Te Muamua Samuelu
1 E isi se tagata Lamata-sofimo*+ mai te koga maugā o Efalaima+ telā e fakaigoa ki a Elekana,+ ko te tama tagata a Ielohama, te tama tagata a Eliu, te tama tagata a Tou, te tama tagata a Sufi telā se tino Efalaima. 2 E tokolua ana avaga; e tokotasi e fakaigoa ki a Hana, kae ko tena suā avaga e fakaigoa ki a Penina. A Penina e isi ne ana tama‵liki, kae ko Hana e seai ne ana tama‵liki. 3 A te tagata tenā ne fano sāle mai tena fakai i tausaga takitasi o tapuaki* kae ofo atu ana taulaga ki a Ieova o kautau i Sailo.+ Tenā te koga e tavini i ei a tama tāgata a Eli, ko Hofeni mo Fineaso,+ e pelā me ne faitaulaga ki a Ieova.+
4 I te aso e tasi ne ofo atu ei ne Elekana tena taulaga, ne tuku atu ne ia ki tena avaga ko Penina e pelā foki mo ana tama tāgata mo tama fāfine katoa olotou vaega,+ 5 kae ne tuku atu ne ia ki a Hana se vaega fakapito me i a ia e alofa eiloa ki a Hana; kae ko Ieova ne seki tuku atu ne ia ne tama‵liki ki tou fafine.* 6 Kae ko tena suā avaga ne fakaitaita faeloa ne ia a Hana ko te mea ke se fiafia me e seai ne ana tama‵liki ne tuku atu ne Ieova. 7 Tenā te mea e fai ne Penina i tausaga takitasi; i so se taimi e fano ei a Hana ki te fale o Ieova,+ e fakaitaita faeloa ne ia tou fafine, tenā ne tagi ei a ia kae e se kai. 8 Kae ne fai atu tena avaga ko Elekana ki a ia: “Hana, kaia e tagi ei koe, kae kaia e se kai ei koe, kae kaia e fanoanoa malosi ei koe?* E a, e se sili atu au ki a koe i lō tama tāgata e tokosefulu?”
9 Tenā ne tu aka ei a Hana ki luga i te otiga o latou ne ‵kai kae inu i Sailo. I te taimi tenā a Eli te faitaulaga ne sagasaga i te nofoga i tafa o te pou o te mataloa o te faletapu*+ o Ieova. 10 A Hana ko oko eiloa i te mafatia, kae ne kamata a ia o ‵talo atu ki a Ieova+ kae tagi mautuutu. 11 Kae ne fai ne ia te tautoga tenei: “Ieova o kautau, kafai e kilo mai koe ki te logo‵mae o tau tavini kae masaua mai au kae e se puli i a koe tau tavini kae tuku mai ki tau tavini se tamaliki tagata,+ ka tuku atu eiloa ne au a ia ki a Ieova i aso katoa o tena olaga, kae ka seai se ‵vele e patele ki tena ulu.”+
12 Kae koi ‵talo atu tou fafine mō se taimi leva i mua o Ieova, kae ko Eli e onoono eiloa ki ana gutu. 13 A Hana e faipati eiloa i tena loto, ko ana laugutu fua e gasue‵sue, kae e se lagona eiloa tena leo. Tenā ne mafaufau ei a Eli i a ia e konā. 14 Muna Eli ki a ia: “Kaia e konā ei koe? Ko lava te inu uaina.” 15 Tenā ne tali atu ei a Hana: “Ikai e toku aliki! Au se fafine telā e mafatia malosi; au e seki inu uaina io me ne meainu ma‵losi, kae e fakaasi atu ne au a mea katoa i toku loto ki mua o Ieova.+ 16 Sa mafaufau pelā i tau tavini se fafine sē aoga, me i a au ne faipati faeloa ke oko mai ki te taimi nei ona ko te lasi o toku logo‵mae mo toku mafatia.” 17 Tenā ne tali atu ei a Eli: “Fano mo te filemu, kae ko te Atua o Isalaelu ke talia ne ia tau fakamolemole telā ne fakatagi atu ki a ia.”+ 18 Kae ne fai atu tou fafine: “Ke alofa mai eiloa koe ki tau tavini.” Tenā ne fano ei tou fafine o kai, kae ko se toe mata fanoanoa.
19 Tenā ne ‵tu aka ei latou i te tafataeao ‵malu kae ifo atu i mua o Ieova, oti aka ko te mea loa ko ‵foki ki te lotou fale i Lama.+ Ne ‵moe fakatauavaga a Elekana mo tena avaga ko Hana, kae ne saga atu* eiloa a Ieova ki tou fafine.+ 20 I loto i se tausaga* ne faitama a Hana kae fanau mai ne ia se tamaliki tagata kae fakaigoa+ ne ia ki a Samuelu,* me ne fai mai a ia, “au ne fakatagi ki a Ieova kae ne tuku mai ne ia.”
21 Fakamuli ifo, ne olo aka a Elekana mo tena kāiga kātoa o ofo atu te lotou taulaga o te tausaga ki a Ieova+ kae tuku atu te taulaga o tena tautoga. 22 Kae ko Hana ne seki fano,+ me ne fai atu a ia ki tena avaga: “I te taimi eiloa e ‵vae ei te tamaliki tagata tenei mai te ū, ko avatu ei ne au; ko fanatu ei a ia ki mua o Ieova kae nofo i konā i aso katoa.”+ 23 Ne fai atu a tena avaga ko Elekana ki a ia: “Fai te mea telā e iloa ne koe e ‵lei.* Nofo i te fale ke oko eiloa ki te taimi ko ‵vae ei ne koe a ia mai te ū. Ke fakataunu eiloa ne Ieova au pati.” Tenā ne nofo ei te fafine i te fale o tausi tena tama ke oko ki te taimi ko ‵vae ei mai te ū.
24 I te taimi eiloa ne ‵vae ei te tamaliki mai te ū, ne avatu ne tou fafine a ia ki Sailo, fakatasi mo se pulumakau ko tolu tausaga te matua, se efa* e tasi o falaoa, mo se tiā uaina lasi,+ ne oko atu a ia ki te fale o Ieova i Sailo+ kae ne avatu ne ia te tamaliki tagata. 25 Tenā ne tamate ei ne latou te pulumakau kae aumai te tamaliki tagata ki a Eli. 26 Tenā ne fai atu ei a ia: “Fakamolemole e toku aliki! E pelā eiloa mo koe e ola, e toku aliki, au ko te fafine telā ne ‵tu fakatasi mo koe i te koga tenei o ‵talo atu ki a Ieova.+ 27 Tenei te tamaliki ne ‵talo atu au e uiga ki ei, kae ne talia ne Ieova taku fakatagi telā ne fakamolemole atu au ki a ia.+ 28 Kae nei la, ko tuku atu ne au a ia ki a Ieova. I aso katoa o tena olaga ko tuku atu a ia ki a Ieova.”
Kae ne ifo atu a tou tagata* i konā ki a Ieova.