Teutelonome

10 “I te taimi tenā ne fai mai a Ieova ki a au, ‘Faite ne papa fatu e lua e pelā mo papa fatu muamua,+ kae fanaka ki luga i a au i te mauga; kae e ‵tau foki mo koe o faite se pusa lakau. 2 Kae ka tusi ne au i luga i papa fatu konā a pati kolā ne tusi i papa fatu muamua kolā ne ‵pei ne koe ke malipi‵lipi, kae e ‵tau o tuku ne koe a mea konā ki loto i te pusa.’ 3 Tenā ne faite ei ne au te pusa ki te lakau ko te akasia kae faite foki a papa fatu e lua e pelā mo mea ne faite muamua, kae fanaka ki luga i te mauga mo papa fatu e lua i oku lima.+ 4 Kae ne tusi ne ia ki luga i papa fatu konā a pati kolā ne tusi muamua ne ia,+ ko Tulafono e Sefulu,*+ kolā ne fai atu ne Ieova ki a koutou i luga i te mauga mai loto i se afi+ i te aso ne maopoopo ei te fakapotopotoga;+ tuku mai ei ne Ieova a mea konā ki a au. 5 Tenā ne mafuli ei au kae fanaifo ki lalo mo te mauga+ kae tuku atu a papa fatu ki loto i te pusa telā ne faite ne au, kae ne tuku eiloa i konā e pelā mo te fakatonuga a Ieova ki a au.

6 “Ne tiaki ne tino Isalaelu a Pelota-peniakana o olo ki Mosela. Tenā te koga ne mate kae tanu i ei a Alona,+ kae ko tena tama tagata ko Eleasalo ne kamata o tavini atu e pelā me se faitaulaga e sui ei a ia.+ 7 Mai i konā, ne olo atu ei latou ki Kutukota, kae mai Kutukota ki Iotapata,+ se fenua telā e uke a vai e ‵tafe mai i ei.

8 “I te taimi tenā ne ‵vae kea‵tea ei ne Ieova a te matakāiga o tino Levi+ ke amo ne latou te pusa o te feagaiga a Ieova,+ ke ‵tu i mua o Ieova o tavini atu ki a ia, kae ke fakamanuia atu ne latou a tino i tena igoa,+ e pelā mo te mea e fai ne latou ke oko mai ki te aso nei. 9 Tenā te pogai e seai ei se vaega io me se tofi o tino Levi e pelā mo olotou taina. A Ieova ko te lotou tofi, e pelā eiloa mo pati a Ieova tou Atua ne fai ki a ia.+ 10 Ne nofo au i luga i te mauga e pelā mo te mea ne fai ne au i te taimi muamua, i ao e 40 mo po e 40,+ kae ne fakalogo mai foki eiloa a Ieova ki a au i te taimi tenā.+ A Ieova ne seki manako ke fakaseai ne ia koe. 11 Tenā ne fai mai ei a Ieova ki a au, ‘Fano i mua o tino kae fakatoka o olo, ko te mea ke mafai o ulu atu latou ki loto o puke a te fenua telā ne tauto au ki olotou tupuga me ka tuku ne au ki a latou.’+

12 “Nei la, e Isalaelu, se a te mea e manako a Ieova tou Atua ki ei mai i a koe?+ Konei fua: ke na mataku ki a Ieova tou Atua,+ ke na sasale i ana auala katoa,+ ke alofa ki a ia, ke tavini ki a Ieova tou Atua mo tou loto kātoa mo tou ola kātoa,+ 13 kae ke fakalogo ki fakatonuga mo tulafono fakavae a Ieova kolā e fakatonu atu ne au i te aso nei mō te ‵lei o koe.+ 14 Kiloke, a Ieova tou Atua e o ia te lagi, ke oko foki eiloa ki te lagi o lagi, mo te lalolagi mo mea katoa i ei.+ 15 Kae ko ou tupuga fua ne fakapilipili ki ei a Ieova kae fakaasi atu foki tena alofa ki a latou, kae ne filifili ne ia koutou, ko olotou tama,+ mai tino katoa, e pelā eiloa mo te mea ko tupu i te aso nei. 16 E ‵tau nei mo koutou o faka‵ma* otou loto+ kae sa toe loto ma‵keke.+ 17 Me i a Ieova te otou Atua ko te Atua o atua+ mo te Aliki o aliki, ko te Atua sili, e malosi, kae fakamataku, telā e se fakailoga tino+ kae e se talia foki ne ia a ‵togi fakakolekole. 18 E fakaoko atu ne ia te fakamasinoga tonu ki te tamaliki e seai sena tamana mo te fafine ko mate tena avaga,+ kae alofa foki a ia ki te tino fakaa‵tea+ kae tuku atu ki a ia a meakai mo gatu. 19 E ‵tau foki mo koutou o a‵lofa ki te tino fakaa‵tea, me i a koutou ne fai pelā me ne tino fakaa‵tea i te fenua o Aikupito.+

20 “E ‵tau o mataku koe ki a Ieova tou Atua. Ko ia fua e ‵tau o tavini koe ki ei,+ ko ia fua e ‵tau o ‵piki ‵mau koe ki ei, kae e ‵tau o fai ne koe au tautoga i tena igoa. 21 Ko Ia te tino e ‵tau o ‵viki atu+ koe ki ei. A ia ko tou Atua, telā ne fai ne ia a mea sili kae fakaofoofogia konei mō koe, kae ne lavea eiloa ne koe ki ou mata.+ 22 E toko 70 a tino ne olo tasi mo otou tupuga ki Aikupito,+ kae nei ko oti ne fai ne Ieova tou Atua a koe ke pelā mo fetū i te lagi i te uke.+