Te Muamua Samuelu

9 E isi se tagata Peniamina e fakaigoa ki a Kiso,+ ko te tama tagata a Apielu, te tama tagata a Selolo, te tama tagata a Pekolata, te tama tagata a Afie se tino Peniamina+ kae se tagata maumea. 2 E isi sena tamaliki tagata e igoa ki a Saulo,+ telā koi talavou kae tinogali​—e seai eiloa se tagata Isalaelu e tinogali atu i a ia​—kae e loa atu a ia i tino katoa mai ana tuauma ke oko ki tena ulu.

3 I te taimi ne ‵galo ei a asini* a Kiso te tamana o Saulo, ne fai atu a Kiso ki tena tama ko Saulo: “Fakamolemole puke se tavini e tokotasi kae olo o ‵sala mai a asini.” 4 Ne olo atu lāua i loto i te koga maugā o Efalaima kae olo atu foki i loto i te fenua o Salisa kae ne seki maua ne lāua. Ne ma‵laga atu lāua i loto i te fenua o Saalima, kae e seai ne asini i ei. Ne olo atu lāua i loto i fenua katoa o tino Peniamina kae ne seki maua eiloa ne lāua a asini konā.

5 Ne o‵mai lāua ki te fenua ko Sufi, kae ne fai atu a Saulo ki tena tavini telā ne olo tasi mo ia: “Vau, tāua ka ‵foki i toku tamana ma manavase ki a tāua i lō ana asini.”+ 6 Kae ne tali atu tena tavini: “Kiloke, e isi se tagata o te Atua i te fakai tenei, se tagata telā e fakaaloalo ne tino. A mea katoa e faipati mai ne ia e taunu eiloa.+ Tā olo nei ki ei. E se taumate e mafai o fakailoa mai ne ia te koga ke olo tāua ki ei.” 7 I konā ne fai atu ei a Saulo ki tena tavini: “Kafai e olo tāua, ne a mea e mafai o avatu ne tāua ki te tagata tenā? E seai ne falaoa i tā taga; e seai se mea e mafai o avatu e pelā me se meaalofa ki te tagata o te Atua tonu. E a, e isi ne tā mea?” 8 Tenā ne toe tali atu a te tavini ki a Saulo: “Kiloke! E isi se kuata o te sekela* siliva i toku lima. Ka tuku atu ne au ki te tagata o te Atua tonu, kae ka fakaasi mai ne ia te koga ke olo tāua ki ei.” 9 (I Isalaelu i aso mua, konei a pati e fai sāle atu ne se tagata māfai ko fano o ‵sala te Atua: “Vau, tā olo ki te tagata e lavea ne ia a fakaasiga.”+ Me i te pelofeta i aso nei e masani o taku i aso mua ko te tagata e lavea ne ia a fakaasiga.) 10 Tenā ne fai atu ei a Saulo ki tena tavini: “A tau mea ne fai mai e ‵lei. Tā olo.” Tenā ne olo atu ei lāua ki te fakai telā e nofo i ei te tagata o te Atua tonu.

11 I te taimi ne olo aka ei lāua ki te fakai, ne fetaui lāua mo tama‵liki fāfine e olo o asu vai. Tenā ne fai atu ei lāua ki a latou: “A te tagata e lavea ne ia a fakaasiga+ e nofo i konei?” 12 Ne tali atu latou: “Ao. Kiloke, tenā fua i mua o koulua. Fakavave, me i te aso nei ne vau a ia ki te fakai, me tenei te aso e fai ei ne tino a taulaga+ i te koga maluga.+ 13 Kafai ko oko atu koulua ki te fakai, ka maua ne koulua tou tagata koi tuai o fanaka a ia ki te koga maluga o kai. A tino ka se ‵kai eiloa seiloga ke oko atu a ia, me ko ia te tino e fakamanuia ne ia te taulaga. Kafai ko oti te mea tenā, ko mafai ei o ‵kai a tino kolā ne ‵kami. Tela la, na olo nei, kae ka maua ne koulua a ia.” 14 Tenā ne olo aka ei lāua ki te fakai. I te taimi ne olo atu ei lāua ki te kogaloto o te fakai, ne vau a Samuelu o fakafetaui ki a lāua ke olo latou ki te koga maluga.

15 I te aso mai mua o oko mai a Saulo, ne fai atu a Ieova ki a Samuelu: 16 “I te aso taeao i te taimi penei, ka uga atu ne au ki a koe se tagata mai te fenua o Peniamina.+ E ‵tau mo koe o fakaeke a ia ke fai mo takitaki o oku tino Isalaelu,+ kae ka faka‵sao ne ia oku tino mai lima o tino Filisitia. Me ko oti ne lavea ne au te puapuaga o oku tino, kae ko oti foki ne oko mai ki a au te lotou ‵tagi.”+ 17 I te laveaga ne Samuelu a Saulo, ne fai atu a Ieova ki a ia: “Tenei te tagata ne fai atu au ki a koe, ‘Tenei te tino telā ka pule ne ia oku tino.’”*+

18 Tenā ne fanatu ei a Saulo ki a Samuelu i te kogaloto o te mataloa o te fakai kae fai atu: “Fakamolemole, fakaasi mai aka a te fale o te tagata e lavea ne ia a fakaasiga?” 19 Ne tali atu a Samuelu ki a Saulo: “Au ko te tagata telā e lavea ne ia a fakaasiga. Olo i oku mua ki te koga maluga, kae ka ‵kai fakatasi koulua mo au i te aso nei.+ Ka tuku ne au koulua ke olo i te tafataeao, kae ka fakailoa atu ne au a te mea telā e ma‵nako koulua ki ei.* 20 E pelā mo asini kolā ne ‵galo i aso e tolu ko ‵teka,+ sa manavase ki ei, me ko oti ne maua. Kae ko oi te tino i a ia a mea katoa kolā e manako malosi ki ei a Isalaelu? E a, e se i a koe mo te kāiga katoa o tou tamana?”+ 21 Tenā ne tali atu ei a Saulo: “E a, e se ko au te tino Peniamina mai te ‵toe matakāiga foliki eiloa o Isalaelu,+ kae ko te motou kāiga ko te ‵toe kāiga sē taulia eiloa i kāiga katoa o te matakāiga o Peniamina? Kaia ne faipati mai ei koe penā ki a au?”

22 Tenā ne ave ei ne Samuelu a Saulo mo tena tavini ki te potu ‵kai kae tuku atu ki ei a nofoga e sili atu i a latou kolā ne ‵kami; kāti e nofo ki se 30 tāgata. 23 Ne fai atu a Samuelu ki te kūka: “Aumai te vaega telā ne tuku atu ne au ki a koe kae fai atu ke tausi faka‵lei.” 24 Tenā ne sau aka ei ne te kūka a te vae mo mea katoa i luga i ei kae tuku atu ki mua o Saulo. Kae ne fai atu a Samuelu: “A te mea telā ne tausi tenā ko tuku i ou mua. Kai, me ne tausi eiloa ne latou a te mea tenā ma koe mō te taimi tenei. Me i a au ne fai ki a latou, ‘E isi ne aku tino ‵kami.’” Tenā ne ‵kai ei a Saulo mo Samuelu i te aso tenā. 25 Mai konā ne olo ifo ei latou mai te koga maluga+ ki te fakai, kae ne fai‵pati eiloa lāua mo Saulo i luga i te tuafale. 26 Ne ‵tu aka latou i te tafataeao ‵malu kae i te taimi ko kamata ei o maina, ne kalaga atu a Samuelu ki a Saulo i te tuafale, ana muna: “Fakatoka, ke na olo koulua.” Tenā ne fakatoka ei a Saulo kae ne olo fakatasi atu lāua mo Samuelu ki tua. 27 I te taimi ko olo ifo ei latou ki koga i tua o te fakai, ne fai atu a Samuelu ki a Saulo: “Fai ki tau tavini+ ke fano i mua o tāua,” tenā ne fano ei te tavini i mua. “Kae ko koe, tu mai ko te mea ke lagona ne koe a te muna mai te Atua.”