Esekielu

40 I te 25 tausaga o te motou avega fakapagota,+ i te kamataga o te tausaga, i te sefulu o aso o te masina, i te 14 tausaga mai tua o te fakatakavalega o te fakai,+ i te aso eiloa tenā ne oko mai ei ki luga i a au a te lima o Ieova, kae ne puke ne ia au o ave ki te fakai.+ 2 E auala i fakaasiga mai i te Atua, ne aumai ne ia au ki te fenua o Isalaelu kae tuku ifo ne ia au i luga i se mauga maluga ‵ki,+ kae isi se mea e pelā me se fakai i te feitu ki saute.

3 I te taimi ne aumai ei ne ia au ki konā, ne lavea ne au se tagata e foliga mai e pelā me se kopa.+ E isi se uka lino mo se lula lakau* i tena lima,+ kae tu tou tagata i te mataloa ki loto. 4 Ne fai mai te tagata tenā ki a au: “Te tama a te tagata, kilo faka‵lei, fakalogo faka‵lei kae saga tonu mai ki mea katoa e fakaasi atu ne au ki a koe, me tenā te pogai ne aumai ei koe ki konei. Fai atu ki te kāiga o Isalaelu a mea katoa e lavea ne koe.”+

5 Ne lavea ne au se ‵pui e fakatamilo i te feitu mai tua o te faletapu.* I te lima o te tagata tenā ko te lula lakau e ono kupita te loa (ki kupita takitasi ne fakaopoopo atu ki ei te lauefa o se alofilima).* Ne kamata o fua ne ia te ‵pui, kae ko tena matolu e tasi te lula lakau kae ko tena maluga e tasi te lula lakau.

6 Tenā ne vau ei a ia ki te mataloa telā e ‵fuli ki te feitu ki saegala+ kae kake aka i ana sitepu. I te fuāga ne ia a te auala ki loto o te mataloa, a tena lauefa e tasi te lula lakau, kae ko te lauefa o te suā auala ki loto o te mataloa e tasi foki te lula lakau. 7 A potu o leoleo takitasi e tasi te lula lakau te loa kae tasi te lula lakau te lauefa, kae e lima kupita te va o te potu o leoleo e tasi ki te suā potu.+ A te auala ki loto o te mataloa i tafa o te fakaosoga o te mataloa telā e ‵fuli ki te koga i loto e tasi te lula lakau.

8 Ne fua ne ia te fakaosoga o te mataloa i te feitu ki loto, kae e tasi te lula lakau. 9 Tenā ne fua ei ne ia te fakaosoga o te mataloa, e valu kupita; kae ne fua ne ia a pou i ana feitu, e lua kupita; kae ko te fakaosoga o te mataloa e tu i te feitu telā e ‵fuli ki loto.

10 E taki tolu a potu o leoleo i feitu takitasi o te mataloa ki te feitu ki saegala. A potu e tolu konā e ‵pau te ‵lasi, kae ko pou i feitu katoa e ‵pau te ‵lasi.

11 Tenā ne fua ei ne ia te lauefa o te auala i te mataloa, e 10 kupita; kae ko te loa o te mataloa e 13 kupita.

12 A te ‵pui i mua o potu o leoleo i feitu katoa e tasi te kupita. A potu o leoleo i feitu e lua e taki ono kupita.

13 Tenā ne fua ei ne ia te mataloa mai te tuafale e tasi o te potu o leoleo* ki te tuafale o te suā potu, kae e 25 kupita te lauefa; a te auala ki loto e tasi e tu fakafesagai ki te suā auala ki loto.+ 14 Tenā ne fua ei ne ia a pou i feitu, e 60 kupita te ‵loa, e pelā foki mo pou i feitu i mataloa e fakatamilo i te koga ateatea. 15 Mai te feitu ki mua o te auala ki loto ki te feitu ki mua o te fakaosoga i te feitu ki loto o te mataloa e 50 kupita.

16 E isi ne famalama kolā e ‵lasi i loto kae fo‵liki i tua+ mō potu o leoleo mo olotou pou i feitu i loto i te mataloa i feitu katoa. A koga i loto o fakaosoga e isi foki ne famalama i feitu takitasi, kae e isi ne ata o lakau ko pama+ i pou i ana feitu.

17 Tenā ne aumai ei ne ia au ki te koga ateatea tafa ki tua, kae ne lavea ne au a potu ‵kai+ mo se tamā auala e fakatamilo i te koga ateatea. E 30 a potu ‵kai i luga i te fola tenā. 18 A te fola i feitu o mataloa e tai ‵pau mo te ‵loa o mataloa​—a te mea tenei ko te fola tafa ki lalo.

19 Tenā ne fua ei ne ia te ‵mao mai te feitu ki mua o te mataloa ki lalo ki te feitu tafa ki tua o te koga ateatea tafa ki loto. E ¹⁰⁰ kupita i te feitu ki saegala mo te feitu ki mātū.

20 A te koga ateatea tafa ki tua e isi sena mataloa telā e ‵fuli ki mātū, kae ne fua ne ia tena loa mo tena lauefa. 21 E taki tolu a potu o leoleo i feitu takitasi. A pou i ana feitu mo te fakaosoga e ‵pau te lotou fua mo te mataloa muamua. E 50 kupita te loa kae 25 kupita te lauefa. 22 Ana famalama, ana fakaosoga, mo ata o ana lakau pama+ e ‵pau te ‵lasi mo mea i te mataloa ki saegala. E mafai o oko atu a tino ki ei māfai e ‵kake i sitepu e fitu, kae ko tena fakaosoga e tu i mua o mea konā.

23 E isi se mataloa i te koga ateatea tafa ki loto telā e tu fakafesagai ki te mataloa ki mātū kae e tasi e tu fakafesagai ki te mataloa i te feitu ki saegala. Ne fua ne ia te ‵mao o te mataloa e tasi ki te suā mataloa, kae e 100 kupita.

24 Oti aka, ne aumai ne ia au ki te feitu ki saute, kae ne lavea ne au se mataloa i te feitu ki saute.+ Ne fua ne ia a pou i ana feitu mo ana fakaosoga, kae e ‵pau eiloa te ‵lasi mo mea i nisi mataloa. 25 E isi ne famalama i ana feitu takitasi mo tena fakaosoga, e pelā eiloa mo nisi famalama. E 50 kupita te ‵loa kae 25 kupita te lauefa. 26 E isi ne sitepu e fitu kolā e olo aka ki luga i ei,+ kae ko tena fakaosoga e tu i mua o mea konā. Kae e isi ne ata o lakau ko pama i pou i ana feitu, e tasi i feitu takitasi.

27 A te koga ateatea tafa ki loto e isi sena mataloa e ‵fuli ki te feitu ki saute; ne fua ne ia te mataloa e tasi ki te suā mataloa i te feitu ki saute, kae ko te ‵mao e 100 kupita. 28 Oti aka ne aumai ne ia au ki loto i te koga ateatea tafa ki loto e auala i te mataloa i te feitu ki saute; i te fuāga ne ia te mataloa ki saute, e ‵pau eiloa tena lasi mo nisi mataloa. 29 A potu o ana leoleo, ko pou i ana feitu, mo tena fakaosoga e ‵pau te ‵lasi mo mea i nisi mataloa. E isi ne famalama i ana feitu takitasi mo tena fakaosoga. E 50 kupita te ‵loa kae 25 kupita te lauefa.+ 30 E isi ne fakaosoga e fakatamilo i ei; e 25 kupita te ‵loa kae 5 kupita te lauefa. 31 A tena fakaosoga e ‵fuli ki te koga ateatea tafa ki tua, kae e isi ne ata o lakau ko pama i pou i ana feitu,+ kae e valu a sitepu ki luga i ei.+

32 I te taimi ne aumai ei ne ia au ki loto i te koga ateatea tafa ki loto i te feitu ki saegala, ne fua ne ia te mataloa, kae e ‵pau eiloa te lasi mo nisi mataloa. 33 A potu o ana leoleo, a pou i ana feitu, mo tena fakaosoga e ‵pau eiloa te ‵lasi mo mea i nisi mataloa, kae e isi ne famalama i ana feitu takitasi mo tena fakaosoga. E 50 kupita te ‵loa kae 25 kupita te lauefa. 34 A tena fakaosoga e ‵fuli ki te koga ateatea tafa ki tua, kae e isi ne ata o lakau ko te pama i feitu katoa o pou i ana feitu, kae e valu a sitepu ki luga i ei.

35 Tenā ne aumai ei ne ia au ki loto i te mataloa ki mātū+ kae fua ne ia; e ‵pau eiloa te lasi mo nisi mataloa. 36 A potu o ana leoleo, a pou i ana feitu, mo tena fakaosoga e ‵pau eiloa mo mea i nisi mataloa. E isi ne famalama i feitu takitasi. E 50 kupita te ‵loa kae 25 kupita te lauefa. 37 A pou i ana feitu e ‵fuli atu ki te koga ateatea i tua kae e isi ne ata o lakau ko pama i luga i pou i ana feitu katoa, kae e valu a sitepu ki luga i ei.

38 A te potu ‵kai mo tena auala ki loto e pili ki pou i feitu o mataloa, i te koga telā e ‵fulu i ei a taulaga ‵sunu kātoa.+

39 E isi ne taipola e lua i feitu takitasi o te fakaosoga o te mataloa telā e tamate i ei a taulaga ‵sunu kātoa,+ taulaga mō agasala,+ mo taulaga mō mea ‵se.+ 40 I te auala ki luga i te mataloa ki mātū, e isi ne taipola e lua mai i tua o te auala ki loto. E isi foki ne taipola e lua i te suā feitu o te fakaosoga o te mataloa. 41 E isi ne taipola e fa i feitu takitasi o te mataloa​—e valu katoa a taipola​—kolā e tamate i ei a taulaga. 42 A taipola e fa mō taulaga ‵sunu kātoa ne faite mai i fatu ne ‵kati. E takitasi mo te āfa kupita te ‵loa, tasi mo te āfa kupita te lauefa, kae tasi te kupita te maluga. Ne tausi i luga i mea konā a mea faigaluega e fakaaoga mo tamate a taulaga ‵sunu mo nisi taulaga. 43 Ne faka‵piki fakatamilo i ‵pui tafa ki loto a fata, e tasi te alofilima te lauefa; kae ko ‵kano o taulaga e tuku i luga i taipola.

44 I tua o te mataloa tafa ki loto ko potu ‵kai mō tino usuusu;+ e ‵tu a mea konā i te koga ateatea tafa ki loto i tafa o te mataloa ki mātū, kae ‵fuli atu ki te feitu ki saute. A te suā potu ‵kai e tu i tafa o te mataloa i te feitu ki saegala, kae ‵fuli atu ki te feitu ki mātū.

45 Ne fai mai a ia ki a au: “A te potu ‵kai tenei e ‵fuli ki te feitu ki saute i o faitaulaga kolā e fai ne latou a te taviniga i te faletapu.+ 46 A te potu ‵kai telā e ‵fuli ki te feitu ki mātū i o faitaulaga kolā e fai ne latou te taviniga i te fatafaitaulaga.+ A latou ko tama a Satoka,+ ko latou kolā ne maua mai i tino Levi kolā ne ‵tofi ke fakapili‵pili atu ki a Ieova o tavini atu ki a ia.”+

47 Tenā ne fua ei ne ia te koga ateatea tafa ki loto. E 100 kupita te loa kae 100 kupita te lauefa, e ‵pau a feitu e fa. A te fatafaitaulaga e tu i mua o te faletapu.

48 Tenā ne aumai ei ne ia au ki loto i te fakaosoga o te faletapu,+ kae ne fua ne ia te pou i feitu o te fakaosoga, e lima kupita i te feitu e tasi kae lima kupita i te suā feitu. A te lauefa o te mataloa e tolu kupita i te feitu e tasi kae tolu kupita i te suā feitu.

49 A te fakaosoga e 20 kupita te loa kae 11* kupita te lauefa. E mafai o olo a tino ki ei mai te ‵kake i sitepu i ei. E isi ne pou i tafa o pou i feitu, e tasi i feitu takitasi.+