Levitiko

15 Ne toe faipati atu a Ieova ki a Mose mo Alona, ana muna: 2 “Faipati ki tino Isalaelu kae fai atu ki a latou, ‘Kafai e ‵sali mai ne ukau i te koga tapu o se tagata,* e fai ne ukau konā ke se ‵ma+ tou tagata. 3 E se ‵ma tou tagata ona ko ukau konā, faitalia me e ‵sali mai a ukau konā mai i tena koga tapu io me ko ‵pono i loto i ei, a ia e se ‵ma eiloa.

4 “So se moega e takato ki ei te tino telā e ‵sali mai i ei a ukau ka se ‵ma, kae ko so se mea e sagasaga a ia ki ei ka se ‵ma. 5 A te tagata e patele ki tena moega e ‵tau o ‵ta ana gatu, kae e ‵tau o koukou ki vai kae ka se ‵ma a ia ke oko ki te afiafi.+ 6 So se tino e sagasaga i luga i se mea telā ne sagasaga ki ei te tino e ‵sali mai i ei a ukau e ‵tau o ‵ta ana gatu, koukou ki vai, kae ka se ‵ma a ia ke oko ki te afiafi. 7 So se tino e patele ki te foitino o te tino e ‵sali mai i ei a ukau e ‵tau o ‵ta ana gatu, koukou ki vai, kae ka se ‵ma a ia ke oko ki te afiafi. 8 Kafai e puaki ne te tino telā e ‵sali mai i ei a ukau se tino e ‵ma, e ‵tau mo te tino tenā o ‵ta ana gatu, koukou ki vai, kae ka se ‵ma a ia ke oko ki te afiafi. 9 So se nofoga i luga i se manu telā ne sopo i ei te tino telā e ‵sali mai i ei a ukau ka se ‵ma eiloa. 10 So se tino e patele ki so se mea ne sagasaga i ei a te tino tenā, ka se ‵ma a ia ke oko ki te afiafi, kae ko so se tino e sau ne ia a mea konā e ‵tau o ‵ta ana gatu, koukou ki vai, kae ka se ‵ma a ia ke oko ki te afiafi. 11 Kafai e se ‵fulu ki vai a lima o se tino telā e ‵sali mai ei a ukau+ kae patele ki se tino, e ‵tau mo te tino tenā o ‵ta ana gatu, koukou ki vai, kae ka se ‵ma a ia ke oko ki te afiafi. 12 So se pōla kele e patele ki ei te tino e ‵sali mai i ei a ukau e ‵tau o ‵pei ke malipilipi, kae ko so se pōla lakau e ‵tau o ‵fulu ki vai.+

13 “‘Kafai ko se ‵sali te ukau kae ko ‵ma te tino mai i ei, tenā ko lau ei ne ia a aso e fitu e fai ei tena faka‵māga, kae e ‵tau mo ia o ‵ta ana gatu, koukou ki vai mai se vaipuna, ko ‵ma+ ei a ia. 14 I te valu o aso, e ‵tau o puke ne ia a lupe e lua io me ne punua lupe+ e lua, ko vau ei tou tagata ki mua o Ieova i te mataloa o te faleie o maopoopoga kae tuku atu a mea konā ki te faitaulaga. 15 Kae ka ofo atu ne te faitaulaga a manu konā, e tasi mo fai te taulaga mō agasala kae ko te suā manu mo fai te taulaga ‵sunu, ko fai ei ne te faitaulaga te faka‵māga mō te tino tenā i mua o Ieova e uiga ki ukau kolā ne ‵sali mai i a ia.

16 “‘Kafai se tagata ko ‵sali tena sua, e ‵tau mo ia o koukou ki vai kae ka se ‵ma a ia ke oko ki te afiafi.+ 17 E ‵tau mo ia o ‵ta ki vai so se gatu mo so se pa‵kili telā ne ‵sali ki ei te sua, kae ka se ‵ma a mea konā ke oko ki te afiafi.

18 “‘Kafai e ‵moe fakatasi se tagata mo se fafine kae ‵sali mai i ei a te sua, e ‵tau mo lāua o kou‵kou ki vai kae ka se ‵ma lāua ke oko ki te afiafi.+

19 “‘Kafai ko ‵tafe te sua o se fafine mai tena foitino, ka se ‵ma eiloa a ia i tena masaki fakafafine i aso e fitu.+ So se tino e patele ki tou fafine ka se ‵ma a ia ke oko ki te afiafi.+ 20 So se mea e takato a ia ki ei i te taimi e se ‵ma ei a ia i tena masaki fakafafine ka se ‵ma eiloa, kae ko so se mea e sagasaga a ia ki ei ka se ‵ma+ foki. 21 So se tino e patele ki tena moega e ‵tau o ‵ta ana gatu, koukou ki vai, kae ka se ‵ma a ia ke oko ki te afiafi. 22 So se tino e patele ki so se mea ne sagasaga a ia ki ei e ‵tau o ‵ta ana gatu, koukou ki vai, kae ka se ‵ma a ia ke oko ki te afiafi. 23 Kafai ne sagasaga a ia i luga i se moega io me se isi mea aka kae patele ki ei se tino ka se ‵ma eiloa a ia ke oko ki te afiafi.+ 24 Kae kafai se tagata e ‵moe mo tou fafine kae ‵pisi atu ki a ia te masaki fakafafine o tou fafine,+ ko se ‵ma ei a ia mō aso e fitu, kae ko so se moega e takato ki ei tou tagata ka se ‵ma eiloa.

25 “‘Kafai ko ‵tafe te sua o se fafine i aso e uke+ i te taimi telā e seki ‵tau ei o masaki fakafafine a ia,+ io me ko leva atu te taimi e ‵tafe ei tena sua i lō te leva masani o tena masaki fakafafine, ka se ‵ma eiloa a ia i aso konā e ‵tafe ei tena sua, e pelā eiloa mo aso e se ‵ma ei a ia i tena masaki fakafafine. 26 So se moega e takato ki ei tou fafine i aso e ‵tafe ei tena sua ka ‵pau eiloa mo te moega i te taimi e se ‵ma ei a ia i tena masaki fakafafine,+ kae ko so se mea e sagasaga tou fafine ki luga i ei ka se ‵ma eiloa e pelā mo te taimi e se ‵ma ei a ia i tena masaki fakafafine. 27 So se tino e patele ki mea konā ka se ‵ma, kae e ‵tau o ‵ta ana gatu, koukou ki vai, kae ka se ‵ma a ia ke oko ki te afiafi.+

28 “‘Kae kafai ko ‵ma a ia mai te ‵tafe o tena sua, ko lau ei ne ia a aso e fitu, ka oti ko ‵ma ei tou fafine.+ 29 I te valu o aso, e ‵tau o puke ne ia a lupe e lua io me ne punua lupe e lua,+ kae aumai ki te faitaulaga i te mataloa o te faleie o maopoopoga.+ 30 Ka ofo atu ne te faitaulaga a te manu e tasi e pelā me se taulaga mō agasala kae ko te suā manu e pelā me se taulaga ‵sunu, kae ka fai ne te faitaulaga se faka‵māga mō tou fafine i mua o Ieova ona ko tena tulaga sē ‵ma i te ‵tafe o tena sua.+

31 “‘Tela la, e ‵tau mo koulua o ‵vae faeloa a tino Isalaelu kea‵tea mai te lotou tulaga sē ‵ma, ko te mea ke se ‵mate latou i te lotou tulaga sē ‵ma i te fakalailaiga o toku faleie tapu telā e tu i te koga e ‵nofo ei latou.+

32 “‘Tenei te tulafono e uiga ki te tagata e ‵sali mai i ei a ukau, te tagata e se ‵ma ona ko te sua e ‵sali mai i ei,+ 33 te fafine i te taimi e se ‵ma i ei i tena masaki fakafafine,+ so se tagata io me se fafine e ‵sali mai i ei a sua i tena foitino,+ io me se tagata e ‵moe fakatasi mo se fafine sē ‵ma.’”