Te Lua Tupu
16 I te 17 tausaga o te pulega a Peka te tama tagata a Lemalia, ne fai a Aasa+ te tama tagata a te tupu o Iuta ko Iotama mo fai te tupu. 2 Ko 20 tausaga o Aasa i te taimi ne fai ei a ia mo tupu, kae ne pule a ia i Ielusalema i tausaga e 16. Ne seki fai ne ia a te mea tonu i te kilokiloga a Ieova tena Atua e pelā mo mea ne fai ne tena tupuga ko Tavita.+ 3 I lō te fai penā, ne sasale a ia i auala o tupu o Isalaelu,+ kae ne ‵sunu ne ia tena tama tagata i te afi,*+ mai te tautali atu i faifaiga fakatakalialia a nisi fenua+ kolā ne afuli kea‵tea ne Ieova i mua o tino Isalaelu. 4 Ne ofo atu faeloa ne ia a taulaga kae fai ke fanaka te au mai te taulaga i luga i koga ma‵luga,+ i tamā mauga, kae mai lalo i so se lakau ola ‵lei.+
5 Ko te taimi tenā ne vau ei a te tupu o Sulia ko Lesina mo Peka te tama tagata a Lemalia te tupu o Isalaelu o taua atu ki Ielusalema.+ Ne nikoi ne lāua a Aasa o taua atu ki ei kae ne seki mafai ne lāua o puke te fakai. 6 I te taimi tenā, ne toe fakafoki ne te tupu o Sulia ko Lesina a Elata+ ki Etoma, kae oti aka afuli ei ne ia kea‵tea a tino Iutaia* mai loto i Elata. Ne ulu atu a tino Etoma ki loto i Elata, kae ne ‵nofo eiloa latou i konā ke oko mai ki te aso nei. 7 Ne uga atu ne Aasa a avefekau ki te tupu o Asulia ko Tikila-pilesa,+ ana muna: “Au ko tau tavini mo tau tama tagata. Vau o fakasao au mai lima o te tupu o Sulia mo lima o te tupu o Isalaelu konei e taua mai ki a au.” 8 Tenā ne puke ei ne Aasa a siliva mo aulo kolā ne maua i te fale o Ieova mo potu ‵teu koloa i te fale* o te tupu kae avatu ki te tupu o Asulia e pelā me se ‵togi fakakolekole.+ 9 Ne saga atu a te tupu o Asulia ki tena fakamolemole, kae fanatu ki Tamaseko o puke te fakai kae ave fakapagota a tino i ei ki Kila,+ kae tamate ne ia a Lesina.+
10 Tenā ne fanatu ei a te Tupu ko Aasa o fakafetaui ki te tupu o Asulia ko Tikila-pilesa i Tamaseko. I te taimi ne lavea ne ia te fatafaitaulaga i Tamaseko, ne avatu ne te Tupu ko Aasa ki a Ulita te faitaulaga a te palani o te fatafaitaulaga, e fakaasi atu i ei a te ata mo te auala ne faite i ei.+ 11 Ne faite ne te faitaulaga ko Ulita+ se fatafaitaulaga+ e ‵tusa mo fakatonuga katoa kolā ne tuku mai ne te Tupu ko Aasa mai Tamaseko. Ne fakaoti ne te faitaulaga ko Ulita a te faitega o te fatafaitaulaga kae koi tuai o foki mai a te Tupu ko Aasa mai Tamaseko. 12 I te fokimaiga a te tupu mai Tamaseko kae lavea ne ia te fatafaitaulaga, ne fanatu a ia ki te fatafaitaulaga kae ofo atu a taulaga i luga i ei.+ 13 Kae ne tumau eiloa a ia i te faiga o ana taulaga ‵sunu mo ana taulaga meakai ke fanaka te au mai i ei; ne ‵ligi foki ne ia ki tua a tena taulaga meainu kae fakamatulutulu atu te toto o tena taulaga ‵kai fakatasi ki luga i ei. 14 Tenā ne fakagasue ei ne ia te fatafaitaulaga kopa+ telā ne tu i mua o Ieova mai tena koga i mua o te fale, i te va o te fatafaitaulaga fou mo te fale o Ieova, kae tuku atu ne ia i te feitu ki mātū o tena fatafaitaulaga. 15 Ne fakatonu atu a te Tupu ko Aasa ki a Ulita+ te faitaulaga: “Fai ke fanaka te au mai te taulaga ‵sunu o te tafataeao i luga i te fatafaitaulaga sili,+ e pelā foki mo te taulaga meakai i te afiafi,+ te taulaga ‵sunu a te tupu, mo tena taulaga meakai, e pelā foki mo te taulaga ‵sunu, te taulaga meakai, mo taulaga meainu a tino katoa. E ‵tau foki o fakamatulutulu ne koe ki luga i ei a toto katoa o te taulaga ‵sunu mo toto katoa o nisi taulaga. Kae e pelā mo te fatafaitaulaga kopa, tuku ke fakaiku ne au te mea ka fai ki ei.” 16 Kae ne fai ne te faitaulaga ko Ulita a mea katoa ne fakatonu atu ne te Tupu ko Aasa.+
17 E se gata i ei, ne talatala ne te Tupu ko Aasa a kā kae katikati fakalikiliki ne ia a feitu o ‵pui o kā+ kae ave kea‵tea a pesini mai i ei,+ kae ne puke ne ia te pesini vai lasi telā e taku ko te Tai ki lalo mo pulumakau kopa+ kolā ne ‵lago ki ei kae tuku atu ki luga i se ‵pae fatu.+ 18 Kae ko te fale fakamalumalu o te Sapati telā ne faite i loto i te fale mo te mataloa ki tua o te tupu ne fakaga‵sue ne ia kea‵tea mai te fale o Ieova; ne fai ne ia a mea konei ona ko te tupu o Asulia.
19 Kae ko te tala fakasolopito kātoa o Aasa mo ana mea ne fai, e a, e se tusi katoa i te tusi o tala fakasolopito i taimi o tupu o Iuta?+ 20 Tenā ne takato ifo ei a Aasa o malō‵lo fakatasi mo ana tupuga kae ne tanu fakatasi mo ana tupuga i te Fakai o Tavita; kae ko tena tama tagata ko Hesekia*+ ne fai mo tupu e sui ei a ia.