Levitiko

13 Ne toe faipati atu a Ieova ki a Mose mo Alona, ana muna: 2 “Kafai e sae aka i te pa‵kili o se tagata* se mea faka‵pusa, se matakili, io me se ila, kae e mafai o māfua mai ei te masaki ko te lepela*+ i tena pa‵kili, e ‵tau o avatu a ia ki te faitaulaga ko Alona io me ki se tino e tokotasi o ana tama tāgata, kolā ko faitaulaga.+ 3 Ka iloilo ne te faitaulaga a te matakili i luga i tena pa‵kili. Kafai a fulufulu i luga i te matakili ko lanu ‵kena kae e foliga mai me ko ‵poko atu te matakili i te pa‵kili, a te mea tenā ko te masaki ko te lepela. Ka iloilo eiloa ne te faitaulaga ko fakailoa atu ei ne ia me e se ‵ma te tagata tenā. 4 Kae kafai a te ila i luga i te pa‵kili e lanu ‵kena kae e foliga mai me e se ‵poko atu i te pa‵kili kae ko fulufulu i ei e se ‵kena, ko ‵tau ei o ‵vae kea‵tea ne te faitaulaga a te tagata tenā mō aso e fitu.+ 5 Tenā ka iloilo ei ne te faitaulaga a te tagata tenā i te fitu o aso, kae kafai e foliga mai me ko mafu te matakili kae e seki ‵solo atu i luga i te pa‵kili, e ‵tau o toe ‵vae kea‵tea ne te faitaulaga a te tagata tenā mō nisi aso e fitu.

6 “E ‵tau o iloilo ne te faitaulaga a te tagata tenā i te fitu o aso, kae kafai ko mafu te matakili kae seki ‵solo atu i luga i te pa‵kili, ka fakailoa atu ne te faitaulaga me ko ‵ma a te tagata tenā;+ kae ko te mea tenā se matakili fua. Ko ‵ta ei ne te tagata tenā ana gatu, ko ‵ma ei a ia. 7 Kae kafai ko oti ne ‵solo atu a te matakili tenā i luga i te pa‵kili mai tua o tena tuatuga i mua o te faitaulaga ke fai tena faka‵māga, ko ‵tau ei o fanatu a ia o toe tu* i mua o te faitaulaga. 8 Ka iloilo ne te faitaulaga a te matakili tenā, kae kafai ko ‵solo atu ki loto i te pa‵kili, ko fakailoa atu ei ne te faitaulaga me ko se ‵ma a te tino tenā. A te mea tenā se lepela.+

9 “Kafai ko kamata o poko se tagata i te masaki ko te lepela, e ‵tau o avatu a ia ki te faitaulaga, 10 kae ka iloilo+ a ia ne te faitaulaga. Kafai e isi se mea faka‵pusa ‵kena i luga i tena pa‵kili kae ko fai ei ke lanu ‵kena a fulufulu i ei, kae ko isi se mea ‵pala+ i luga i te mea faka‵pusa tenā, 11 a te mea tenā se lepela aveave ‵loa i tena pa‵kili, kae ka fakailoa atu ne te faitaulaga i te tino tenā e se ‵ma. E se ‵tau o ‵vae kea‵tea ne ia tou tagata,+ me i a ia e se ‵ma. 12 Kafai ko ‵solo atu a te lepela ki luga i te pa‵kili kātoa, kae ko salalau atu te lepela i te foitino o te tino mai luga i tena ulu ke oko ki ana vae, e ‵tusa mo te mea e lavea ne te faitaulaga, 13 kae ko oti ne iloilo ne te faitaulaga kae lavea ne ia me ko soko te pa‵kili o te tino tenā i te lepela, ko fakailoa atu ei ne ia i te tino tenā ko ‵ma.* Ko ‵kena katoa a tena pa‵kili kae ko ‵ma foki a ia. 14 Kae kafai eiloa ko sae aka se mea ‵pala i luga i ei, ko se ‵ma ei a ia. 15 Kafai e lavea ne te faitaulaga a te mea ‵pala tenā, ko fakailoa atu ei ne ia me i te tino tenā e se ‵ma.+ E se ‵ma a te mea ‵pala tenā. A te mea tenā se lepela.+ 16 Kae kafai ko toe lanu ‵kena a te mea ‵pala tenā, e ‵tau o fanatu a ia ki te faitaulaga. 17 Ka iloilo ne te faitaulaga a ia,+ kae kafai ko lanu ‵kena a te matakili tenā, ko fakailoa atu ei ne te faitaulaga me ko ‵ma a te tino masaki tenā. Ko ‵ma eiloa a ia.

18 “Kafai e tupu aka se fakafoa i te pa‵kili o se tino kae mafu, 19 kae sae aka se mea faka‵pusa io me se ila lanu kula‵kula kae kena‵kena i te koga ne tu ei te fakafoa, e ‵tau mo ia o fakaasi atu a ia ki te faitaulaga. 20 Ka iloilo ne te faitaulaga a te mea tenā,+ kae kafai e foliga mai me e ‵poko atu i te pa‵kili kae ko fulufulu i ei ko lanu ‵kena, ko fakailoa atu ei ne te faitaulaga i tou tagata ko se ‵ma. A te mea tenā ko te masaki ko te lepela telā ko sae aka i te koga ne tu ei te fakafoa. 21 Kae kafai e iloilo ne te faitaulaga kae lavea ne ia me e seai ne fulufulu ‵kena i ei kae e se ‵poko atu i te pa‵kili kae foliga mai me ko matafi tena lanu, ko ‵vae kea‵tea ei a ia ne te faitaulaga mō aso e fitu.+ 22 Kae kafai e lavea faka‵lei atu me ko ‵solo atu i luga i te pa‵kili, ko fakailoa atu ei ne te faitaulaga me i te tino tenā e se ‵ma. A te mea tenā se masaki. 23 Kae kafai e tumau eiloa a te ila tenā i te koga e tasi kae e se ‵solo, a te mea tenā ko te ‵fulaga fua o te fakafoa, kae ka fakailoa atu ne te faitaulaga me i te tino tenā e ‵ma.+

24 “Io me kafai e isi se koga ‵pula o se tino i te ‵pakuga i te afi, kae ko kamata o fai a ‵kano i te koga ‵pula tenā e pelā me se ila lanu kula‵kula kae kena‵kena io me ‵kena eiloa, 25 ka iloilo ne te faitaulaga a te mea tenā. Kafai ko lanu ‵kena a fulufulu i luga i te ila tenā kae foliga mai me e ‵poko atu i te pa‵kili, a te mea tenā se lepela telā ko sae aka i te koga ‵pula, kae ka fakailoa atu ne te faitaulaga me i te tino tenā e se ‵ma. A te mea tenā ko te masaki ko te lepela. 26 Kae kafai e iloilo ne te faitaulaga a te mea tenā kae lavea ne ia me e seai ne fulufulu ‵kena i luga i te ila tenā kae e se ‵poko atu i te pa‵kili, kae ko matafi tena lanu, ka ‵vae kea‵tea a ia ne te faitaulaga mō aso e fitu.+ 27 Ka iloilo ne te faitaulaga a te tagata tenā i te fitu o aso, kae kafai e lavea atu me ko oti ne ‵solo atu i luga i te pa‵kili, ka fakailoa atu ne te faitaulaga me i te tino tenā e se ‵ma. A te mea tenā ko te masaki ko te lepela. 28 Kae kafai e tumau eiloa a te ila tenā i te koga e tasi kae e seki ‵solo atu i luga i te pa‵kili kae ko matafi tena lanu, a te mea tenā ko te ‵fulaga fua o te koga ‵pula, kae ka fakailoa atu ne te faitaulaga me i te tino tenā ko ‵ma, me i te mea tenā se ‵fulaga fua o te koga ‵pula.

29 “Kafai ko sae aka se matakili i luga i te ulu io me ko te kauvae o se tagata io me se fafine, 30 ka iloilo ne te faitaulaga a te matakili tenā.+ Kafai e foliga mai me e ‵poko atu i te pa‵kili, kae ko fulufulu i luga i ei e lanu segasega kae manifinifi, ko fakailoa atu ei ne te faitaulaga me i te tino tenā e se ‵ma; a te mea tenā se matakili i luga i te ulu io me i te talafa. A te mea tenā ko te lepela i te ulu io me i te kauvae. 31 Kae kafai e lavea ne te faitaulaga i te matakili e se ‵poko atu i te pa‵kili kae e seai foki ne fulufulu uli i ei, e ‵tau o ‵vae kea‵tea ne te faitaulaga a te tino masaki mō aso e fitu.+ 32 Ka iloilo ne te faitaulaga a te matakili tenā i te fitu o aso, kae kafai e seki ‵solo atu a te matakili tenā kae seai foki ne fulufulu ‵sega e ‵sae aka i ei kae e se ‵poko atu a te matakili i te pa‵kili, 33 e ‵tau o ‵vele kea‵tea ana fulufulu, kae ke mo a ma ‵vele a te koga telā e tu ei te matakili. Tenā ko ‵vae kea‵tea ei ne te faitaulaga a te tino masaki mō aso e fitu.

34 “Ka toe iloilo ne te faitaulaga a te matakili tenā i te fitu o aso, kae kafai e seki ‵solo atu a te matakili i te ulu mo te talafa ki te pa‵kili kae e foliga mai me e se ‵poko atu i te pa‵kili, e ‵tau o fakailoa atu ne te faitaulaga me ko ‵ma te tino tenā, kae e ‵tau o ‵ta ne ia ana gatu, ko ‵ma ei a ia. 35 Kae kafai ko ‵solo atu te matakili ki te pa‵kili mai tua o tena faka‵māga, 36 ka iloilo a ia ne te faitaulaga; kae kafai ko ‵solo atu a te matakili ki te pa‵kili, e se manakogina ke ‵sala atu te faitaulaga ki ne fulufulu ‵sega; me i te tino tenā ko se ‵ma eiloa. 37 Kae kafai e iloa atu mai te iloiloga me e seki ‵solo atu te matakili tenā, kae ko ‵somo aka a fulufulu uli, ko tena uiga ko mafu a te matakili tenā. Ko ‵ma a ia, kae ka fakailoa atu ne te faitaulaga me i a ia ko ‵ma.+

38 “Kafai ko kamata o ‵sae aka a ila i luga i te pa‵kili o se tagata io me se fafine, kae ko ila konā e lanu ‵kena, 39 ka iloilo ne te faitaulaga a ila konā.+ Kafai a ila i te pa‵kili e pala‵tea, a te mea tenā e sē se mea fakamataku telā ne sae aka i te pa‵kili. A te tino tenā e ‵ma eiloa.

40 “Kafai ko ma‵lili a laulu o se tagata kae fai ei ke tula a ia, e ‵ma eiloa a ia. 41 Kafai e ma‵lili a laulu i te feitu ki mua o tena ulu kae fai ei ke tula a te koga tenā, e ‵ma eiloa a ia. 42 Kae kafai e sae aka se mea ‵pala lanu kula‵kula kae kena‵kena i luga i tena ulu io me i tena muālae, a te mea tenā se lepela ko sae aka i tena ulu io me i tena muālae. 43 Ka iloilo ne te faitaulaga a ia, kae kafai e lanu kula‵kula kae kena‵kena a te mea faka‵pusa i te matakili i luga i tena ulu telā ko tula io me i tena muālae, kae e foliga mai me se lepela ko sae aka i te pa‵kili, 44 a te tagata tenā se lepela. E se ‵ma a ia kae e ‵tau o fakailoa atu ne te faitaulaga i te tagata tenā e se ‵ma, ona ko te masaki telā ko sae aka i tena ulu. 45 E ‵tau o saesae ne te tagata lepela ana gatu, kae tuku ke makosukosu tena ulu, kae e ‵tau o ufi tena gutu* kae kalaga atu penei, ‘E se ‵ma, e se ‵ma!’ 46 Ka se ‵ma eiloa a ia i te taimi kātoa e poko ei a ia ne te masaki tenā. Ona ko ia e se ‵ma, e ‵tau o nofo tokotasi a ia. E ‵tau o nofo a ia i tua o te fakai.+

47 “Kafai e ‵pisi atu a te lepela ki se gatu, faitalia me se gatu vulu io me se gatu lino, 48 io me ko filo i se laugatu ‵laga* i te laugatu lino io me ko te vulu, io me se pa‵kili io me ko so se mea ne faite ki pa‵kili o manu, 49 kae ko ‵pisi atu a mea lanu sega‵sega kae lanu launiu io me kula‵kula o te masaki tenā ki te gatu, ki pa‵kili, ko filo i te laugatu ‵laga, io me ko so se mea ne faite ki te pa‵kili o manu, a te mea tenā ko ‵pisi ne te lepela, kae e ‵tau o fakaasi atu ki te faitaulaga. 50 Ka iloilo ne te faitaulaga a te masaki tenā, kae e ‵tau o ‵vae kea‵tea ne ia a mea kolā ne ‵pisi i te masaki mō aso e fitu.+ 51 Kafai e iloilo ne ia te masaki tenā i loto i te fitu o aso kae lavea ne ia me ko ‵solo atu i luga i te gatu, i filo i te laugatu ‵laga, io me i te pa‵kili (faitalia me se a te mea e fakaaoga ki ei te pa‵kili tenā), a te masaki tenā ko te ‵toe lepela masei eiloa kae e se ‵ma.+ 52 E ‵tau o ‵sunu ne ia te gatu io me ko filo i te laugatu vulu ne ‵laga io me ko filo i te laugatu lino ne ‵laga, io me ko so se mea ne faite ki pa‵kili o manu, telā ko sae aka i ei a te masaki, me i te mea tenā ko te ‵toe lepela masei eiloa. E ‵tau o ‵sunu ki te afi.

53 “Kae kafai e iloilo ne te faitaulaga a te mea tenā kae e seki ‵solo atu a te masaki tenā ki te gatu io me ki filo i te laugatu ‵laga io me ko so se mea ne faite ki pa‵kili o manu, 54 ka fakatonu atu a te faitaulaga ke ‵ta ne latou te mea telā ne ‵pisi i ei, kae ka ‵vae kea‵tea ne ia a te mea tenā mō nisi aso e fitu. 55 Ka iloilo ne te faitaulaga a te mea telā ne ‵pisi i ei māfai ko oti ne ‵ta. Kafai e seai se mafuliga ki te mea telā ne ‵pisi i ei, faitalia me seki ‵solo atu a te masaki tenā, a te mea tenā e se ‵ma. E ‵tau o ‵sunu ne koe ki te afi me ko pala, i tena feitu ki lalo io me ko tena feitu ki tua.

56 “Kae kafai ko oti ne iloilo ne te faitaulaga a te mea tenā, kae ko matafi a te koga telā ne ‵pisi i ei i te otiga ne ‵ta, ko ‵sae kea‵tea ei ne ia a te mea tenā mai te gatu io me ko te pa‵kili io me ko filo o te laugatu ‵laga. 57 Kae kafai koi lavea atu a te mea tenā i nisi koga o te gatu io me i filo o te laugatu ‵laga io me i so se mea ne faite ki pa‵kili o manu, a te mea tenā ko ‵solo atu eiloa, kae e ‵tau o ‵sunu ne koe ki te afi so se mea telā ko ‵pisi i te masaki tenā.+ 58 Kae kafai ko galo a te mea telā ne ‵pisi ki luga i te gatu io me ko filo i te laugatu ‵laga io me ko so se mea ne faite ki pa‵kili o manu telā ne ‵ta ne koe, e ‵tau o toe ‵ta fakalua a te mea tenā, ko ‵ma ei.

59 “Tenei te tulafono e uiga ki te masaki ko te lepela i gatu vulu io me ko gatu lino, io me ko filo o te laugatu ‵laga, io me ko so se mea ne faite ki pa‵kili o manu, ko mafai ei o fakailoa atu i te mea tenā e ‵ma io me e se ‵ma.”