Malaki

1 Se folafolaga:

Ko te fekau a Ieova ki Isalaelu e auala i a Malaki:*

2 “Ko oti ne fakaasi atu ne au te alofa ki a koutou,”+ ko muna a Ieova.

Kae fai mai koutou: “I te auala fea ne fakaasi mai ei ne koe te alofa ki a matou?”

“E a, a Esau e se ko te taina o Iakopo?+ ko te folafolaga a Ieova. “Kae ko au ne alofa ki a Iakopo, 3 kae ne takalialia au ki a Esau;+ kae ne ofa ne au ana mauga+ kae tuku tena tofi ki manu ko tiakolo o te koga lavaki.”+

4 “E tiga eiloa e fai mai a Etoma, ‘A matou ko oti ne tuki pala, kae ko matou ka ‵foki mai o toe faite a mea ne ofa ki lalo,’ konei a pati a Ieova o kautau ne fai mai, ‘Ka faite ne latou, kae ka ofa ne au, kae ka taku latou ko “te kogā koga o tino amio ma‵sei” mo “tino kolā ko oti ne taku fakamasei ne Ieova ki te se-gata-mai.”+ 5 Ka lavea eiloa ne ou mata a te mea tenā, kae ka fai aka koe: “Ke fakamaluga aka a Ieova i te kogā koga o Isalaelu.”’”

6 “‘A te tama tagata e fakaaloalo ki tena tamana,+ kae ko te tavini ki tena matai. Tela la, kafai au se tamana,+ tefea la te fakaaloalo e ‵tau o fakaasi mai ki a au?’+ Kae kafai au se matai,* tefea te mataku* e ‵tau o fakaasi mai ki a au?’ ko muna a Ieova ki a koutou e faitaulaga kolā e takalia‵lia mai ki toku igoa.+

“‘Kae fai mai koutou: “I te auala fea ne takalia‵lia ei matou ki tou igoa?”’

7 “‘Mai te ofomaiga o meakai* lai‵lai i luga i taku fatafaitaulaga.’

“‘Kae fai mai koutou: “I te auala fea ne fakalailai ei ne matou a koe?”’

“‘Mai te fai atu: “A te taipola a Ieova+ se mea fakatakalialia.” 8 Kae kafai e ofo atu ne koutou se manu ‵kivi e pelā me se taulaga, e fai aka koutou: “E seai se mea e masei i ei.” Kae kafai e ofo atu ne koutou se manu ‵pili io me masaki: “E seai se mea e masei i ei.”’”+

“Fakamolemole, taumafai o ofo atu aka a mea konā ki te kovana. E a, ka fiafia a ia ki a koe io me talia ne ia koe?” ko muna a Ieova o kautau.

9 “Nei la, fakamolemole, fakatagi atu ki te Atua, ke fakaasi mai tena taliaga ki a tatou. Mai taulaga konā i otou lima, e mata, ka talia ne ia se tino i a koutou?” ko muna a Ieova o kautau.

10 “Kae ko oi i a koutou e loto fiafia o ‵pono ne ia a mataloa?*+ Me ka se faka‵ka ne koutou taku fatafaitaulaga e aunoa mo se ‵togi.+ E seai soku fiafia i a koutou,” ko muna a Ieova o kautau, “kae e se fiafia foki au ki so se taulaga mai i otou lima.”+

11 “Me mai te taimi e sae aka ei te la ke oko ki te taimi e tō ei,* ka sili eiloa toku igoa i atufenua.+ I koga katoa ka fai eiloa ke fanaka te au mai i taulaga, kae ofo atu a taulaga ki toku igoa, e pelā me se meaalofa ‵ma; me i toku igoa ka sili atu i atufenua,”+ ko muna a Ieova o kautau.

12 “Kae ko taku fakamasei ne koutou+ mai te fai atu, ‘A te taipola a Ieova e lailai, kae ko ana fuagalakau, ana meakai, e fakatakalia‵lia.’+ 13 Ne fai mai foki koutou, ‘Kiloke! Ko oko eiloa i te fakafi‵ta!’ kae ‵kilo fakatauemu atu koutou ki ei,” ko muna a Ieova o kautau. “Kae aumai ne koutou a manu kai‵soa, ‵pili kae ma‵saki. Ao, e aumai ne koutou a vaegā manu penā e pelā me se meaalofa! E a, e ‵tau o talia ne au a te mea tenā mai otou lima?”+ ko muna Ieova.

14 “Ke malaia eiloa a te tino faitogafiti telā e isi sena manu tagata ‵lei i tena lafu, kae fai tena tautoga kae ofo atu se manu e isi sena pona ki a Ieova. Me i a au se Tupu sili,”+ ko muna a Ieova o kautau, “kae ko toku igoa ka fakamataku ki atufenua.”+