Isaia
13 Se fekau ‵mafa e uiga ki Papelonia+ telā ne lavea ne Isaia+ te tama tagata a Amota i se fakaasiga:
2 “Fakatu aka se fakailoga+ i luga i mauga fatufatua.
Kalaga atu ki a latou, tatalo atu tou lima,
Ko te mea ke o‵mai latou ki loto i mataloa o kaigā tupu.
3 Ko oti ne fai ne au se fakatonuga ki a latou kolā ne faka‵sopo aka ne au.+
Ko oti ne ‵kami mai ne au aku toa ‵mafi ke fakaasi atu ki ei toku kaitaua,
Kae ne fia‵fia latou mo te fakamata‵mata.
4 Fakalogo aka! Se vaitino i mauga;
E ‵tagi e pelā me ne tino e tokouke!
Fakalogo aka! Ko te ‵tagi o malo,
O atufenua ko maopoopo fakatasi!+
A Ieova o kautau ko fakatonutonu ne ia te kautau mō te taua.+
5 E o‵mai latou mai i se fenua ‵mao,+
Mai toe koga ‵mao o te lagi,
Ko Ieova mo meatau o tena kaitaua,
O aumai te fakamaseiga ki te lalolagi kātoa.+
6 ‵Tagi fanoa‵noa, me i te aso o Ieova ko pili mai!
Ka oko mai e pelā me se fakamaseiga mai te Atua Malosi Katoatoa.+
7 Tenā te pogai ka gau‵gau ei a lima katoa,
Kae ko loto o tāgata katoa ka liuvai i te ma‵taku.+
8 A tino ko ‵poi i te manava‵se.+
Ko oko atu ki a latou te tigaina mo te logo‵mae,
E pelā me se fafine ka fai o fanau.
E kilo atu te suā tino ki te suā tino mo te ma‵taku,
Mo te mata tigaina.
9 Kiloke! A te aso o Ieova ka oko mai,
E saua fakatasi mo te ita mo te kaitaua telā e ‵ka pelā me se afi,
Ke fai te fenua mo fai se mea fakamataku,+
Kae ke fakaseai atu a tino agasala o te fenua mai i ei.
10 Me i fetū o te lagi mo olotou fakaputuga fetū,+
Ka se maina mai te lotou mainaga;
A te la ka pouli māfai ko sae aka,
Kae ko te masina ka se maina mai tena mainaga.
11 Ka fai atu au ki te lalolagi nofoaki ke tuku mai se fakamatalaga ona ko tena tulaga masei,+
Penā foki eiloa mo tino amio ma‵sei e ‵tusa mo olotou mea ‵se.
Ka fakagata ne au a te fakamata‵mata o tino mata‵mua,
Kae ka fakamalalo ne au a te fakamaua‵luga o tino pule fakasaua.+
12 Ka fai ne au ke sili atu te faigata o maua se tagata i lō aulo kolā ko oti ne faka‵ma,+
Kae ke sili atu te faigata o maua a tino i lō aulo o Ofeila.+
13 Tenā te pogai ka fai ei ne au a te lagi ke polepole,
Kae ko te lalolagi ka lūlū ke seke kea‵tea mo tena tulaga+
I te kaitaua o Ieova o kautau i te aso o tena kaitaua telā e ‵ka pelā me se afi.
14 E pelā me se kasele telā e afuli ne se tino kae pelā me se lafu mamoe telā e seai se tino e fakamaopoopo mai ne ia latou,
A tino taki tokotasi ka ‵foki ki olotou tino tonu;
A tino taki tokotasi ka ‵tele ki olotou fenua tonu.+
15 So se tino e maua aka ka ‵suki ke mate,
Kae ko so se tino e ‵poa aka ka tamate ki te pelu.+
16 Ka foafoa likiliki olotou tama‵liki i mua o latou,+
Ka ‵fao a mea i olotou fale,
Kae ka pukemālō olotou avaga.
17 Ko tu aka au o taua atu ki tino Metai,+
Kolā e fai ne latou a siliva e pelā fua me ne mea e seai
Kae e se fia‵fia foki latou ki aulo.
18 A olotou kausana ka foafoa i ei a tamataene;+
Ka seai se alofa io me se alofa fakamagalo e fakaasi atu ne latou
Ki tama‵liki.
19 Kae ko Papelonia, te ‵toe malo ‵malu i malo katoa,+
Te mea gali telā e fakamata‵mata ki ei a tino Kaletaia,+
Ka fai pelā mo Sotoma mo Komolo i te taimi e fakatakavale ei ne te Atua a latou.+
20 Ka se mafai o toe ‵nofo i ei ne tino,
Io me fai mo fai se koga e ‵nofo i ei a tino i kautama katoa.+
Ka seai se Alapi e fakatu sena faleie i konā,
Kae ka seai se tausi mamoe ka fai ne ia ke ma‵nava ana lafu mamoe i konā.
21 A manu o te toafa ka takatokato i konā;
Ka ‵fonu olotou fale i lulu.
Ka ‵nofo i ei a osetelite,+
Kae ko kouti o te vao ka evaeva i ei.
22 A manu tagi‵tagi ka ‵tagi mo te fanoa‵noa i ana taoa,
E penā foki loa mo tiakolo i ana palesi ‵gali.
Ko pili mai tena taimi, kae ka se leva ana aso.”+