Te Muamua Samuelu

14 I te aso e tasi ne fai atu a Ionatana+ te tama tagata a Saulo ki tena tavini telā e ave ne ia ana meatau: “Vau ke olo tāua ki te potukau leoleo o tino Filisitia i te suā feitu.” Kae ne seki fakailoa ne ia te mea tenā ki tena tamana. 2 A Saulo e nofo i koga i tua o te fakai o Kipea+ i lalo o te lakau ko te pomekalanite i Mikilone, kae ‵tusa mo te toko 600 tāgata ne ‵nofo mo ia.+ 3 (Kae ko Aita te tama tagata a Aitupa,+ te taina o Ikapoti,+ te tama tagata a Fineaso,+ te tama tagata a Eli,+ te faitaulaga a Ieova i Sailo,+ ne pei ki te efota.)+ Kae e se iloa ne tino i a Ionatana ko oti ne fano. 4 I te va o auala kolā ne taumafai a Ionatana o fanatu i ei ke oko atu ki te potukau leoleo o tino Filisitia, e isi se kaupapa e pelā me se nifo i te feitu e tasi mo te suā kaupapa e pelā me se nifo i te suā feitu; a te igoa o te kaupapa e tasi ko Posese, kae ko te igoa o te suā kaupapa ko Senē. 5 A te kaupapa e tasi e tu pelā me se pou i te feitu ki mātū kae saga atu ki Mekemase, kae ko te suā kaupapa e tu i te feitu ki saute kae saga atu ki Kepa.+

6 Tenā ne fai atu ei a Ionatana ki tena tino ave meatau: “Vau ke olo tāua ki te koga tenā e ‵nofo ei a tāgata e seki pilitome.+ E se taumate ka fesoasoani mai a Ieova ki a tāua, me e seai se mea e mafai o taofi aka ei a Ieova mai te faka‵saoga o tino faitalia me tokouke latou io me ne nai tino fua.”+ 7 Ne fai atu a tena tino ave meatau ki a ia: “Fai so se mea e loto koe ki ei. Fano ki so se koga e manako koe ki ei, kae ka tautali atu au i a koe ki so se koga e loto koe ki ei.” 8 Tenā ne fai atu ei a Ionatana: “A tāua ka olo ki tāgata konā kae faka‵sae atu ki a latou. 9 Kafai e fai mai latou ki a tāua, ‘‵Tu malie ke oko atu matou ki a koulua!’ ko tāua eiloa ko ‵tu i te koga tenā kae e se olo atu ki a latou. 10 Kae kafai e fai mai latou, ‘O‵mai o taua mai ki a matou!’ ko tāua loa ko olo atu, me ka tuku mai ne Ieova a latou ki tā lima. Tenei eiloa te fakailoga mō tāua.”+

11 Tenā ne faka‵sae atu ei lāua ki te potukau leoleo o tino Filisitia. Ne fai atu a tino Filisitia: “Kiloke! A tino Epelu ko o‵mai ki tua mo pūga kolā ne ‵muni ei latou.”+ 12 Ne fai atu a tāgata i te potukau leoleo ki a Ionatana mo tena tino ave meatau: “O‵mai o taua mai ki a matou, kae ka lavea ne koulua te mea ka fai atu ne matou!”+ I konā eiloa ne fai atu a Ionatana ki tena tino ave meatau: “Tautali mai i a au, me ka tuku mai ne Ieova a latou ki lima o tino Isalaelu.”+ 13 Kae ne kake aka a Ionatana ki ana lima mo ana vae, kae ko tena tino ave meatau e vau i ana tua; kae ne ‵ta ne Ionatana a tino Filisitia, kae tamate latou ne tena tino ave meatau mai i ana tua. 14 I te taimi muamua ne taua atu ei a Ionatana mo tena tino ave meatau, ne ‵ta ne lāua a tāgata kāti e toko 20 i loto i se āfa eka o te laukele* telā ko oti ne fakamalū.

15 Tenā ne ma‵taku ei a tino i te kogā fenua tenā e pelā foki mo tino katoa i te potukau leoleo, ke oko foki eiloa ki te kau ‵fao mea+ ne ma‵taku katoa. Ne kamata o galulu te laukele, kae ma‵taku a tino i te Atua. 16 Ne lavea ne tāgata leoleo a Saulo i Kipea+ i Peniamina a te ‵numi valevale o tino Filisitia.+

17 Ne fai atu a Saulo ki tino ne ‵nofo mo ia: “Fakamolemole, lau aka a tino, me ko oi e ‵galo i a tatou.” I te otiga ne lau a tino, ne iloa aka me i a Ionatana mo tena tino ave meatau e ‵galo. 18 Ne fai atu a Saulo ki a Aita:+ “Aumai te Pusa a te Atua tonu ke pili mai!” (Me i te Pusa a te Atua tonu ne ‵nofo mo tino Isalaelu i te taimi tenā.*) 19 Kae i te taimi e faipati ei a Saulo ki te faitaulaga, kae ne gasolo aka eiloa o lasi atu te ‵numi valevale o tino Filisitia i te lotou koga ‵nofo. Tenā ne fai atu ei a Saulo ki te faitaulaga: “Taofi tau mea tenā e fai.”* 20 Ne maopoopo fakatasi a Saulo mo tino katoa ne ‵nofo mo ia kae olo atu o taua, kae maua atu ne latou a tino Filisitia ko fakatau taua i a latou eiloa, kae ko gasolo eiloa o lasi te ‵numi valevale o tino. 21 Ke oko foki ki tino Epelu kolā ne ‵kau muamua ki tino Filisitia kae olo atu mo latou ki te lotou koga ‵nofo, ko olo atu eiloa ki Isalaelu o ‵kau ki a Saulo mo Ionatana. 22 A tāgata Isalaelu katoa kolā ne ‵muni+ i te koga maugā o Efalaima ne ‵logo i tino Filisitia ko ‵tele, kae ne ‵kau atu foki latou ki te taua o afuli latou. 23 Tenā ne fakasao ei ne Ieova a Isalaelu i te aso tenā,+ kae ne oko atu eiloa te taua ki Petavene.+

24 Kae ko tāgata Isalaelu ne fi‵ta malosi i te aso tenā, me ne fai ne Saulo ke tauto latou penei: “Ke malaia te tagata e kai ki se meakai a koi tuai o oko ki te afiafi kae ke oko foki ki te taimi e avatu ei ne au te taui ma sui ki oku fili!” Tenā ne seki ai eiloa se tino ne kai ki ne meakai.+

25 Kae ko tino* katoa ne oko atu ki te vao, kae maua ne latou a hani i te laukele. 26 I te taimi ne oko mai ei a tino ki te vao, ne lavea ne latou a hani e sali‵sali i ei, kae seai eiloa se tino ne kai ki hani, me ne ma‵taku latou i te tautoga ko oti ne fai ne latou. 27 Kae ne seki logo a Ionatana i tena tamana ne fakatauto ne ia a tino,+ tenā ne fakapatele atu ei ne ia te mata o tena tokotoko i tena lima ki loto i hani konā. I te taimi ne kai a ia ki ei, ‵pula ei ana mata. 28 I konā ne fai aka ei se tino e tokotasi: “A tou tamana ne fakatauto ne ia a tino, ana muna, ‘Ke malaia te tagata e kai ki ne meakai i te aso nei!’+ Tenā te pogai ko fi‵ta malosi ei a tino.” 29 Kae ne fai atu a Ionatana: “Ko oti ne aumai ne toku tamana a fakalavelave e uke ki te fenua. Kilo mai la ki te ‵pula ‵lei o oku mata ona ko au ne tami ki mu hani. 30 E sili atu i te ‵lei moi fai ne saoloto ke ‵kai a tino+ i te aso nei mai mea ne maua ne latou i te taua! Moi penei e tokouke atu foki a tino Filisitia ne mafai o tamate.”

31 I te aso tenā ne ‵ta faeloa ne latou a tino Filisitia mai Mekemase ke oko atu ki Aitialona,+ kae ne fi‵ta malosi eiloa a tino. 32 Tenā ne kamata ei o ‵tele fakavave atu a tino mo te kaima‵nako o puke a mea ne maua i te taua, kae ne puke ne latou a mamoe mo pulumakau mo tamā pulumakau kae tamate ne latou i te laukele, kae ‵kai ne latou a ‵kano fakatasi mo toto i ei.+ 33 Ne oko atu se lipoti ki a Saulo: “Kiloke! A tino ko agasala ki a Ieova mai te ‵kai ki ‵kano o manu mo toto i ei.”+ Kae ne fai atu a ia: “A koutou ko se fakamaoni. Fakateka fakavave mai se fatu lasi ki a au.” 34 Tenā ne fai atu ei a Saulo: “Olo atu ki tino katoa kae fai atu ki a latou, ‘E ‵tau mo koutou taki tokotasi o aumai se pulumakau tagata mo se mamoe kae tamate i konei ko kai ei. Ke mo a ma agasala koutou i mua o Ieova mai te ‵kai ki ‵kano o manu mo toto i ei.’”+ Tenā ne aumai ei ne tino taki tokotasi olotou pulumakau tāgata i te po tenā kae tamate i konā. 35 Kae ne faite ne Saulo se fatafaitaulaga ki a Ieova.+ Tenei eiloa te fatafaitaulaga muamua ne faite ne ia ki a Ieova.

36 Ne fai fakamuli atu a Saulo: “Tatou ka olo ifo o afuli a tino Filisitia i te po kae ‵fao olotou mea ke oko ki te taimi ko maina mai ei te tafataeao. Ka seai eiloa se tino e fakasao ne tatou.” Kae ne fai atu latou: “Fai so se mea telā e ‵lei i tau kilokiloga.” Kae ne fai atu te faitaulaga: “Ke fesili aka tatou ki te Atua tonu i konei.”+ 37 Kae ne fesili atu a Saulo ki te Atua: “E mata, e ‵tau o fanaifo au o afuli a tino Filisitia?+ E mata, ka tuku mai ne koe latou ki lima o tino Isalaelu?” Kae ne seki tali atu te Atua ki a ia i te aso tenā. 38 Ne fai atu a Saulo: “O‵mai ki konei, koutou katoa takitaki o tino, kae ‵sala aka me se a te agasala ne fai ne tatou i te aso nei. 39 Ona ko Ieova e ola, telā ne faka‵sao ne ia a Isalaelu, faitalia me ko Ionatana taku tama ne fai ne ia te mea tenei, e ‵tau eiloa o tamate a ia.” Kae seai eiloa se tino ne tali atu ki a ia. 40 Tenā ne fai atu ei a ia ki tino Isalaelu katoa: “A koutou ka ‵tu i te feitu e tasi kae ko māua mo taku tama ko Ionatana ka ‵tu i te suā feitu.” I konā ne fai atu ei a tino ki a Saulo: “Fai so se mea e ‵lei i tau kilokiloga.”

41 Tenā ne fai atu ei a Saulo ki a Ieova: “Te Atua o Isalaelu, tali mai aka e auala i te Tumema!”+ Tenā ne filifili ei a Ionatana mo Saulo, kae ne fakasaoloto atu a tino ke olo. 42 Ne fai atu a Saulo: “Fai aka ne vili+ ke filifili aka me ko oi i a māua mo taku tama ko Ionatana.” Kae ne filifili ei a Ionatana. 43 Muna a Saulo ki a Ionatana: “Fai mai ki a au, se a te mea ne fai ne koe?” Ne fai atu a Ionatana ki a ia: “Au ne tami malie fua ki mu hani i te mata o te tokotoko i toku lima.+ Tenei au! Au ko toka o mate!”

44 I konā loa ne fai atu a Saulo: “Ke fakasala faeloa au ne te Atua māfai e se mate koe, e Ionatana.”+ 45 Kae ne fai atu a tino ki a Saulo: “E mata, e ‵tau eiloa o mate a Ionatana, ko te tino ne aumai ne ia te manumaloga*+ lasi tenei ki Isalaelu? E se taitai eiloa! Ona ko Ieova e ola, e se ‵tau eiloa o tō ki te laukele se laulu e tasi mai tena ulu, me i te Atua ne fesoasoani atu ki a ia i te aso nei.”+ Tenā ne fakasao ei ne tino a Ionatana, kae ne seki mate a ia.

46 Ne seki toe afuli eiloa ne Saulo a tino Filisitia, kae ne olo atu a tino Filisitia ki te lotou fenua.

47 Ne faka‵mautakitaki ne Saulo te pulega fakatupu i Isalaelu kae taua atu ki ana fili katoa i koga katoa, ki tino Moapi,+ tino Amoni,+ tino Etoma,+ tupu o Sopa,+ mo tino Filisitia;+ kae ko so se koga ne fano a ia ki ei ne fakatakavale ne ia latou. 48 Kae ne taua atu a ia mo te loto toa kae fakatavale a tino Amaleka+ kae faka‵sao a tino Isalaelu mai lima o tino ‵fao mea.

49 A igoa o tama tāgata a Saulo ko Ionatana, Isivi mo Malekisua.+ Kae e tokolua ana tama fāfine; a te igoa o te tamaliki matua ko Melapa,+ kae ko te igoa o te tamaliki foliki ko Mekala.+ 50 A te igoa o te avaga a Saulo ko Ainoama te tama fafine a Aimaasu. A te igoa o tena takitaki kautau ko Apinelu+ te tama tagata a Nelu, te fakatamana o Saulo. 51 A Kiso+ ko te tamana o Saulo, kae ko Nelu+ te tamana o Apinelu ko te tama tagata a Apielu.

52 Ne taua malosi a latou mo tino Filisitia i aso katoa o Saulo.+ Kafai e lavea ne Saulo se tagata mafi kae loto toa e puke mai ne ia ki tena kautau.+