne tuku ne ia ki a lāua mo Oliapo+ te tama tagata a Aisamako mai te matakāiga o Tanu a te atamai ke akoako a nisi tino. 35 Ko oti ne faka‵fonu ne ia a lāua ki te atamai+ ke fai a galuega katoa a te tufuga faite mea, se tino ‵sui mea fakagali‵gali, se tino ‵laga e fakaaoga ne ia a filo lanu moana, vulu lanu violeta, filo lanu kula, laugatu lino ‵lei, mo se tino ‵laga laugatu. Ka fai ne tāgata konei a vaegā galuega kese‵kese katoa mo te ‵lomiga o vaegā ata kese‵kese.