Numela

14 Tenā ne ka‵laga atu ei te fakapotopotoga kātoa, kae ne ‵tagi mautuutu faeloa a tino i te po kātoa.+ 2 A tino Isalaelu katoa ne kamata o mui‵mui ki a Mose mo Alona,+ kae ne faipati ‵teke atu a te fakapotopotoga kātoa ki a lāua, olotou muna: “E ‵lei atu moi ne ‵mate tatou i Aikupito, io me i te koga lavaki tenei! 3 Kaia ne aumai ei ne Ieova tatou ki te fenua tenei ke ‵mate tatou i te pelu?+ A ‵tou avaga mo ‵tou tama‵liki ka puke ma latou.+ E a, e se ‵lei ke ‵foki atu tatou ki Aikupito?”+ 4 Ne fai atu a latou ki a latou eiloa: “Ke fili aka ne tatou se takitaki, kae ‵foki atu ki Aikupito!”+

5 Ona ko te mea tenei ne faka‵siga ifo ei a Mose mo Alona ki lalo i te laukele i mua o te fakapotopotoga o tino Isalaelu katoa. 6 A Iosua+ te tama tagata a Nuno mo Kalepo+ te tama tagata a Iefune, kolā ne aofia i tino kolā ne olo o iloilo te fenua, ne saesae ne lāua a lā gatu, 7 kae ne fai atu lāua ki te fakapotopotoga kātoa o tino Isalaelu: “A te fenua ne olo matou o iloilo aka se fenua ‵lei ‵ki.+ 8 Kafai e fiafia mai a Ieova ki a tatou, ka aumai eiloa ne ia tatou ki loto i te fenua tenei kae ka tuku mai foki ne ia ma tatou, se fenua telā e ‵tafe i ei a susu mo hani.+ 9 Kae e se ‵tau mo koutou o ‵teke ki a Ieova, kae e se ‵tau mo koutou o ma‵taku ki tino i te fenua tenā,+ me ka fakatakavale eiloa ne tatou a latou.* A te lotou puipuiga ko oti ne ave kea‵tea mai i a latou, kae ko Ieova e kau mai eiloa ki a tatou.+ Sa ma‵taku ki a latou.”

10 Kae ko te fakapotopotoga kātoa ne fai‵pati ke peipei lāua ki fatu.+ Kae ne fakasae mai a te ‵malu o Ieova i te faleie o maopoopoga ki tino Isalaelu katoa.+

11 Tenā ne fai atu ei a Ieova ki a Mose: “E pefea te leva ka se āva mai ei a tino konei ki a au,+ kae e pefea te leva ka se fakatuanaki mai ei latou ki a au faitalia a fakailoga katoa ne fai ne au i a latou?+ 12 Tuku mai ke ‵ta ne au latou ki famai kae fakaseai atu latou, kae ka fai ne au a koe e pelā me se fenua lasi kae e malosi atu foki i a latou.”+

13 Kae ne fai atu a Mose ki a Ieova: “Kae ko tino Aikupito, kolā ne aumai ne koe mai i ei a tino konei ki tou malosi, ka ‵logo i te tala tenei+ 14 kae ka fai‵pati latou e uiga ki te mea tenā ki tino o te fenua tenei. Ko oti foki ne ‵logo a tino konei me i a koe, e Ieova, e ‵kau fakatasi mo tino konei,+ kae ko oti ne fakasae atu koe ki a latou mata ki mata.+ A koe ko Ieova, kae ko tou kaumana e tu i luga i a latou, kae ko koe e fano i mua o latou i se pou kaumana i te ao kae i se pou afi i te po.+ 15 Kafai e tamate ne koe a tino konei i te taimi e tasi, kae ka fai mai a atufenua kolā ne ‵logo i tou takutakua: 16 ‘E se mafai ne Ieova o ave a tino konei ki loto i te fenua ne tauto a ia me ka tuku atu ki a latou, telā ko tamate ei ne ia latou i te koga lavaki.’+ 17 Fakamolemole, e Ieova, ke fakalasi atu ne koe tou ‵mana e pelā mo tau tautoga, i au pati konei: 18 ‘A Ieova e tuai o ita kae ‵fonu i te alofa fakamaoni,+ e fakamagalo ne ia a mea ‵se mo amioga solitulafono, kae e se mafai o se fakasala ne ia a tino solitulafono, kae e fakasala ne ia a tama‵liki tāgata ona ko mea ‵se a olotou tamana, ke oko atu ki te tolu o kautama mo te fa o kautama.’+ 19 Fakamolemole, fakamagalo aka a mea ‵se a tino konei e ‵tusa mo te lasi o tou alofa fakamaoni, e pelā mo te fakamagaloga ne koe a tino konei mai i Aikupito ke oko mai ki te taimi nei.”+

20 Tenā ne fai atu ei a Ieova: “Ko fakamagalo ne au latou e ‵tusa mo au pati konā.+ 21 Kae i te suā feitu, ka ‵fonu te lalolagi kātoa i te ‵malu o Ieova,+ e pelā eiloa mo au e ola faeloa. 22 Kae e seai eiloa se tagata i tāgata kolā ne lavea ne latou toku ‵malu mo aku fakailoga+ ne fai i Aikupito e pelā foki mo te koga lavaki kae ne tumau eiloa i te tofotofo+ ne latou au fakasefulu taimi, kae ne seki faka‵logo ki toku leo,+ 23 ka lavea ne latou a te fenua telā ne tauto au ke tuku atu ki olotou tupuga. Ikai, e seai eiloa se tino i latou konei e se āva mai ki a au ka lavea ne ia a te fenua.+ 24 Kae ona ko te mea ne ‵kese te agaga o taku tavini ko Kalepo+ kae ne tumau i te tautali mai i a au mo te loto kātoa, ka ave eiloa ne au a ia ki loto i te fenua telā ne fano a ia ki ei, kae ka fai a te fenua tenā mo fai te fenua o ana tama.+ 25 Ona ko tino Amaleka mo tino Kanana+ e ‵nofo i te vanu, e ‵tau o toe ‵foki koutou i te aso ma taeao o olo ki te koga lavaki i te auala i tafa o te Tai Kula.”+

26 Tenā ne fai atu ei a Ieova ki a Mose mo Alona: 27 “E pefea te leva ka tumau ei te fakapotopotoga o tino ma‵sei konei i te mui‵mui mai ki a au?+ Ko oti ne lagona ne au a pati mui‵mui a te kau Isalaelu ki a au.+ 28 Fai atu ki a latou, ‘“E pelā eiloa mo au e ola,” ko te folafolaga a Ieova, “ka fai eiloa ne au ki a koutou a mea kolā ne lagona ne au e fai‵pati koutou ki ei!+ 29 I te koga lavaki tenei ka tafola i ei otou foitino ‵mate,+ ao, ko te aofaki katoa o koutou mai te 20 tausaga te ma‵tua o fano ki luga kolā ne fakamau otou igoa, ko koutou katoa kolā ne mui‵mui mai ki a au.+ 30 E seai se tino i a koutou ka ulu ki loto i te fenua telā ne tauto au ke ‵nofo koutou i ei,+ kae na ko Kalepo fua te tama tagata a Iefune mo Iosua te tama tagata a Nuno.+

31 “‘“Kae ka aumai ne au ki loto i ei otou tama‵liki, kolā ne fai mai koutou me ka puke ma latou,+ kae ka iloa ne latou a te fenua telā ne seki talia ne koutou.+ 32 Kae ko otou foitino ‵mate ka tafola valevale i te koga lavaki tenei. 33 Kae nei la, a otou tama tāgata ka fai pelā me ne tausi mamoe i te koga lavaki i tausaga e 40,+ kae ka fakasala latou ona ko otou faifaiga sē fakamaoni,* ke oko ki te taimi e mate atu ei te ‵toe tino o koutou i te koga lavaki.+ 34 E ‵tusa mo te aofaki o aso kolā ne iloilo aka ei ne koutou te fenua, e 40 aso,+ e tasi te aso ki te tausaga e tasi, e tasi te aso ki te tausaga e tasi, ka fakasala eiloa koutou i tausaga e 40 ona ko otou mea ‵se,+ ko te mea ke iloa ne koutou a te uiga o te ‵teke mai ki a au.

35 “‘“Ko au ko Ieova ko oti ne faipati atu. Tenei te mea ka fai ne au ki te fakapotopotoga o tino ma‵sei konei, ko latou kolā ne maopoopo fakatasi o ‵teke mai ki a au: I te koga lavaki tenei ka palele atu ei latou, kae i te koga tenei ka ‵mate ei latou.+ 36 A tāgata kolā ne uga atu ne Mose ke olo o iloilo aka a te fenua kae fai ne latou ke mui‵mui a te fakapotopotoga kātoa ki a ia i te lotou ‵fokimaiga mo te lotou lipoti sē ‵lei e uiga ki te fenua,+ 37 ao, ko tāgata kolā ne aumai ne latou se lipoti sē ‵lei e uiga ki te fenua tenā ka ‵ta ke ‵mate latou i mua o Ieova.+ 38 Kae ko Iosua te tama tagata a Nuno mo Kalepo te tama tagata a Iefune, kolā ne aofia i a latou ne olo o iloilo aka te fenua, ka tumau eiloa i te ola.”’”+

39 I te taimi ne faipati atu ei ne Mose a pati konei ki tino Isalaelu, ne fanoa‵noa malosi latou. 40 E se gata i ei, ne alausu latou i te tafataeao ‵malu kae taumafai o olo aka ki luga i te taulu o te mauga, kae fai atu: “Konei matou ko toka o olo ki te koga ne faipati a Ieova e uiga ki ei, me ko oti ne agasala matou.”+ 41 Kae ne fai atu a Mose: “Kaia e se faka‵logo ei koutou ki te fakatonuga a Ieova? Ka se mafai o taunu a te mea tenei. 42 Sa olo ki luga, me i a Ieova e se fakatasi atu ki a koutou; a koutou ka taka‵vale eiloa i otou fili.+ 43 Me i tino Amaleka mo tino Kanana konā e ‵nofo i konā o taua mai ki a koutou,+ kae ka ‵mate koutou i te pelu. Ona ko koutou ne fulitua ki a Ieova, ka se fakatasi atu eiloa a Ieova ki a koutou.”+

44 Kae ne olo atu eiloa latou mo te fakamata‵mata ki te taulu o te mauga,+ kae ko te pusa o te feagaiga a Ieova e pelā foki mo Mose ne seki ga‵sue eiloa kea‵tea mai te fakai.+ 45 Kae ko tino Amaleka mo tino Kanana kolā ne ‵nofo i luga i te mauga tenā ne olo ifo o ‵ta latou, kae fakasalalau atu latou ke oko eiloa ki Holema.+