Levitiko

2 “‘Kafai e ofo atu ne se tino se taulaga meakai*+ ki a Ieova, e ‵tau o fai tena taulaga ki falaoa ‵mata kae ‵lei, kae e ‵tau o ‵ligi ne ia ki luga i ei a sinu kae tuku atu ne pulu lipano* ki ei.+ 2 Tenā ko aumai ei ne ia ki tama tāgata a Alona, kolā ko faitaulaga, kae ka faka‵fonu ne te faitaulaga ana lima ki falaoa ‵mata kae ‵lei mo sinu mo pulu lipano katoa, kae ka ‵sunu ne ia ko te mea ke au e pelā me se taulaga o fakamasauaga+ i luga i te fatafaitaulaga, se taulaga e ofo atu i luga i te afi kae manogi gali ki a Ieova. 3 So se mea e ‵toe mai i te taulaga meakai e tuku ma Alona mo ana tama tāgata+ e pelā me se mea tafasili i te tapu+ mai i taulaga ne ofo atu i luga i te afi ki a Ieova.

4 “‘Kafai e ofo atu ne koe se taulaga meakai telā ne tao ki te ogaumu, e ‵tau o fai ki falaoa ‵mata kae ‵lei, falaoa puku‵puku sē faka‵fete kolā ne palu fakatasi mo sinu io me ko falaoa manifinifi sē faka‵fete kolā ne nani ki sinu.+

5 “‘Kafai a tau taulaga ne ‵tunu ki te fiti pāpā,+ e ‵tau o fai ki falaoa ‵mata kae ‵lei kae e se faka‵fete kae palu fakatasi mo sinu. 6 E ‵tau o tofitofi ki vaega fo‵liki, kae ‵ligi atu ne koe te sinu ki luga i ei.+ A te mea tenā se taulaga meakai.

7 “‘Kafai a tau taulaga meakai ne fakatoka i loto i se ulo, e ‵tau o fai ki falaoa ‵mata kae ‵lei mo sinu. 8 E ‵tau o aumai ne koe a te taulaga meakai telā ne faite ki mea konei ki a Ieova, kae ka tuku atu ki te faitaulaga telā ka aumai ne ia ki tafa o te fatafaitaulaga. 9 Kae ka sau aka ne te faitaulaga ne mu mea mai te taulaga meakai e pelā me se taulaga o fakamasauaga+ kae ‵sunu ko te mea ke au i luga i te fatafaitaulaga, e pelā me se taulaga e ofo atu i luga i te afi kae manogi gali ki a Ieova.+ 10 A mea kolā e ‵toe mai i te taulaga meakai e tuku ma Alona mo ana tama tāgata, e pelā me se mea tafasili i te tapu mai i taulaga e ofo atu i luga i te afi+ ki a Ieova.

11 “‘E seai se taulaga meakai e ofo atu ne koutou ki a Ieova e fai ki mea faka‵fete,+ me e se ‵tau mo koutou o ‵sunu a falaoa ne palu ki te isi io me ki te hani e pelā me se taulaga e ofo atu i luga i te afi ki a Ieova.

12 “‘E mafai o ofo atu ne koutou a mea konā ki a Ieova e pelā me se taulaga o fuataga muamua,+ kae e se ‵tau o avatu ki te fatafaitaulaga e pelā me se mea manogi gali.

13 “‘A taulaga meakai katoa e ofo atu ne koe e ‵tau o fakakonakona ki te masima; kae e se ‵tau o galo a te masima o te feagaiga a tou Atua mai tau taulaga meakai. E ‵tau o avatu ne koe au taulaga katoa fakatasi mo te masima.+

14 “‘Kafai e ofo atu ne koe ki a Ieova a taulaga meakai o fuataga muamua kolā ko ma‵tua ‵lei, e ‵tau o ofo atu a fuataga ‵fou ne tao ki te afi, ko fuataga kolā ne fatoa oti ne tuki, ke fai pelā me se taulaga meakai o au fuataga muamua kolā ko ma‵tua ‵lei.+ 15 E ‵tau o ‵ligi ne koe te sinu ki luga i ei kae tuku atu a pulu lipano ki ei. A te mea tenā se taulaga meakai. 16 Ka ‵sunu ne te faitaulaga ko te mea ke au a te mea tenā e pelā me se taulaga o fakamasauaga,+ ko nai fuataga kolā ne tuki fakatasi mo sinu, e pelā foki mo ana pulu lipano katoa, ke fai pelā me se taulaga e ofo atu i luga i te afi ki a Ieova.