Esekielu

13 Kae ne toe oko mai te fekau a Ieova ki a au, ana muna: 2 “Te tama a te tagata, ‵valo o ‵teke atu ki pelofeta o Isalaelu,+ kae fai atu ki a latou kolā e ‵fatu ne latou olotou valoaga,*+ ‘Faka‵logo mai ki te fekau a Ieova. 3 Konei a pati a te Aliki Sili ko Ieova ne fai mai: “Kalofa eiloa i pelofeta va‵lea, kolā e ‵valo a mea i olotou mafaufau kae seki maua ne latou se fakaasiga mai i a au!+ 4 Isalaelu, au pelofeta ko fai pelā me ne alope kolā e ‵nofo i koga ne fakamaseigina. 5 Ka se olo atu koutou ki koga o te ‵pui fatu kolā ne ofa ki lalo o toe faite ne koutou mō te kāiga o Isalaelu,+ ko te mea ke tu faeloa i ei a Isalaelu i te taua i te aso o Ieova.”+ 6 “Ne lavea ne latou a fakaasiga sē ‵tonu kae ‵valo atu a mea ‵loi, ko latou kolā e fai mai penei, ‘Tenei te fekau a Ieova,’ kae tela la, e seki uga mai latou ne Ieova, kae ne fakatali‵tali latou ke taunu te lotou pati.+ 7 E a, e sē se fakaasiga sē tonu tenā ne lavea ne koutou kae ‵valo atu ne koutou se mea loi i otou pati, ‘Tenei te fekau a Ieova,’ kae tela la, e seki ai eiloa ne aku pati ne fai atu?”’

8 “‘Tela la, konei a pati a te Aliki Sili ko Ieova ne fai mai: “‘Ona ko koutou ne fai‵pati ki mea sē ‵tonu kae ko otou fakaasiga ne mea ‵loi fua, ko ‵teke ne au koutou,’ ko te folafolaga a te Aliki Sili ko Ieova.”+ 9 A toku lima e ‵teke atu ki pelofeta kolā e se ‵tonu olotou fakaasiga kae ‵valo mai a mea ‵loi.+ Ka se aofia latou i te fenua telā e fesokotaki au ki ei; io me tusi te lotou igoa i te fakasologa o te kāiga o Isalaelu; io me toe faka‵foki atu latou ki te fenua o Isalaelu. Kae ka iloa ei ne koutou i a au ko te Aliki Sili ko Ieova.+ 10 Ko ‵tupu a mea katoa konei me ne takitaki ‵se ne latou toku fenua mai te fai atu, “Ko isi se filemu!” kae seai ei se filemu.+ Kafai ko faite aka se ‵pui manifinifi, e palasitā ne latou ki te lase.’+

11 “Fai atu ki a latou kolā e palasitā ne latou ki te lase me ka maofa te ‵pui. Ka ‵to ifo se vaiua ‵lotu, ka ‵to ifo se vaiua fatu, kae ka ofa ki lalo ne matagi ma‵losi a te ‵pui.+ 12 Kae kafai ko maofa a te ‵pui ka fesili atu ki a koe penei, ‘Tefea te palasitā telā ne ufi ne koe ki ei?’+

13 “Tela la, konei a pati a te Aliki Sili ko Ieova ne fai mai: ‘Ka fai ne au ke agi malosi mai a matagi ma‵losi i toku kaitaua, mo se vaiua ‵to ‵lotu i toku ita, mo vaiua fatu i toku kaitaua fakamasei mea. 14 Ka ofa ki lalo ne au te ‵pui telā ne palasitā ne koutou ki lase kae ofa ki lalo i te laukele, kae ka tuku faka‵sau atu tena fakavae. Kafai ko maofa te fakai, ka ‵mate atu koutou i loto i ei; kae ka iloa ei ne koutou i a au ko Ieova.’

15 “‘Kafai ko fakaoko katoatoa atu ne au toku kaitaua ki luga i te ‵pui mo latou kolā ne palasitā ne latou ki lase, ka fai atu au ki a koutou: “Ko seai se ‵pui, kae ko ‵galo foki a tino kolā ne palasitā ne latou.+ 16 A pelofeta o Isalaelu ko ‵galo atu, ko latou kolā ne ‵valo mai e uiga ki Ielusalema kae lavea ne latou a fakaasiga o te filemu mō tou fafine, kae seai ei se filemu,”’+ ko te folafolaga a te Aliki Sili ko Ieova.

17 “E pelā mo koe, e te tama a te tagata, saga atu ou mata o ‵teke a tama fāfine o tou fenua kolā ne ‵fatu ne latou olotou valoaga eiloa, kae ‵valo atu o ‵teke latou. 18 Fai atu ki a latou, ‘Konei a pati a te Aliki Sili ko Ieova ne fai mai: “Kalofa eiloa i fāfine kolā e ‵sui ne latou a taulima mō lima* katoa kae fai a veli mō ulu i saisi kese‵kese ko te mea ke malei ei ne ia a ola o tino! E a, e salasala koutou ki ola o oku tino kae taumafai o faka‵sao otou ola? 19 E a, ka se āva mai koe ki a au i toku fenua ke maua ei a lima e ‵fonu i kalite mo ne mu falaoa,+ kae tamate atu a latou kolā e se ‵tau o ‵mate kae fakaola a latou kolā e se ‵tau o ola, kae ka fai eiloa penā e auala i otou loi ki toku fenua, kolā e faka‵logo ki otou loi?”’+

20 “Tela la, konei a pati a te Aliki Sili ko Ieova ne fai mai: ‘Au tenei ko ‵teke ne au otou taulima, e fāfine, kolā ne fakaaoga ne koutou ke afuli ki ei a tino e pelā eiloa latou me ne manu eva, kae ka ‵futi kea‵tea ne au latou mai i otou lima kae faka‵sao atu a latou kolā e afuli ne koutou e pelā me ne manu eva. 21 Ka ‵sae kea‵tea ne au otou veli kae faka‵sao toku fenua mai i otou lima, kae ka se toe mafai ne koutou o ‵poa latou e pelā me ne tino kolā e olo o tuli manu; kae ka iloa ei ne koutou i a au ko Ieova.+ 22 Me ko oti ne fai ne koutou ke loto vāivāi a te tino amiotonu ki otou mea ‵loi+ i te taimi ne seki fakapuapuaga ei ne au a ia, kae ne fakamalosi aka ne koutou a lima o te tino amio masei,+ ko te mea ke se fulitua atu a ia ki tena auala masei kae tumau i te ola.+ 23 Tela la, ka se toe lavea ne koutou, e fāfine, a fakaasiga sē ‵tonu mo mea fakataulaitu;+ kae ka faka‵sao ne au oku tino mai i otou lima, kae ka iloa ei ne koutou i a au ko Ieova.’”