Te Tusi Muamua ki te Kau Kolinito
3 Tela la, e oku taina, ne seki mafai ne au o faipati atu ki a koutou e pelā me ne tāgata faka-te-agaga,+ kae e pelā me ne tāgata faka-te-foitino, e pelā me ne tama‵liki+ i a Keliso. 2 Ne fagai ne au koutou ki susu kae e se ki meakai ma‵keke, me i a koutou e seki ma‵losi ‵lei. A te ‵tonuga loa, a koutou e seki ma‵losi ‵lei ke oko mai ki te taimi nei,+ 3 me i a koutou koi fai eiloa e pelā me ne tino faka-te-foitino.+ Ona ko koutou koi loto ma‵sei kae fai taua sāle, e a, e se ne tino faka-te-foitino+ koutou kae sa‵sale foki koutou e pelā eiloa mo nisi tino? 4 Me kafai e fai mai se tino, “Au e kau ki a Paulo,” kae e fai mai te suā tino, “Au e kau ki a Apolo,”+ e a, e se ‵pau koutou mo tino o te lalolagi?
5 Ko oi la a Apolo? Kae ko oi foki a Paulo? A lāua ne tavini+ fua kolā ne ala ei o tali‵tonu koutou, e ‵tusa mo galuega kolā ne tuku mai ne te Aliki ki tino taki tokotasi. 6 Ne ‵toki ne au,+ ne fakasiusiu ne Apolo,+ kae ko te Atua ne fai faeloa ne ia ke ola te lakau, 7 tela la, e se ko te tino ne ‵toki ne ia io me ko te tino ne fakasiusiu ne ia e tāua atu, kae ko te Atua eiloa telā e fai ne ia ke ola te lakau.+ 8 E ‵kau fakatasi a te tino ‵toki mo te tino fakasiusiu, kae ka maua eiloa ne tino taki tokotasi a tena taui e ‵tusa mo ana galuega ne fai.+ 9 Me i a māua ko tino ga‵lue a te Atua. A koutou ko te fatoaga a te Atua telā e ga‵lue māua i ei, ko te fale telā ne fakatu ne te Atua.+
10 E ‵tusa mo te alofa tauanoa o te Atua telā ne tuku mai ki a au, ne fakatakato ne au se fakavae+ e pelā me se tufuga poto i te fakatutu, kae e isi se suā tino e fai tena galuega fakatutu i luga i ei. Kae ke onoono faka‵lei a tino taki tokotasi ki te auala e fai ei tena galuega fakatutu. 11 Me e seai se tagata e mafai o fakatakato ne ia se isi fakavae i tafa o te fakavae telā ko oti nei ne fakatakato, ko Iesu Keliso.+ 12 Kafai e fakatu ne se tino se fale i luga i te fakavae ne faite ki aulo, siliva, fatu tāua, lakau, mouku, io me ko lau o saito, 13 ka fakaasi mai i ei me e pefea te ‵lei o galuega a tino taki tokotasi, me ka fakaasi mai ne te afi i te aso e tofotofo ei,+ kae ka fakatalitonu mai ne te afi a te tulaga o galuega a tino taki tokotasi. 14 Kafai e tumau a galuega a te tino kolā ne ati aka i luga i ei, ka maua eiloa tena taui; 15 kafai e ‵ka a galuega a se tino, ka ‵galo atu ei ana mea, kae ka sao a ia. Kafai e penā loa, ka fai eiloa e pelā me ne sao a ia mai te afi.
16 E a, e se iloa ne koutou i a koutou ko te faletapu o te Atua,+ kae e nofo i a koutou te agaga o te Atua?+ 17 Kafai e fakaseai ne se tino te faletapu o te Atua, ka fakaseai a ia ne te Atua; me i te faletapu o te Atua e tapu, kae ko koutou ko te faletapu tenā.+
18 Ke se fakaloiloi ne se tino a ia eiloa: Kafai se tino i a koutou e mafaufau i a ia e poto i te olaga masani tenei, ke fai a ia mo fai se tino valea, ko te mea ke poto a ia. 19 Me i te poto o te lalolagi tenei ko te valea i mua o te Atua, me e fai mai penei te tusi: “E ‵po aka ne ia a tino ‵poto i olotou togafiti eiloa.”+ 20 Kae ne toe fai mai foki: “E iloa ne Ieova i mafaufauga o tino ‵poto e se aoga.”+ 21 Tela la, ke seai se tino e faipati fakamatamata ki se tino; me i mea katoa i a koutou. 22 Faitalia me ko Paulo io me ko Apolo io me ko Kefa*+ io me ko te lalolagi io me ko te ola io me ko te mate io me ko mea konei, io me ko mea ka oko mai, a mea katoa konā i a koutou; 23 kae ko koutou i a Keliso;+ kae ko Keliso i a te Atua.