Te Muamua Tupu

20 Ne fakamaopoopo ne te tupu o Sulia+ ko Peniata+ a tena kautau kātoa fakatasi mo nisi tupu e toko 32 mo olotou solofanua mo kaliota; ne fanaka a ia o nikoi+ a Samalia+ kae taua atu ki ei. 2 Tenā ne uga atu ei ne ia a avefekau ki te tupu o Isalaelu ko Aapo+ i te fakai tenā kae fai atu ki ei: “Konei a pati a Peniata ne fai mai, 3 ‘A siliva mo aulo a koe i a aku, e pelā foki mo au avaga fāfine mo au tama tāgata tafasili i te ‵lei.’” 4 Ne tali atu a te tupu o Isalaelu: “E ‵tusa mo au pati e te aliki te tupu, ko fai au mo ou tino fakatasi mo aku mea katoa.”+

5 Fakamuli ifo, ne toe ‵foki mai a avefekau kae fai atu: “Konei a pati a Peniata ne fai mai, ‘Ko avatu taku fekau tenei ki a koe: “A siliva mo aulo mo avaga fāfine mo tama tāgata a koe ka tuku mai ne koe ki a au.” 6 Kae i te taimi penei ma taeao ka uga atu ne au aku tavini ki a koe, kae ka iloilo faka‵lei ne latou tou fale mo fale katoa o au tavini, kae ko mea tāua katoa a koe ka puke ne latou o ave kea‵tea.’”

7 I konā loa, ne ‵kami mai ne te tupu o Isalaelu a toeaina katoa o te fenua kae fai atu: “Fakamolemole, onoono aka me i te tagata tenei e taumafai malosi o aumai te puapuaga, me ne manako mai a ia ki aku avaga, aku tama tāgata, aku siliva mo aku aulo, kae ne seki ‵teke ne au a ia.” 8 Tenā ne fai atu ei a toeaina mo tino katoa ki a ia: “Sa fakalogo ki ei, kae sa talia foki ne koe.” 9 Tenā ne fai atu ei a ia ki avefekau a Peniata: “Fai ki toku aliki te tupu penei, ‘A mea katoa ne manako muamua mai koe ki ei mai tau tavini ka fai eiloa ne au, kae ko te mea tenei e se mafai ne au o fai.’” I konā ne toe ‵foki ei a avefekau mo te fekau ki a ia.

10 Ne avatu ne Peniata a te fekau tenei ki a ia: “Ke fakasala eiloa au ne te kau atua kae fakaopoopo atu foki ki ei māfai e lava a ‵pefu i Samalia ke tuku atu ki tino katoa kolā e tau‵tali mai i a au se lima e ‵fonu i ‵pefu!” 11 Ne tali atu a te tupu o Isalaelu: “Fai ki ei, ‘A te tino telā e fatoa pei tena gatu tau e se ‵tau o faipati fakamatamata e uiga ki ana mea ka fai e pelā mo te tino telā e tapale kea‵tea tena gatu tau.’”+ 12 I tena logoga i te tali tenei, i te taimi ne inu ei a ia mo nisi tupu ke ko‵nā latou i olotou faleie,* ne fai atu a ia ki ana tavini: “Fakatoka o taua atu!” Tenā ne fakatoka ei latou o taua ki te fakai.

13 Kae ne fanatu se pelofeta ki te tupu o Isalaelu ko Aapo+ kae fai atu: “Konei a pati a Ieova ne fai, ‘E lavea ne koe te vaitino tenei? Ka tuku atu eiloa ne au a latou ki ou lima i te aso nei, kae ka iloa ei ne koe i a au ko Ieova.’”+ 14 Ne fesili atu a Aapo: “Ko oi e fai ne ia?” kae ne fai atu a ia: “Konei a pati a Ieova ne fai mai, ‘Ko tavini a pelenise o kogā fenua.’” Tenā ne fesili atu ei a ia: “Ko oi ka kamata ne ia te taua?” kae ne tali atu a ia: “Ko koe!”

15 Ne lau ne Aapo a tavini a pelenise o kogā fenua, kae e ‵tusa mo te toko 232; oti aka, ne lau ne ia a tāgata Isalaelu katoa, e toko 7,000. 16 Ne olo atu latou i te tutonu i te taimi ne inu ei a Peniata ke konā i loto i faleie* fakatasi mo tupu e toko 32 kolā e fesoasoani atu ki a ia. 17 I te taimi ne mua mai ei ki tua a tavini a pelenise o kogā fenua, ne uga fakavave atu ne Peniata a avefekau. Ne fai mai latou ki a ia: “E isi ne tāgata ne o‵mai mai Samalia.” 18 Tenā ne fai atu ei a ia: “Kafai e o‵mai latou mo te filemu, puke kae sa tamate; io me kafai ne o‵mai latou o taua, e ‵tau foki o puke ne koutou a latou kae sa tamate.” 19 Kae i te taimi ne oko mai ei a latou konei ki tua mo te fakai​—ko tavini a pelenise o kogā fenua mo te kautau kolā e tau‵tali i a latou​— 20 ne ‵ta ne latou taki tokotasi olotou fili. Tenā ne ‵tele ei a tino Sulia,+ kae afuli latou ne tino Isalaelu, kae ko te tupu o Sulia ko Peniata ne tele ke sao a ia i luga i se solofanua fakatasi mo nisi tāgata faka‵tele solofanua. 21 Kae ne fano a te tupu o Isalaelu kae ‵ta faeloa ne ia a te fili i luga i solofanua mo kaliota, kae ne fakatakavale masei ne ia a tino Sulia.

22 Fakamuli ifo, ne fanatu te pelofeta+ ki te tupu o Isalaelu kae fai atu ki ei: “Fano o fakamalosi aka a koe kae mafaufau me ne a au mea ka fai,+ me i te kamataga o te suā tausaga ka taua mai ei a te tupu o Sulia ki a koe.”+

23 Ne fai atu a tavini a te tupu o Sulia ki a ia: “A te lotou Atua se Atua o mauga. Tenā te pogai e ma‵losi atu ei latou i a tatou. Kae kafai e taua atu tatou ki a latou i se koga laugatasi, ka ma‵losi atu tatou i a latou. 24 Kae ke fai foki te mea tenei: Tapale kea‵tea a tupu katoa+ mai olotou tulaga, kae ke sui latou ne kovana. 25 Ko fakamaopoopo mai ei se kautau e ‵pau mo tau kautau ne galo, ke ‵pau eiloa te aofaki o solofanua mo te aofaki o kaliota. Ko taua atu ei tatou ki a latou i se koga laugatasi, kae e mautinoa me ka ma‵losi atu tatou i a latou.” Tenā ne fakalogo ei a ia ki te lotou manatu kae fai ne ia a mea katoa konā.

26 I te kamataga o te tausaga, ne fakamaopoopo mai ne Peniata a tino Sulia kae olo aka ki Afeka+ o taua atu ki Isalaelu. 27 Ne maopoopo foki a tino Isalaelu kae tuku atu ki ei a meakai, kae olo o taua atu ki a latou. I te taimi ne ‵nofo atu ei a tino Isalaelu i olotou mua, ne fai fua latou pelā me se avā lafu kouti fo‵liki, kae ko tino Sulia ne faka‵fonu eiloa ne latou te fenua kātoa.+ 28 Tenā ne fanatu ei te tagata o te Atua tonu ki te tupu o Isalaelu kae fai atu: “Konei a pati a Ieova ne fai, ‘Ona ko tino Sulia ne fai mai penei: “A Ieova se Atua o mauga, kae e sē se Atua o koga laugatasi,” ka tuku atu ne au ki ou lima a te vaitino katoa konei,+ kae ka iloa i ei ne koe i a au ko Ieova.’”+

29 Ne ‵nofo eiloa latou i olotou koga ‵nofo e fakafesagai te suā kautau ki te suā kautau mō aso e fitu, kae i te fitu o aso ne kamata ei te taua. Ne ‵ta ne tino Isalaelu e toko 100,000 sotia sa‵sale o Sulia i te aso e tasi. 30 Kae ko te ‵toega ne ‵tele ki Afeka,+ ki loto i te fakai. Kae ne siga ifo te ‵pui ki luga i tāgata e toko 27,000 kolā ne ‵toe. Ne tele kea‵tea foki a Peniata kae oko atu ki te fakai, kae ne ‵muni a ia i se potu tafa ki loto.

31 Ne fai atu ana tavini ki a ia: “Kiloke, a matou ne ‵logo me i tupu o kāiga o Isalaelu ne tupu e a‵lofa fakamagalo.* Fakamolemole, ke ‵sai ne tatou a gatu lautaga i ‵tou kautega kae tuku a lōpu ki luga i ‵tou ulu ko olo ei tatou ki te tupu o Isalaelu. E se taumate ka faka‵sao ne ia ‵tou ola.”+ 32 Tenā ne ‵sai ei ne latou a gatu lautaga i olotou kautega mo lōpu i olotou ulu kae olo atu ki te tupu o Isalaelu kae fai atu: “A tau tavini ko Peniata ne fai mai, ‘Fakamolemole tuku mai au ke ola.’” Ne tali atu tou tagata: “Koi ola a ia? A ia ko toku taina.” 33 Ne ma‵natu aka a tāgata konā me se mea ‵lei te mea tenā, kae ne mafau‵fau latou me tenā eiloa tena fakaikuga, tenā ne fai atu ei latou: “A Peniata ko tou taina.” Ne fai atu a ia: “Olo o puke mai a ia.” Tenā ne fanatu ei a Peniata ki a ia, kae ne fai ne Aapo ke sopo ki luga i te kaliota.

34 Ne fai atu a Peniata ki a ia: “A fakai ne puke ne toku tamana mai tou tamana ka faka‵foki atu ne au, ko mafai ei ne koe o faka‵tu a maketi mō koe i Tamaseko, e pelā eiloa mo mea ne fai ne toku tamana i Samalia.”

Ne tali atu a Aapo: “Ona ko te feagaiga tenei, ko fakasaoloto ei ne au koe ke fano.”

I konā ne fai ei ne lāua se feagaiga kae tuku atu a ia ke fano.

35 E auala i te fakatonuga a Ieova, ne fai atu se tokotasi o tama tāgata a te kau pelofeta*+ ki tena taugasoa: “Ta aka au, fakamolemole.” Kae ne ita te tagata tenā ma ta a ia. 36 Ne fai atu a ia ki tou tagata: “Ona ko koe ne seki fakalogo ki te leo o Ieova, i te taimi eiloa e tiaki ei ne koe au, ka tamate koe ne se leona.” I te tiakinaga ne tou tagata a ia, ne vau se leona ki a ia tamate ei a ia.

37 Ne maua ne ia te suā tagata kae ne fai atu: “Ta aka au, fakamolemole.” Tenā ne ta ei a ia ne te tagata tenā, pakia ei a ia.

38 Tenā ne fanatu ei te pelofeta o faka‵tali ki te tupu i tafa o te auala, kae fusi se litaga i ana mata ko te mea ke se iloa a ia ne tino. 39 I te taimi ne vau ei te tupu, ne kalaga atu a ia ki te tupu: “A tau tavini ne nofo i te taimi ne fai masei ei te taua kae e isi se tagata ne aumai ne ia te suā tagata ki a au kae fai mai, ‘Tausi te tagata tenei. Kafai e galo a ia, ka sui ne koe a tena ola ki tou ola,+ io me ka ‵togi ne koe se taleni* siliva e tasi.’ 40 Kae i te taimi ne fakalavelave malosi ei tau tavini, ne galo fakavave a te tagata tenā.” Ne fai atu te tupu o Isalaelu ki a ia: “Tenā eiloa tou fakamasinoga; ko oti eiloa ne fai ne koe tou fakaikuga.” 41 Tenā ne tapale fakavave ei ne ia a litaga mai ana mata, kae ne iloa ne te tupu o Isalaelu i a ia se tokotasi o te kau pelofeta.+ 42 Ne fai atu a ia ki tou tagata: “Konei a pati a Ieova ne fai, ‘Ona ko te mea ne fakasao ne koe a te tagata ne fai atu au ke tamate,+ ka sui ne koe a tena ola ki tou ola,+ kae ka sui ne ou tino ana tino.’”+ 43 I konā ne fano ei te tupu o Isalaelu ki tena fale i Samalia,+ ko oko eiloa i te mafatia kae e se fiafia.