Esoto
27 “Ka faite ne koe te fatafaitaulaga mai te lakau ko te akasia;+ e ‵tau o lima kupita* te loa kae lima kupita te lauefa. A te fatafaitaulaga e ‵tau o sikuea kae tolu kupita te maluga.+ 2 Ka faite ne koe a suki+ i ana ‵kōna e fa; ka fai a suki e pelā me ne vaega o te fatafaitaulaga, kae ka ufi ne koe te fatafaitaulaga ki te kopa.+ 3 Ka faite ne koe ne paketi mo ave kea‵tea ana lefu,* fakatasi mo sevolo, pōla, foka mo mea tuku malala ‵ka, kae ka faite ne koe a meāfale katoa konā ki te kopa.+ 4 Ka faite ne koe se mea valavala ki te kopa mō te fatafaitaulaga, kae i luga i ei ko ligi kopa e fa i ana ‵kōna e fa. 5 Ka tuku ne koe te mea tenā mai lalo o kaugutu o te fatafaitaulaga, kae ko te mea valavala ka oko ifo ki te kogaloto o te fatafaitaulaga. 6 Ka faite ne koe ne amo mō te fatafaitaulaga mai te lakau ko te akasia, kae ufi ki te kopa. 7 Ka faulu a amo ki loto i ligi ko te mea ke isi ne amo i feitu e lua o te fatafaitaulaga i te taimi e sau ei.+ 8 Ka faite ne koe te fatafaitaulaga e pelā me se pokisi laupapa. E ‵tau o faite e pelā mo te auala ne fakaasi atu ne Ia ki a koe i luga i te mauga.+
9 “Ka faite ne koe te koga ateatea+ o te faleie tapu. Mō te feitu ki saute, telā e saga ki saute, ka isi ne ‵pui laugatu o te koga ateatea e faite ki laugatu lino ne mio faka‵lei ana filo, e 100 kupita te loa o te feitu e tasi.+ 10 Ka isi ne pou e 20 i ei mo lagolago kopa e 20. A pine o pou mo olotou soko e faite ki siliva. 11 A ‵pui laugatu i te feitu ki mātū e ‵tau foki o 100 kupita te loa, fakatasi mo ana pou e 20 mo lagolago kopa e 20, mo pine siliva mo soko o pou. 12 E ‵tau o isi ne ‵pui laugatu i te feitu ki togala e tele i te 50 kupita te lauefa o te koga ateatea, fakatasi mo pou e sefulu mo lagolago e sefulu. 13 A te lauefa o te koga ateatea i te feitu ki saegala e 50 kupita. 14 E ‵tau o 15 kupita te loa o te ‵pui laugatu i te feitu e tasi, fakatasi mo pou e tolu mo lagolago e tolu.+ 15 Kae ko te suā feitu e ‵tau o 15 kupita te loa o te ‵pui laugatu i ei, fakatasi mo pou e tolu mo lagolago e tolu.
16 “A te mataloa o te koga ateatea e ‵tau o isi se ‵pui laugatu i ei telā e 20 kupita te loa, kae faite ki filo lanu moana, vulu lanu violeta, filo lanu kula mo laugatu lino ne mio faka‵lei ana filo kolā ko oti ne ‵laga fakatasi,+ mo pou e fa mo olotou lagolago e fa.+ 17 A pou katoa kolā e fakatamilo i te koga ateatea e ‵tau o isi ne olotou pine faka‵lave mo pine kolā e faite ki siliva, kae ko olotou lagolago e faite ki te kopa.+ 18 A te koga ateatea e ‵tau o 100 kupita te loa,+ 50 kupita te lauefa, kae 5 kupita te maluga, kae ke faite mai laugatu lino ne mio faka‵lei ana filo, kae e ‵tau o isi ne ana lagolago kopa. 19 A meāfale mo mea katoa kolā e fakaaoga i te taviniga i loto i te faleie tapu, e pelā foki mo pine o te faleie mo pine katoa o te koga ateatea e ‵tau o faite ki te kopa.+
20 “E ‵tau o fakatonu atu koe ki tino Isalaelu ke aumai ki a koe ne sinu olive ‵ma mō te moli, ko te mea ke ‵ka faeloa a moli.+ 21 I loto i te faleie o maopoopoga, mai tua o te ‵pui laugatu telā e pili ki te Pusa o te Feagaiga,+ e ‵tau o fakatoka a Alona mo ana tama tāgata ke faka‵ka faeloa ne latou a moli mai te afiafi ke oko ki te tafataeao i mua o Ieova.+ A te mea tenā se tulafono fakavae tumau mō olotou kautama katoa ke tau‵tali ki ei a tino Isalaelu.+