Ielemia
15 Tenā ne fai mai ei a Ieova ki a au: “Kafai foki eiloa e ‵tu mai a Mose mo Samuelu i oku mua,+ e fakaasi atu eiloa ne au toku sē fiafia ki tino konei. Afuli kea‵tea latou mai i oku mua. Tuku atu latou ke olo. 2 Kae kafai e fai atu latou ki a koe, ‘E olo matou ki fea?’ e ‵tau mo koe o fai atu ki a latou, ‘Konei a pati a Ieova ne fai mai:
“So se tino e ‵tau o mate i te famai fakamataku, e mate eiloa i te famai fakamataku!
So se tino e ‵tau o mate i te pelu, e mate eiloa i te pelu!+
So se tino e ‵tau o mate i te oge, e mate eiloa i te oge!
So se tino e ‵tau o ave fakapagota, e ave fakapagota eiloa!”’+
3 “‘Kae ka ‵tofi ne au a puapuaga e fa*+ ke oko atu ki a latou,’ ko te folafolaga a Ieova, ‘ko te pelu ke tamate ei, ko kuli ke toso olotou foitino ‵mate, mo manu eva o te lagi mo manu fe‵kai o te lalolagi ke kai kae fakaseai atu latou.+ 4 Kae ka fai ne au latou e pelā me se mea fakamataku ki malo katoa o te lalolagi+ ona ko Manase te tama tagata a Hesekia, te tupu o Iuta, e ‵tusa mo te mea ne fai ne ia i Ielusalema.+
5 Ko oi ka fakaasi atu ne ia te alofa atafai ki a koe, e Ielusalema,
Ko oi ka alofa ki a koe,
Kae ko oi ka tu o fesili mai me e a mai koe?’
6 ‘Ko oti ne tiakina ne koe au,’ ko te folafolaga a Ieova.+
‘E fulitua mai faeloa koe ki a au.*+
Tela la, ka ‵fola atu toku lima ki a koe o fakaseai koe.+
Au ko fi‵ta i te alofa ‵soko ki a koe.
7 Kae ka faka‵ma ne au latou e pelā me ne saito e faka‵ma i mataloa o ‵pui o te fakai.
Ka ave kea‵tea ne au olotou tama‵liki.+
Ka fakaseai ne au oku tino,
Me ne ita latou ma ‵fuli kea‵tea mai i olotou auala.+
8 Ka uke atu olotou fāfine kolā ko ‵mate olotou avaga i oku mua i lō one o te tai.
Ka aumai ne au se tino fakamasei mea ke taua atu ki a latou i te tutonu, ki mātua mo tamataene.
Ka aumai fakavave ne au te manavase mo te mataku ki luga i a latou.
9 Ko matapō a te fafine telā ne fanau mai ne ia a tama‵liki e tokofitu;
Ko gaegae eiloa tou fafine.
A tena la ko tō i te taimi koi ao ei,
Kae fai ei ke mavale kae masiasi.’
‘Kae ko nai tino o latou kolā ne ‵toe mai
Ka tuku atu ne au ki te pelu i mua o olotou fili,’ ko te folafolaga a Ieova.”+
10 Kalofa eiloa i a au, e toku mātua, me ne fanau mai ne koe au,+
Se tagata fakakinau kae fai taua mo te fenua kātoa.
Au ne seki tuku fakakaitalafu atu io me kaitalafu tupe;
Kae ne fetū katoa ne latou au.
11 Muna a Ieova: “Ka tavini atu eiloa au ki a koe mō te ‵lei;
Ka fesoasoani atu au ki a koe i taimi o fakalavelave,
I taimi o puapuaga o ‵teke te fili.
12 E a, e mafai o fatifati likiliki ne se tino a te fiti,
Ko te fiti mai mātū, mo kopa?
13 Ou kope mo ou koloa tāua ka tuku atu ne au e pelā me ne mea ne kaisoa,+
E se ‵togi, ona ko au agasala katoa i loto i tou laukele kātoa.
14 Ka tuku atu ne au a mea konā ki ou fili
Ke ave ki se fenua e se iloa ne koe.+
Me ko oti ne faka‵ka se afi e auala i toku ita,
Kae ko ‵ka o ‵teke atu koutou.”+
15 E iloa ne koe e Ieova,
Masaua mai au kae saga mai ki a au.
Ona ko au, ke na taui ma sui atu ki tino e fakasaua mai ki a au.+
Sa fakaseai atu au* ona ko te tuai o tou kaitaua.
Ke iloa ne koe me ko fa‵ki ne au te masiasi tenei ona ko koe.+
16 Ne maua ne au au muna, kae ne kai ne au;+
Kae ne oko mai tau muna ki a au e pelā me ko te fiafiaga mo se mea fakafiafia o toku loto,
Me ko oti ne fakaigoa tou igoa ki a au, e Ieova te Atua o kautau.
17 Au e se saga‵saga fakatasi mo tino fai fakafiafiaga kae fia‵fia.+
Ona ko tou lima e nofo i luga i a au, e sagasaga tokotasi au,
Me ko oti ne faka‵fonu ne koe au ki tou kaitaua.+
18 Kaia e ave ‵loa ei toku ‵mae kae e se ‵lei toku pakiaga?
E se mafai o fai ke ‵lei.
E a, ka fai koe pelā me se vaikeli fakaloiloi ki a au
Telā e se mafai o fakalagolago ki ei?
19 Tela la, konei a pati a Ieova ne fai mai:
“Kafai e toe foki mai koe, ka toe faka‵lei aka ne au a koe,
Kae ka tu koe i oku mua.
Kafai e ‵vae ne koe a te mea tāua mai i te mea sē aoga,
Ka fai koe e pelā mo toku gutu.*
Ka ‵saga atu latou ki a koe
Kae ko koe ka se saga atu ki a latou.”
20 “Ka fai ne au koe e pelā me se ‵pui kopa malosi ki tino konei.+
Ka taua atu eiloa latou ki a koe,
Kae ka se manumalo latou i a koe,*+
Me i a au e fakatasi atu ki a koe, o fakaola koe kae fakasao koe,” ko te folafolaga a Ieova.
21 Kae ka fakasao ne au koe mai i lima o tino amio ma‵sei
Kae fakasaoloto koe mai i alofilima o tino amio fakasaua.”