Te Muamua Samuelu

3 I te taimi tenā, ne tavini+ atu eiloa a te tamaliki tagata ko Samuelu ki a Ieova mai lalo i te takitakiga a Eli, kae e se uke a fekau mai i a Ieova i aso konā; kae e se lauiloa foki a fakaasiga+ i te taimi tenā.

2 I te aso e tasi ne takato ei a Eli i tena potu, kae ko ana mata ko gasolo eiloa o ‵pefu; kae ko se mafai o lavea ne ia a mea.+ 3 A te moli a te Atua+ koi ka eiloa, kae ko Samuelu e takato i loto i te faletapu*+ o Ieova, telā e tuku i ei a te Pusa a te Atua. 4 Tenā ne kalaga atu ei a Ieova ki a Samuelu. Ne tali atu a ia: “Tenei au.” 5 Ne tele atu a ia ki a Eli kae fai atu: “Tenei au, me i a koe ne kalaga mai ki a au.” Kae ne fai atu tou tagata: “Au seki kalaga atu. Toe fano o takato ki lalo.” Tenā ne fano ei a ia kae takato ki lalo. 6 Kae ne toe kalaga atu a Ieova: “Samuelu!” I konā ne tu aka Samuelu kae fanatu ki a Eli kae fai atu: “Tenei au, me i a koe ne kalaga mai ki a au.” Kae ne fai atu tou tagata: “Taku tama, au seki kalaga atu. Toe fano o takato ki lalo.” 7 (I te taimi nei a Samuelu ne seki iloa faka‵lei ne ia a Ieova, kae ne seai foki ne fekau a Ieova ne fakaasi atu ki a ia.)+ 8 Kae ne toe kalaga atu a Ieova i te tolu o taimi: “Samuelu!” I konā ne tu aka a ia kae fanatu ki a Eli kae fai atu: “Tenei au, me i a koe ne kalaga mai ki a au.”

Tenā ne iloa ei ne Eli me ko Ieova telā e kalaga atu ki te tamaliki tagata. 9 Tenā ne fai atu ei a Eli ki a Samuelu: “Fano o takato ki lalo, kae kafai e toe kalaga atu a ia ki a koe, e ‵tau mo koe o fai atu, ‘Ieova, faipati mai, me i tau tavini tenei e fakalogologo atu.’” Ne fano a Samuelu kae takato ki lalo i tena potu.

10 Ne vau a Ieova kae tu i konā, kae kalaga atu e pelā eiloa mo nisi taimi: “Samuelu, Samuelu!” I konā ne fai atu ei Samuelu: “Faipati mai, me i tau tavini tenei e fakalogologo atu.” 11 Ne fai atu a Ieova ki a Samuelu: “Kiloke! E isi se mea ka fai ne au i Isalaelu kae kafai e ‵logo i ei a taliga o se tino ka poi eiloa a ia.+ 12 I te aso tenā ka fakataunu ne au aku pati katoa ne fai ki a Eli e uiga ki tena kāiga, mai te kamataga ke oko eiloa ki te fakaotiga.+ 13 E ‵tau mo koe o fai atu ki a ia me ka fakasala eiloa ne au tena kāiga ki te se-gata-mai ona ko te mea ‵se telā ne iloa ‵lei ne ia,+ me ne muna masei ne ana tama tāgata a te Atua,+ kae ne seki kote ne ia a lāua.+ 14 Tenā te pogai ne tauto ei au ki te kāiga o Eli me i te mea ‵se a te kāiga o Eli ka se mafai o fakamagalo e auala i taulaga io me ko mea kolā e ofo atu.”+

15 Ne takato eiloa Samuelu ke oko ki te tafataeao; tenā ne tu aka ei a ia o ‵tala a mataloa o te fale o Ieova. A Samuelu ne mataku ma fakailoa atu ki a Eli a te fakaasiga ne oko atu ki a ia. 16 Kae ne kalaga atu a Eli ki a Samuelu: “Samuelu, taku tama!” Kae ne fai atu a ia: “Tenei au.” 17 Ne fesili atu tou tagata: “Se a te fekau ne fai atu ne ia ki a koe? Fakamolemole, sa ‵funa ne koe mai i a au. Ke fakasala faeloa koe ne te Atua māfai e ‵funa ne koe se pati e tasi mai pati katoa kolā ne fai atu ne ia ki a koe.” 18 Tenā ne fai atu ei ne Samuelu a mea katoa, kae ne seki ‵funa ne ia se mea e tasi mai i tou tagata. Muna a Eli: “Ko Ieova eiloa tenā. Ke fai eiloa ne ia a te mea telā e ‵lei i tena kilokiloga.”

19 Ne tupu aka eiloa a Samuelu, kae ne fakatasi atu a Ieova ki a ia+ kae seai eiloa se pati mai ana pati katoa ne seki fakataunu ne ia.* 20 Ne iloa ne Isalaelu kātoa, mai Tanu ke oko ki Pelesepa, me ko oti ne fai a Samuelu mo fai te pelofeta a Ieova. 21 Kae ne fakasae atu faeloa a Ieova i Sailo, me ko oti ne fakaasi atu ne Ieova a ia eiloa ki a Samuelu i Sailo e auala i te fekau a Ieova.+