Te Muamua Tupu

19 Tenā ne fakamatala atu ei ne Aapo+ ki a Iesepela+ a mea katoa ne fai ne Elia mo te auala ne tamate ei ne ia a pelofeta katoa ki te pelu.+ 2 Tenā ne uga atu i ei ne Iesepela se avefekau ki a Elia, ana muna: “Ke fakasala eiloa au ne te kau atua kae fakaopoopo atu foki ki ei māfai e se fai ne au a koe ke ‵pau mo latou taki tokotasi i te taimi penei ma taeao!” 3 I konā ne mataku tou tagata, tu aka ei ki luga kae tele ke sao* a ia.+ Ne oko atu a ia ki Pelesepa,+ i Iuta,+ kae tiaki ne ia tena tavini i konā. 4 Ne fano a ia ki te koga lavaki i se ‵mao e ‵pau mo te aso e tasi ma faimalaga atu i ei kae sagasaga i lalo o te lakau ko te pulumu, kae fakamolemole atu ke na mate a ia. Ana muna: “Ko lava! I te taimi nei e Ieova, na ave kea‵tea toku ola,+ me e se sili atu au i oku tupuga.”

5 Tenā ne takato ifo ei a ia kae tō tena moe i lalo o te lakau ko te pulumu. Kae ne poi a ia i te agelu e fakapatele atu ki a ia+ kae fai atu: “Tu ki luga o kai.”+ 6 I te kiloatuga, ne lavea ne ia i tafa o tena ulu a te puta falaoa i luga i fatu ‵vela mo se tiā vai. Ne kai a ia kae inu kae toe takato ifo ki lalo. 7 Fakamuli ifo, ne foki mai te agelu a Ieova i te lua o taimi kae fakapatele atu ki a ia, ana muna: “Tu ki luga o kai, me ka faigata eiloa te malaga ki a koe.” 8 Ne tu aka a ia ki luga o kai kae inu, maua ei ne ia te malosi mai mea konā ke fanatu a ia i ao e 40 mo po e 40 ke oko ki te taimi ne oko ei a ia ki Holepa, te mauga o te Atua tonu.+

9 I konā ne ulu atu a ia ki se ana+ o moe i ei i te po tenā; kae kiloke! ne faipati mai a Ieova ki a ia, ana muna: “Ne a au mea e fai i konei, e Elia?” 10 Ne tali atu a ia: “Ne lasi ‵ki toku loto finafinau mō Ieova te Atua o kautau;+ me i tino Isalaelu ko oti ne tiaki ne latou tau feagaiga,+ ko oti ne ofa ne latou au fatafaitaulaga, kae tamate ne latou au pelofeta ki te pelu,+ kae ko au tokotasi fua tenei koi ‵toe. Nei la, ko taumafai latou o tamate au.”+ 11 Kae ne fai atu a ia: “Fano ki tua o tu i luga i te mauga i mua o Ieova.” Kae kiloke! a Ieova ne fakasili aka i ana mua,+ kae ko te matagi lasi kae malosi e vaevae mai ne ia a mauga kae ofa a kaupapa i mua o Ieova,+ kae ko Ieova e se nofo i loto i te matagi. I te otiga o te matagi, ne poko se mafuie,+ kae ko Ieova e se nofo i loto i te mafuie. 12 I te otiga o te mafuie, ne isi se afi,+ kae ko Ieova e se nofo i loto i te afi. I te otiga o te afi, ne isi se leo filemu kae malalo.+ 13 I te taimi eiloa ne lagona ei ne Elia te leo, ne ufi ana mata ki tena gatu fakapelofeta+ kae fano ki tua o tu i te mataloa o te ana. Tenā ne fesili atu ei se leo ki a ia: “Ne a au mea e fai i konei, e Elia?” 14 Ne tali atu a ia: “Ne lasi ‵ki toku loto finafinau mō Ieova te Atua o kautau; me i tino Isalaelu ko oti ne tiaki ne latou tau feagaiga,+ ko oti ne ofa ne latou au fatafaitaulaga, kae tamate ne latou au pelofeta ki te pelu, kae ko au tokotasi fua tenei koi ‵toe. Nei la, ko taumafai latou o tamate au.”+

15 Ne fai atu a Ieova ki a ia: “Toe foki, kae fano ki te koga lavaki o Tamaseko. Kafai e oko atu koe ki konā, ‵tofi aka a Hasaeli+ ke fai mo tupu o Sulia. 16 Kae e ‵tau o ‵tofi ne koe a Ieu+ te mokopuna o Nimesi ke fai mo tupu o Isalaelu, kae e ‵tau o ‵tofi ne koe a Elisaia* te tama tagata a Safata mai Apelu-meola ke fai pelā me se pelofeta o sui koe.+ 17 So se tino e sao mai te pelu a Hasaeli,+ ka tamate ne Ieu;+ kae ko so se tino e sao mai te pelu a Ieu ka tamate ne Elisaia.+ 18 Kae e toko 7,000 konā koi ‵toe i Isalaelu,+ ko latou kolā e seki punou o ifo ki a Paala+ kae seki sogi atu ki a ia.”+

19 Ne tiaki ne ia te koga tenā kae fano kae maua atu ne ia a Elisaia te tama tagata a Safata e fakamalū ne ia te laukele fakatasi mo ‵pea pulumakau tāgata e 12  i ana mua, kae ko ia e ‵tu fakatasi mo te ‵pea i te 12. Ne fanatu a Elia ki a ia kae ‵pei atu ki ei tena gatu fakapelofeta.+ 20 I konā ne tiaki ne ia a pulumakau tāgata kae tele atu i tua o Elia, ana muna: “Fakamolemole, talia mai ke fano au o sogi ki toku tamana mo toku mātua. Ka oti ko tautali atu ei au i a koe.” Ne tali atu a ia: “Fano, toe foki, ne a aku mea ne fai ke taofi ei koe?” 21 Tenā ne foki ei a ia, puke ne ia se avā pulumakau tāgata kae ofo atu ne ia, kae ne fakaaoga ne ia a te mea fakamalū laukele ke saka ki ei a ‵kano o pulumakau tāgata kae tuku atu ki tino, kae ne ‵kai ei latou. Oti aka ne tu aka a ia kae tautali atu i a Elia kae kamata o tavini atu ki a ia.+