Te Muamua Samuelu
7 Tenā ne o‵mai ei a tāgata Kiliata-iealima o puke a te Pusa a Ieova o ave ki te fale o Apinatapu+ i luga i te mauga foliki, kae ne ‵tofi aka ne latou a tena tama tagata ko Eleasalo ke tausi ne ia te Pusa a Ieova.
2 I se taimi leva mai tua ifo i ei, i tausaga e 20, mai te aso ne oko atu ei te Pusa ki Kiliata-iealima, kae ko tino Isalaelu katoa ne kamata o ‵sala* ki a Ieova kae ‵fuli atu ki a ia.+ 3 Tenā ne fai atu ei a Samuelu ki tino Isalaelu katoa: “Kafai ko toe ‵foki koutou ki a Ieova mo otou loto kātoa,+ e ‵tau o tiaki ne koutou otou atua fakaa‵tea+ mo fakatusa o Asitate,+ kae ke tuku ‵tonu atu otou loto ki a Ieova kae tavini atu fua ki a ia,+ kae ka faka‵sao ne ia koutou mai lima o tino Filisitia.”+ 4 I konā ne tiaki ei ne tino Isalaelu a Paala mo fakatusa o Asitate kae tavini atu fua ki a Ieova.+
5 Tenā ne fai atu ei a Samuelu: “Fakamaopoopo mai a tino Isalaelu katoa i Mesepa,+ kae ka ‵talo atu au ki a Ieova mō koutou.”+ 6 Tenā ne maopoopo mai ei a latou katoa ki Mesepa, kae ne asu aka ne latou a vai kae ‵ligi atu i mua o Ieova kae fakaliki‵liki i te aso tenā.+ Ne fai aka latou: “Ko oti ne agasala matou ki a Ieova.”+ Kae ko Samuelu ne kamata o tavini atu e pelā me se famasino+ ki tino Isalaelu i Mesepa.
7 I te ‵logoga o tino Filisitia me i tino Isalaelu ne maopoopo i Mesepa, ne olo aka ei a aliki o tino Filisitia+ o taua atu ki tino Isalaelu. I te ‵logoga o tino Isalaelu i te mea tenei, ne ma‵taku valevale latou i tino Filisitia. 8 Tenā ne fai atu ei a tino Isalaelu ki a Samuelu: “Sa fakagata te kalaga atu faeloa ki a Ieova te ‵tou Atua ke fesoasoani mai ki a tatou+ kae ke faka‵sao tatou mai lima o tino Filisitia.” 9 Tenā ne puke ei ne Samuelu se tamā mamoe kae ofo atu ne ia e pelā me se taulaga ‵sunu kātoa+ ki a Ieova; kae ne kalaga atu a Samuelu ki a Ieova ke fesoasoani mai ki tino Isalaelu, kae ne tali mai eiloa a Ieova ki a ia.+ 10 I te taimi ne ofo atu ei ne Samuelu te taulaga ‵sunu, ne olo atu eiloa a tino Filisitia o taua atu ki tino Isalaelu. Ne fai ne Ieova ke ‵pa malosi a fa‵tili+ ki tino Filisitia i te aso tenā, kae ne fai ne Ia ke ‵numi valevale latou+ kae ne takavale ei latou i mua o Isalaelu.+ 11 I konā ne olo atu ei a tāgata Isalaelu mai Mesepa o afuli a tino Filisitia, kae ‵ta ne latou ke oko atu eiloa ki te feitu ki saute o Peteka. 12 Tenā ne puke ei ne Samuelu se fatu+ kae tuku i te va o Mesepa mo Iesana kae fakaigoa ne ia ki a Epenesa,* me ne fai mai a ia: “Ke oko mai ki te taimi nei a Ieova ne fesoasoani mai ki a tatou.”+ 13 Tenā ne taka‵vale ei a tino Filisitia, kae ne seki toe ‵foki mai eiloa latou ki kogā fenua o Isalaelu;+ kae ne fakasala faeloa ne Ieova a tino Filisitia i aso o Samuelu.+ 14 A fakai foki kolā ne puke ne tino Filisitia mai Isalaelu ne faka‵foki mai katoa ki Isalaelu, mai Ekelona ke oko atu ki Kata, kae ne toe maua ne tino Isalaelu olotou laukele mai lima o tino Filisitia.
Ne maua foki te filemu i te va o Isalaelu mo tino Amoli.+
15 Ne fai eiloa a Samuelu mo famasino o tino Isalaelu i aso katoa o tena olaga.+ 16 I tausaga takitasi e faimalaga faeloa a ia ki Peteli,+ Kilikala+ mo Mesepa,+ kae ne fai a ia mo famasino o Isalaelu i koga katoa konā. 17 Kae ne toe foki a ia ki Lama,+ me tenā te koga e tu ei tena fale, kae ne fai foki a ia mo famasino o Isalaelu i konā. Ne faite ne ia i konā se fatafaitaulaga ki a Ieova.+