Tanielu

8 I te tolu tausaga o te pulega fakatupu a te Tupu ko Pelesala,+ ne oko mai ei se fakaasiga ki a au, Tanielu, mai tua o te fakaasiga telā ne oko mai muamua+ ki a au. 2 Ne lavea ne au te fakaasiga, kae i taku kilokiloatuga ki ei ne nofo atu au i Susana*+ te palesi, telā e tu i te kogā fenua o Elama;+ ne kilo atu au ki te fakaasiga, kae ko au e tu i tafa o te vai o Ulai. 3 I taku kiloakaga, kiloke! e isi se mamoe tagata+ e tu i mua o te vai, kae e lua ana sau.+ A sau e lua e ‵loa, kae ko te sau e tasi e maluga atu i te suā sau, kae ko te sau telā e maluga atu ne sae aka fakamuli.+ 4 Kae ne lavea ne au te mamoe tagata e sua ne ia a mea i te feitu ki togala mo te feitu ki mātū mo te feitu ki saute, kae e seai se manu fekai ne mafai o tu atu i ana mua, kae e seai se tino ne mafai o fakasao ne ia se tino mai i tena malosi.*+ Ne fai ne ia so se mea e manako a ia ki ei kae fakamaluga aka a ia eiloa.

5 I taku kilokiloatuga, kiloke! e isi se kouti tagata+ e vau mai te feitu ki togala e tele ki te suā feitu o te lalolagi kātoa. Ko oko eiloa i tena makini, e se patele eiloa ki te laukele. Kae ko te kouti e isi se sau lasi e tu i va o ana mata.+ 6 E vau ki mua o te mamoe tagata telā e lua ana sau, kae ne lavea ne au e tu i mua o te vai; e tele mai ki luga i ei mo te kaitaua lasi.

7 Ne lavea ne au me ko pili atu eiloa ki te mamoe tagata kae ko oko eiloa i tena takalialia ki ei. Ne fepaki atu ki te mamoe tagata kae ne ‵fati i ei ana sau e lua, kae ko te mamoe tagata ko seai sena malosi o taua atu ki ei. Ne ‵pei ne ia te mamoe tagata ki te laukele kae lakalaka ne ia ki lalo, kae e seai se tino ne mafai o fakasao ne ia te mamoe tagata mai i tena malosi.*

8 Tenā ne fakamaluga aka ei ne te kouti tagata a ia eiloa, kae i te taimi ko malosi i ei kae fati a te sau lasi; kae ne toe ‵sae aka a nisi sau ‵lasi e fa i lō te sau e tasi, e ‵fuli atu ki matagi e fa o te lagi.+

9 Mai i te sau e tasi i sau konā ne sae aka ei se isi sau, se mea foliki, kae ne tupu aka o lasi i te feitu ki saute mo te feitu ki saegala mo te feitu ki te Fenua Gali.+ 10 Ne lasi ‵ki tena tupuakaga tenā ne oko aka ei ki te kautau o te lagi, kae ne fai ei a nisi kautau mo nisi fetū ke ‵to ifo ki te lalolagi, kae ne lakalaka ne ia ki lalo a mea konā. 11 Ne fakamaluga aka ne ia a ia eiloa kae ‵teke atu ki te Pelenise o te kautau, kae ne puke kea‵tea mai i a ia a te taulaga e ‵tau o ofo atu i aso takitasi, kae ko tena koga tapuaki telā ne faka‵mautakitaki ne ia ne ofa ki lalo.+ 12 Kae e isi se kautau ne tuku atu ki ei, fakatasi mo te taulaga e ‵tau o ofo atu i aso takitasi, ona ko te solitulafono; kae ne peipei atu faeloa ne ia a te munatonu ki te lalolagi, kae ne gasuesue kae ne manuia.

13 Kae ne lagona ne au se tino tapu e faipati, kae ne fai atu a te suā tino tapu ki te tino telā e faipati: “E pefea te leva o te fakaasiga e uiga ki te taulaga e ‵tau o ofo atu i aso takitasi mo te solitulafono telā e fai i ei ke tumau te fakamaseiga,+ ke fai ei te koga tapu mo te kautau e pelā me ne mea ke lakalaka ki lalo?” 14 Tenā ne fai mai ei a ia ki a au: “Ke kātoa a afiafi mo tafataeao e 2,300 kae ka toe fakafoki atu eiloa a te koga tapu ki tena tulaga tonu.”

15 I te taimi koi onoono atu ei au, Tanielu, ki te fakaasiga kae taumafai ke malamalama i ei, ne lavea fakavave ne au se tino e tu i oku mua e foliga pelā me se tagata. 16 Tenā ne lagona ei ne au te leo o se tagata mai i te kogaloto o te Ulai,+ kae ne kalaga mai a ia: “Kapilielu,+ fai ke malamalama a te tino tenā i mea ne lavea ne ia.”+ 17 Tenā ne vau ei a ia ke pili ki te koga ne tu au i ei, kae i tena vauga ne mataku malosi au, tenā ne totuli ifo ei au mo oku mata e ‵fuli ki lalo. Ana muna ki a au: “Ke malamalama, e te tama a te tagata, me i te fakaasiga se mea mō te taimi o te gataga.”+ 18 Kae koi faipati mai a ia ki a au, ne tō taku moe mo oku mata e ‵fuli ki te laukele. Tenā ne fakapatele mai ei a ia ki a au kae fai ne ia au ke tu ki luga i te koga ne tu ei au.+ 19 Ana muna ki a au: “Ko fai nei ne au ke iloa ne koe a mea ka ‵tupu i aso fakaoti o te fakamaseiga, me ka tupu te mea tenā i te taimi filifilia o te gataga.+

20 “A te mamoe tagata e lua ana sau telā ne lavea ne koe ko tupu o Metai mo Pelesia.+ 21 A te kouti tagata fulufulua ko te tupu o Eleni;+ kae ko te sau lasi i te va o ana mata ko te tupu muamua.+ 22 Kae e pelā mo te sau telā ne fati, telā ne ‵tu aka ei a sau e fa i lō te sau tenā,+ ko malo e fa konā mai i tena fenua kolā ka ‵tu aka, kae e se ‵pau eiloa mo tena malosi.

23 “Kae i te vaega fakaoti o olotou malo, i te taimi ko fai ei ne tino solitulafono a mea katoa,* ka tupu aka ei se tupu mata kaitaua telā e malamalama i tugapati faiga‵ta. 24 A tena malosi ka gasolo o lasi, kae e se pogai mai i tena malosi eiloa. Ka fakamasei ne ia a mea i se auala fakaofoofogia,* kae ka manuia a ia kae gasuesue mo te manuia. Ka fakamasei ne ia a tino ‵mafi, e pelā foki mo tino kolā ne aofia i ei a tino tapu.+ 25 Kae mai i tena faitogafiti ka fakaaoga ne ia a te loi ke manuia ei a ia; kae ka fakamaluga aka ne ia a ia eiloa i tena loto; kae i te taimi o te tokagamalie ka fakaseai ne ia a tino e tokouke. Ka tu aka a ia o ‵teke ki te Pelenise o pelenise, kae ka fatifati a ia kae e se ki lima o tino.

26 “A te mea telā ne fai mai i te fakaasiga e uiga ki afiafi mo tafataeao se mea tonu, kae e ‵tau mo koe o ‵funa aka te fakaasiga tenā, me e fakasino atu ki se taimi o aso e uke mai i te taimi nei.”*+

27 Kae pelā mo au, Tanielu, ne fi‵ta au kae ne masaki mō ne nai aso.+ Tenā ne tu aka ei au ki luga kae fai te galuega a te tupu;+ kae ko au ne poi i mea ne lavea ne au, kae e seai se tino e mafai o malamalama i ei.+