Ielemia
29 Konei a pati i te tusi ne avatu ne Ielemia te pelofeta mai i Ielusalema ki te ‵toega o toeaina i tino kolā ne ave fakapagota, faitaulaga, pelofeta mo tino katoa kolā ne ave fakapagota ne Nepukanesa mai Ielusalema ki Papelonia, 2 kae ko oti ei ne olo kea‵tea mai i Ielusalema a te Tupu ko Iekonia,+ te mātua o te tupu,+ ofisa, pelenise o Iuta mo Ielusalema, mo tufuga faite mea mo tino faite mea ki fiti.+ 3 Ne ave ne ia te tusi tenā e auala i te lima o Eliasa te tama tagata a Safana+ mo Kemalia te tama tagata a Hilikia, kolā ne uga atu ne te tupu o Iuta ko Setekaia+ ki Papelonia ki te tupu o Papelonia ko Nepukanesa. E fai penei te tusi:
4 “Konei a pati a Ieova o kautau, te Atua o Isalaelu, ne fai ki tino katoa kolā ne ave fakapagota, kolā ne fai ne au ke ave fakapagota mai i Ielusalema ki Papelonia, 5 ‘Faite a fale kae ‵nofo i ei. ‵Toki a fatoaga kae ‵kai ki olotou fuagalakau. 6 Puke ne otou avaga fāfine kae fai otou tama tāgata mo tama fāfine; puke ne avaga ma otou tama tāgata kae tuku atu otou tama fāfine ke a‵vaga, ko te mea ke isi foki ne olotou tama tāgata mo tama fāfine. Fakatokouke koutou i konā, kae ke se fakamu‵tana. 7 Kae ‵sala ke maua se va filemu mo te fakai ne ave fakapagota ne au koutou ki ei, kae ‵talo ki a Ieova mō te fakai tenā, me mai i tena filemu ka maua ei ne koutou te filemu.+ 8 Me konei a pati a Ieova o kautau, te Atua o Isalaelu ne fai mai: “Ke mo a eiloa e faka‵se koutou ne otou pelofeta mo otou tino fakataulaitu,+ kae ke mo a koutou e faka‵logo ki moemiti e moemiti ne latou. 9 Me e ‵valo atu ne latou a mea ‵loi ki a koutou i toku igoa. Ne seki uga atu ne au latou,’+ ko te folafolaga a Ieova.”’”
10 “Me konei a pati a Ieova ne fai mai, ‘Kafai ko kātoa a tausaga e 70 i Papelonia, ka saga atu au ki a koutou,+ kae ka fai faka‵lei ne au taku tautoga mai te faka‵fokimaiga o koutou ki te koga tenei.’+
11 “‘Me iloa ‵lei ne au a mafaufauga e mafaufau ne au e uiga ki a koutou,’ ko te folafolaga a Ieova, ‘ko mafaufauga o te filemu, kae e se ko fakalavelave,+ ke tuku atu ki a koutou a aso mai mua mo se fakamoemoega.+ 12 Kae ka ka‵laga mai koutou ki a au kae o‵mai o ‵talo ki a au, kae ka fakalogo atu au ki a koutou.’+
13 “‘Ka ‵sala koutou ki a au kae ka maua ne koutou,+ me ka ‵sala koutou ki a au mo otou loto kātoa.+ 14 Kae ka fai ne au ke maua ne koutou au,’+ ko te folafolaga a Ieova. ‘Kae ka fakamaopoopo mai ne au otou tino ne ave fakapagota kae ‵luku fakatasi koutou mai i atufenua mo koga katoa kolā ne fakamavae‵vae ne au koutou ki ei,’+ ko te folafolaga a Ieova. ‘Kae ka faka‵foki mai ne au koutou ki te koga ne fai ei ne au koutou ke ave fakapagota mai i ei.’+
15 “Kae ne fai mai koutou, ‘A Ieova ne faka‵tu aka ne ia a pelofeta mō tatou i Papelonia.’
16 “Me konei a pati a Ieova ne fai ki te tupu telā e sagasaga i te nofogaaliki o Tavita+ mo tino katoa kolā e ‵nofo i te fakai tenei, ko otou taina kolā ne seki olo mo koutou i te taimi ne ave fakapagota ei koutou, 17 ‘Konei a pati a Ieova o kautau ne fai mai: “Ko uga atu nei ne au te pelu ki a latou, te oge mo te famai,+ kae ka fai ne au latou ke pelā mo mati ‵pala kolā ko tō ma‵sei telā ko se mafai eiloa o kai.”’+
18 “‘Kae ka afuli ne au latou ki te pelu,+ te oge mo te famai, kae ka fai ne au latou e pelā me se mea fakamataku ki malo katoa o te lalolagi,+ se mala mo se mea fakaofoofogia, se mea fakatauemu,*+ kae fakamasiasi ki atufenua katoa kolā ne fakamavae‵vae ne au latou ki ei,+ 19 me ne seki faka‵logo latou ki aku pati ne avatu ne au ki a latou fakatasi mo aku tavini ko pelofeta,’ ko te folafolaga a Ieova, ‘ne avatu faeloa ne au ki a latou.’+
“‘Kae ko koutou ne seki faka‵logo,’+ ko te folafolaga a Ieova.
20 “Tela la, faka‵logo mai ki muna a Ieova, koutou katoa e tino ne ave fakapagota, kolā ne uga atu ne au kea‵tea mai i Ielusalema ki Papelonia. 21 Konei a pati a Ieova o kautau, te Atua o Isalaelu, ne fai mai e uiga ki a Aapo te tama tagata a Kolaia kae e uiga ki a Setekaia te tama tagata a Maseia, kolā e ‵valo atu a mea ‵loi ki a koutou i toku igoa,+ ‘Ko tuku atu nei ne au a lāua ki lima o te tupu o Papelonia ko Nepukanesa,* kae ka ‵ta ne ia lāua i mua o koutou. 22 Kae ko te mea e tupu ki a lāua ka fai pelā me ne pati fakamalaia kolā e taku atu ne tino Iuta katoa kolā ne ave fakapagota i Papelonia: “Ke fai eiloa koe ne Ieova e pelā mo Setekaia mo Aapo, kolā ne ‵sunu ne te tupu o Papelonia i te afi!” 23 me ne fai ne lāua se mea fakamasiasi i Isalaelu,+ ne mulilua lāua mo avaga a lā tuakoi kae fai‵pati ki mea ‵loi i toku igoa, ko pati kolā ne seki fakatonu atu ne au ki a lāua.+
“‘“Ko au te Atua telā e iloa ne ia, kae ko au se molimau,”+ ko te folafolaga a Ieova.’”
24 “Kae ka fai atu koe ki a Semaia+ mai i Nelama, 25 ‘Konei a pati a Ieova o kautau, te Atua o Isalaelu ne fai mai: “Ona ko te mea ne avatu ne koe a tusi i tou igoa ki tino katoa i Ielusalema, ki a Sefanaia+ te tama tagata a Maseia, te faitaulaga mo faitaulaga katoa, kae fai atu, 26 ‘Ko oti koe ne fai ne Ieova mo faitaulaga i lō Ieoiata te faitaulaga ke fai mo ovasia o te fale o Ieova, ke pule atu ki so se tagata fakavalevale telā e fai pelā me se pelofeta kae ke ‵loka atu a ia ki mea ‵loka vae;+ 27 kaia ne seki ‵liko ei ne koe a Ielemia mai Anatota,+ telā e fai pelā me se pelofeta mō koutou?+ 28 Me ne uga mai ne ia se fekau ki a matou i Papelonia, ana muna: “Ka leva ‵ki te taimi! Faite a fale kae ‵nofo i ei. ‵Toki a fatoaga kae ‵kai ki olotou fuagalakau,+—”’”’”
29 I te taimi ne faitau ei ne Sefanaia+ te faitaulaga te tusi tenei kae e fakalogologo atu a Ielemia te pelofeta ki ei, 30 ne oko mai te fekau a Ieova ki a Ielemia, ana muna: 31 “Avatu se fekau ki tino katoa kolā ne ave fakapagota, kae fai atu, ‘Konei a pati a Ieova ne fai mai e uiga ki a Semaia mai Nelama: “Ona ko Semaia ne ‵valo atu ki a koutou, faitalia me ne seki uga atu ne au a ia, kae ne taumafai a ia o fai ke tali‵tonu koutou ki mea ‵loi,+ 32 tela la, konei a pati a Ieova ne fai mai, ‘Ka saga atu nei au ki a Semaia mai Nelama mo tino ne ‵tupu mai i a ia. E seai se tagata mai i tena kāiga ka sao i tino konei, kae ka se lavea ne ia a mea ‵lei ka fai ne au ki oku tino,’ ko te folafolaga a Ieova, ‘me ne fakamalosi aka ne ia te ‵tekeatuga ki a Ieova.’”’”