Iosua

3 Ne tu aka Iosua i te tafataeao ‵malu, kae ne tiaki ne ia fakatasi mo tino Isalaelu katoa a Sitima+ kae olo atu ki te Iolitana. Ne ‵moe latou i te po i konā kae koi tuai o olo atu ki te suā feitu.

2 Mai tua o aso e tolu ne olo atu a ofisa+ i loto i koga ne ‵tu i ei a faleie 3 kae fakatonu atu ki tino: “I te taimi eiloa e lavea ei ne koutou a te pusa o te feagaiga a Ieova te otou Atua ko sau ne faitaulaga Levi,+ e ‵tau o tiaki ne koutou otou koga ‵nofo kae tau‵tali i ei. 4 Kae e ‵tau o faka‵mao koutou mai i ei i se ‵mao e ‵tusa mo te 2,000 kupita;* ke mo a eiloa ma fakapili‵pili atu koutou ki ei, ko te mea ke iloa ne koutou te auala e ‵tau o olo i ei, me e seki olo eiloa koutou i te auala tenei muamua.”

5 Ne fai atu a Iosua ki tino: “Ke fakatapu a koutou eiloa,+ me i te aso ma taeao ka fai ne Ieova a mea fakaofoofogia i mua o koutou katoa.”+

6 Ne fai atu a Iosua ki faitaulaga: “Puke te pusa+ o te feagaiga kae olo atu i mua o tino.” Tenā ne puke ei ne latou te pusa o te feagaiga kae olo atu i mua o tino.

7 Kae ne fai atu a Ieova ki a Iosua: “I te aso nei ka kamata o faka‵malu ne au koe i mua o Isalaelu kātoa,+ ko te mea ke iloa ne latou me ka fakatasi atu eiloa au ki a koe+ e pelā mo au ne fakatasi atu ki a Mose.+ 8 E ‵tau o tuku atu ne koe te fakatonuga tenei ki faitaulaga kolā e sau ne latou te pusa o te feagaiga: ‘Kafai ko oko koutou ki kaugutu o te vai o te Iolitana, e ‵tau o ‵tu koutou i te Iolitana.’”+

9 Kae ne fai atu a Iosua ki tino Isalaelu: “O‵mai ki konei o faka‵logo ki pati a Ieova te otou Atua.” 10 Muna a Iosua: “Ona ko te mea tenei ka iloa ei ne koutou me e fakatasi atu a te Atua ola ki a koutou,+ kae ka afuli eiloa kea‵tea ne ia mai i mua o koutou a tino Kanana, tino Heti, tino Hivi, tino Pelise, tino Kilikase, tino Amoli mo tino Iepuse.+ 11 Kiloke! A te pusa o te feagaiga a te Aliki o te lalolagi kātoa ko mua i a koutou ki loto i te Iolitana. 12 Nei la, puke ne tāgata e toko 12 mai i matakāiga o Isalaelu, e tokotasi te tagata mai matakāiga takitasi,+ 13 kae i te taimi eiloa e pa‵tele ei a alofivae o faitaulaga kolā e sau ne latou te Pusa a Ieova, te Aliki o te lalolagi kātoa, ki te vai o te Iolitana, ko te mea eiloa ko se ‵tafe a vai o te Iolitana kolā ne ‵tafe mai, kae ka faka‵tu aka e pelā me se ‵pui vaitafe.”*+

14 Tela la, i te taimi ne tiaki ei ne tino olotou faleie mai mua malie eiloa o olo ki te suā feitu o te Iolitana, ne olo atu i mua o latou a faitaulaga kolā e sau ne latou te pusa+ o te feagaiga. 15 I te taimi eiloa ne oko atu ei a faitaulaga kolā e sau ne latou te Pusa ki te Iolitana kae ‵laka ifo olotou vae ki kaugutu o te vaitafe (i te taimi nei ne lofia+ a te Iolitana i taimi katoa o te ‵katiga o saito), 16 ne gata ei te ‵tafe o vai konā. Ne ‵tu aka a mea konā e pelā me se ‵pui vaitafe i se koga ‵mao i Atamu, te fakai pili ki Saletana, kae ne ‵sali kea‵tea a vai kolā ne ‵tafe atu ki te Tai o te Alapaa, telā ko te Tai ‵Kona.* Ne seki ‵tafe eiloa te vai, kae ne olo atu ei a tino ki te suā feitu, ki te koga e ‵luta tonu mo Ieliko. 17 Kae koi ‵tu a faitaulaga kolā e sau ne latou a te pusa o te feagaiga a Ieova i te laukele malō+ i te kogaloto o te Iolitana, ne sa‵sale atu a Isalaelu kātoa ki te suā feitu i luga i te laukele malō+ ke oko ki te taimi ne palele ei te fenua kātoa ne olo atu ki te suā feitu o te Iolitana.