Te Lua Tupu
14 I te lua o tausaga o te pulega a Ioasa+ te tama tagata a Ioasasa te tupu o Isalaelu, ne fai ei a Amasia te tama tagata a te tupu o Iuta ko Ioasa mo fai te tupu. 2 Ko 25 ana tausaga i te taimi ne fai ei a ia mo tupu, kae ne pule a ia i Ielusalema i tausaga e 29. A te igoa o tena mātua ko Ieoatini mai i Ielusalema.+ 3 Ne tumau a ia i te faiga o te mea tonu i te kilokiloga a Ieova, kae e se ‵pau mo tena tupuga ko Tavita.+ Ne fai ne ia a mea katoa e pelā mo mea ne fai ne tena tamana ko Ioasa.+ 4 Kae ko koga ma‵luga ne seki fakaseai,+ kae ko tino koi ofo atu eiloa a taulaga kae fai ke fanaka te au mai olotou taulaga i luga i koga ma‵luga konā.+ 5 I te taimi eiloa ko ‵mautakitaki ei a tena pulega i te malo, ‵ta ei ne ia ana tavini kolā ne ‵ta ne latou tena tamana te tupu.+ 6 Kae ne seki tamate ne ia a tama tāgata a tino tatino konei, e ‵tusa mo te fakatonuga a Ieova telā ne tusi i te tusi o Tulafono a Mose: “E se ‵tau o tamate a tamana ona ko olotou tama tāgata, kae e se ‵tau o tamate a tama tāgata ona ko olotou tamana; kae e ‵tau o tamate a tino taki tokotasi ona ko olotou agasala totino.”+ 7 Ne ‵ta ne ia tino Etoma+ i te Vanu o Masima,+ e toko 10,000 tāgata, kae puke ne ia a Selaa i te taua,+ kae ne fakaigoa a te koga tenā ki a Iokoteli ke oko mai ki te aso nei.
8 Tenā ne uga atu ei ne Amasia a avefekau ki a Ioasa te tama tagata a Ioasasa te tama tagata a Ieu te tupu o Isalaelu, ana muna: “Vau ke taua aka tāua.”*+ 9 Ne avatu ne te tupu o Isalaelu ko Ioasa a te fekau tenei ki te tupu o Iuta ko Amasia: “A te mouku talatala o Lepanona ne avatu tena fekau ki te alasi o Lepanona, ‘Tuku mai tau tama fafine mo fai te avaga a taku tama tagata.’ Kae ne vau se manu fekai o Lepanona kae lakalaka ne ia ki lalo a te mouku talatala. 10 E tonu, ko oti ne ta ne koe a Etoma,+ tela la, ko ‵fonu tou loto i te fia sili. Ke fiafia koe ki tou tulaga fakaaloalo kae nofo eiloa i tou fale.* Kaia e fakamāfua ei ne koe se fakalavelave telā ka takavale ei koe, kae fai ei ke pakū a Iuta fakatasi mo koe?” 11 Kae ko Amasia ne seki fakalogo.+
Tenā ne fanaka ei a te tupu o Isalaelu ko Ioasa, kae ne fe‵paki lāua mo te tupu o Iuta ko Amasia i te taua i Peta-semese+ i Iuta.+ 12 Ne fakatakavale a Iuta ne Isalaelu, tenā ne ‵tele kea‵tea ei a tino taki tokotasi ki olotou fale.* 13 Ne puke fakapagota ne te tupu o Isalaelu ko Ioasa a te tupu o Iuta ko Amasia, te tama tagata a Ioasa te tama tagata a Aasaia, i Peta-semese. Tenā ne o‵mai ei latou ki Ielusalema, kae ne ofa ne ia te ‵pui o Ielusalema i se 400 kupita* mai te Mataloa o Efalaima+ ke oko ki te Mataloa o Matulimanu.+ 14 Ne puke ne ia a aulo mo siliva katoa mo mea katoa kolā ne maua i loto i te fale o Ieova mo potu ‵teu koloa i te fale o te tupu, e pelā foki mo tino kolā ne puke fakapagota. Tenā ne toe foki ei a ia ki Samalia.
15 Kae ko te tala fakasolopito kātoa o Ioasa, ana mea ne fai mo tena malosi katoatoa mo te auala ne taua ei a ia ki te tupu o Iuta ko Amasia, e a, e se tusi katoa i te tusi o tala fakasolopito i taimi o tupu o Isalaelu? 16 Tenā ne takato ifo ei a Ioasa o malō‵lo fakatasi mo ana tupuga kae ne tanu i Samalia+ fakatasi mo tupu o Isalaelu; kae ko tena tama tagata ko Ielopoamo*+ ne fai mo tupu e sui ei a ia.
17 Amasia+ te tama tagata a Ioasa te tupu o Iuta ne ola i tausaga e 15 mai tua o te mate o Ioasa+ te tama tagata a Ioasasa te tupu o Isalaelu.+ 18 Kae ko te tala fakasolopito kātoa o Amasia, e a, e se tusi katoa i te tusi o tala fakasolopito i taimi o tupu o Iuta? 19 Fakamuli ifo, ne fai se togafiti ke ‵teke atu ki a ia+ i Ielusalema, kae ne tele a ia ki Lakisa, kae ne uga atu ne latou ne tāgata i ana tua ki Lakisa o tamate a ia i konā. 20 Tenā ne fakafoki ei ne latou a ia i luga i solofanua, kae ne tanu a ia i Ielusalema fakatasi mo ana tupuga i te Fakai o Tavita.+ 21 Tenā ne puke ei ne tino Iuta katoa a Asalia*+ telā ko 16 ana tausaga,+ kae fai a ia mo tupu e sui ei a tena tamana ko Amasia.+ 22 Ne toe faite ne ia a Elata+ kae fakafoki atu ki Iuta mai tua o te takatoifoga a te tupu* o malō‵lo fakatasi mo ana tupuga.+
23 I te 15 tausaga o te pulega a Amasia te tama tagata a Ioasa te tupu o Iuta, ne fai a Ielopoamo+ te tama tagata a te tupu o Isalaelu ko Ioasa mo fai te tupu i Samalia, kae ne pule a ia i tausaga e 41. 24 Ne tumau a ia i te faiga o mea ma‵sei i te kilokiloga a Ieova. Ne seki tiaki ne ia a agasala katoa ne fai ne Ielopoamo te tama tagata a Nepata kolā ne fai ei a Isalaelu ke agasala.+ 25 Ne fakafoki atu ne ia te tuakoi o Isalaelu mai Lepo-hamata*+ ke oko atu ki te Tai o te Alapaa,*+ e ‵tusa mo pati a Ieova te Atua o Isalaelu ne fai e auala i tena tavini ko Iona+ te tama tagata a Amitai, te pelofeta mai Kata-hefelu.+ 26 Me ne lavea ne Ieova te puapuaga o tino Isalaelu.+ E seai se tino ne ‵toe mai ke fesoasoani ki Isalaelu, ke oko eiloa ki se tino sē malosi io me se tino vāivāi. 27 Kae ne tauto a Ieova ke se ‵solo kea‵tea te igoa o Isalaelu mai lalo o te lagi.+ Tenā ne faka‵sao ei ne ia latou e auala i te lima o Ielopoamo te tama tagata a Ioasa.+
28 Kae ko te tala fakasolopito kātoa o Ielopoamo, ana mea katoa ne fai mo tena malosi katoatoa, mo te auala ne taua atu ei a ia mo te auala ne fakafoki atu ne ia a Tamaseko+ mo Hamata+ ki Iuta i Isalaelu, e a, e se tusi katoa i te tusi o tala fakasolopito o taimi o tupu o Isalaelu? 29 Tenā ne takato ifo ei a Ielopoamo o malō‵lo fakatasi mo ana tupuga, mo tupu o Isalaelu; kae ko tena tama tagata ko Sakalia+ ne fai mo tupu e sui ei a ia.