Te Tusi Muamua a Ioane
4 Aku fagasele, sa tali‵tonu ki fakamatalaga fakaosofia*+ katoa, kae tofotofo aka a fakamatalaga fakaosofia* konā ke iloa aka me ne māfua mai i te Atua,+ i te mea e tokouke a pelofeta ‵loi ko oti ne olo atu ki te lalolagi.+
2 Tenei te mea e iloa ei ne koutou i fakamatalaga fakaosofia konā e māfua mai i te Atua: A fakamatalaga fakaosofia katoa kolā e fakaasi ‵tonu mai i a Iesu Keliso ko oti ne vau i te foitino e māfua mai eiloa i te Atua.+ 3 Kae ko fakamatalaga fakaosofia katoa kolā e se fakaasi ‵tonu mai i ei e uiga ki a Iesu, e se māfua mai i te Atua.+ E se gata i ei, konei eiloa a fakamatalaga fakaosofia a te anetikeliso telā ne ‵logo koutou me ka oko mai,+ kae tenei ko leva ne nofo i te lalolagi.+
4 Tama‵liki fo‵liki, a koutou e māfua mai i te Atua, kae ko oti ne fakatakavale ne koutou a latou,+ me i te tino telā e ‵kau fakatasi koutou+ e sili atu i te tino telā e ‵kau fakatasi mo te lalolagi.+ 5 E māfua mai latou i te lalolagi;+ tenā te pogai e fai‵pati ei latou ki mea kolā e māfua mai i te lalolagi kae e faka‵logo a te lalolagi ki a latou.+ 6 A tatou e māfua mai i te Atua. So se tino e iloa ne ia te Atua e fakalogo ki a tatou;+ so se tino e se māfua mai i te Atua e se fakalogo ki a tatou.+ Tenei te auala e iloa ei ne tatou a fakamatalaga fakaosofia o te munatonu mai fakamatalaga fakaosofia sē ‵tonu.+
7 Aku fagasele, ke tumau tatou i te fakatau a‵lofa,+ me i te alofa e māfua mai i te Atua, kae ko tino katoa kolā e a‵lofa ne fa‵nau mai i te Atua kae e iloa ne latou te Atua.+ 8 So se tino telā e se alofa e seki iloa ne ia te Atua, me i te Atua ko te alofa eiloa a ia.+ 9 Ne fakaasi mai te alofa o te Atua ki a tatou e auala i te mea tenei, ne uga mai ne te Atua a tena Tama fagasele+ e tokotasi ki te lalolagi ko te mea ke mafai o maua ne tatou te ola e auala i a ia.+ 10 Tenei eiloa te alofa, e se ona ko tatou ne a‵lofa ki te Atua, kae ko ia ne alofa mai ki a tatou kae uga mai tena Tama ke fai mo fai te taulaga+ mō ‵tou agasala ke faka‵lei aka ei tatou mo te Atua.+
11 Aku fagasele, kafai tenei te auala ne alofa mai ei te Atua ki a tatou, e ‵tau foki o fakatau a‵lofa tatou te suā tino ki te suā tino.+ 12 E seai se tino kai lavea ne ia te Atua i se taimi.+ Kafai e tumau tatou i te fakatau a‵lofa, e tumau te Atua i loto i a tatou kae ka katoatoa tena alofa i loto i a tatou.+ 13 E auala i te mea tenei e iloa ne tatou me e tumau tatou i te ‵kau fakatasi mo ia kae ko ia e ‵kau fakatasi mo tatou, me ko oti ne tuku mai ne ia tena agaga ki a tatou. 14 E se gata i ei, ko oti ne lavea kae molimau atu tatou me ko oti ne uga mai ne te Atua tena Tama ke fai mo fai te Fakaola o te lalolagi.+ 15 So se tino e taku ‵tonu atu ne ia i a Iesu ko te Tama a te Atua,+ ka tumau te Atua i te ‵kau fakatasi mo te tino tenā kae ka ‵kau fakatasi a ia mo te Atua.+ 16 Kae ko tatou ko iloa kae tali‵tonu ki te alofa o te Atua mō tatou.+
A te Atua ko te alofa eiloa,+ kae ko te tino e tumau i te alofa e tumau i te ‵kau fakatasi mo te Atua kae ko te Atua e tumau i te ‵kau fakatasi mo ia.+ 17 I te auala eiloa tenei ne fakakatoatoa ei te alofa i loto i a tatou, ko te mea ke maua ne tatou te saolotoga* o fai‵pati atu+ i te aso o te fakamasinoga, me e pelā eiloa mo te tino tenā, e penā foki tatou i te lalolagi nei. 18 E seai se mataku i te alofa,+ kae ko te alofa ‵lei katoatoa e ‵pei ne ia ki tua te mataku, me e faka‵lave tatou ne te mataku. E tonu, a te tino telā e mataku e seki katoatoa te alofa i loto i a ia.+ 19 A tatou e a‵lofa, me ne alofa muamua mai a ia ki a tatou.+
20 Kafai e fai mai se tino: “Au e alofa ki te Atua,” kae tela la e takalialia ki tena taina, a ia se tino loi.+ Me ko te tino telā e se alofa ki tena taina,+ telā ko oti ne matea ne ia, e se mafai o alofa ki te Atua, telā e seki matea ne ia.+ 21 Kae e maua ne tatou te fakatonuga tenei mai i a ia, me ko so se tino e alofa ki te Atua e ‵tau foki mo ia o alofa ki tena taina.+