Iosua

11 I te taimi eiloa ne logo ei a Iapino te tupu o Hasola i te mea tenā, ne ave ana fekau ki a Iopapu te tupu o Matoni,+ mo te tupu o Similona, te tupu o Akasafo,+ 2 ki tupu kolā e ‵nofo i koga maugā ki mātū, ki a latou kolā e ‵nofo i te koga laugatasi i te feitu ki saute o Tinelete, ki a latou i te Sefila* mo te ‵sifōga o te mauga o To+ i te feitu ki togala, 3 ki tino Kanana+ i te feitu ki saegala mo togala, tino Amoli,+ tino Heti, tino Pelise, tino Iepuse i koga maugā, mo tino Hivi+ i te tafito o Helemoni+ i te fenua o Mesepa. 4 Ne o‵mai latou ki tua mo olotou kautau katoa, kae ko tokouke e pelā eiloa mo one i te tafatai, fakatasi mo solofanua mo kaliota tau e uke ‵ki. 5 Ne lotoma‵lie a tupu konei ke maopoopo fakatasi latou, kae ne olo atu latou o ‵nofo i te vai o Meloma ke taua atu ki Isalaelu.

6 Kae ne fai atu a Ieova ki a Iosua: “Sa mataku i a latou,+ me i te taimi penei ma taeao ka tuku ne au a latou katoa ke tamate ne Isalaelu. E ‵tau o fai ne koutou olotou solofanua ke se mafai o ‵tele,+ kae ‵sunu ne koe olotou kaliota ki te afi.” 7 Tenā ne olo atu ei a Iosua fakatasi mo ana sotia katoa o taua fakapoi atu ki a latou i tafa o vai o Meloma. 8 Ne tuku atu ne Ieova latou ki lima o Isalaelu,+ kae ne fakatakavale kae afuli foki latou ke oko loa ki Saitonu Sili+ mo Miselefota-maima+ mo te Vanu o Mesepa i te feitu ki saegala, kae ne ‵ta ne tino Isalaelu a latou kae seai se tino ne sao.+ 9 Tenā ne fai ei ne Iosua ki a latou a te mea ne fai atu ne Ieova ki a ia; ne fai ne ia olotou solofanua ke se mafai o ‵tele kae ‵sunu olotou kaliota ki te afi.+

10 E se gata i ei, ne foki atu a Iosua, puke ne ia a Hasola kae ta ne ia tena tupu ki te pelu,+ me i a Hasola ne fai muamua mo fai te ulu o malo katoa konei. 11 Ne ‵ta ne latou a tino katoa i loto i ei ki te pelu, kae fakaseai katoatoa atu.+ E seai eiloa se mea ola ne faka‵toe.+ Oti aka, ‵sunu ei ne ia a Hasola ki te afi. 12 Ne puke ne Iosua a fakai katoa o tupu konei kae fakatakavale ne ia olotou tupu katoa ki te pelu.+ Ne fakaseai katoatoa atu+ ne ia latou, e pelā eiloa mo te fakatonuga ne fai atu ne Mose te tavini a Ieova. 13 Kae ne seki ‵sunu ne Isalaelu se fakai i fakai kolā ne ‵tu i koga ma‵luga konā kae na ko Hasola; tenā fua te fakai ne ‵sunu ne Iosua. 14 A mea katoa i fakai konei fakatasi mo lafu manu kolā ne ‵toe mai i te taua, ne puke katoa ne tino Isalaelu ma latou.+ Kae ne tamate ne latou a tino katoa ki te pelu ke oko ki te taimi ko fakaseai katoatoa atu ei a tino taki tokotasi.+ E seai se tino telā koi mānava ne fakasao ne latou.+ 15 E pelā eiloa mo te fakatonuga a Ieova ki a Mose tena tavini, ne fakatonu ei ne Mose a Iosua,+ kae ne fai ne Iosua a te mea tenā. E seai loa se mea mai mea katoa ne fakatonu ne Ieova ki a Mose ne seki fai ne ia.+

16 Ne fakatakavale ne Iosua te fenua kātoa tenei, ko fenua maugā, ko te Nekepi+ kātoa, ko fenua katoa o Kosena, te Sefila,*+ te Alapaa,+ mo koga maugā o Isalaelu mo ana koga ma‵lalo, 17 mai te Mauga o Halaka, telā e fanaka ki luga i Seila, ke oko atu eiloa ki Paalakato+ i te Vanu o Lepanona i te tafito o te Mauga o Helemoni,+ ne puke ne ia olotou tupu katoa kae fakatakavale mai te tamate atu katoa o latou. 18 Ne taua atu a Iosua ki tupu katoa konei mō se taimi tai leva. 19 E seai se fakai ne maua ne ia se va filemu mo tino Isalaelu kae na ko tino Hivi kolā e ‵nofo i Kipeona.+ Ne fakatakavale ne latou a nisi fakai katoa i te taua.+ 20 Ko Ieova ne fai ne ia olotou loto ke ma‵keke+ kae ke taua atu latou ki Isalaelu, ko te mea ke mafai o fakaseai katoatoa atu ne ia latou e aunoa mo te alofa.+ E ‵tau o ‵ta fakapalele latou, e pelā eiloa mo te fakatonuga a Ieova ne fai ki a Mose.+

21 I te taimi tenā, ne fakaseai atu ne Iosua a tino Anakima+ mai luga i koga maugā, mai Hepelona, Tipeli, Anapa, mo koga maugā katoa o Iuta mo koga maugā katoa o Isalaelu. Ne fakaseai+ atu ei ne Iosua a latou fakatasi mo olotou fakai. 22 E seai ne tino Anakima ne ‵toe mai i te fenua o tino Isalaelu; ne ‵nofo+ atu fua latou i Kasa,+ i Kata+ mo Asetota.+ 23 Tenā ne puke ei ne Iosua a fenua katoa, e pelā eiloa mo te folafolaga a Ieova ki a Mose,+ kae ne tuku atu ne Iosua a fenua konā e pelā me se tofi ki tino Isalaelu e ‵tusa mo olotou vaega kolā e ‵tau o maua ke vaevae i olotou matakāiga.+ Kae ne seki toe ai eiloa ne taua i te fenua.+