Numela

6 Ne toe faipati atu a Ieova ki a Mose, ana muna: 2 “Faipati ki tino Isalaelu kae fai atu ki a latou, ‘Kafai e fai ne se tagata io me se fafine se tautoga fakapito ke ola a ia e pelā me se Naseli*+ ki a Ieova, 3 e ‵tau o faka‵mao a ia kea‵tea mai te uaina mo nisi meainu ma‵losi. E se ‵tau o inu a ia ki te vinika o te uaina io me ko te vinika o so se meainu malosi.+ E se ‵tau o inu a ia ki so se meainu mai te sua o te vine, io me kai ki fuagavine, faitalia me se fuagavine fou io me malō. 4 I aso katoa e fai ei a ia e pelā me se Naseli e se ‵tau o kai a ia ki so se mea e faite mai i fuagavine, mai fuagavine ‵moto ke oko eiloa ki olotou pa‵kili.

5 “‘I aso katoa o tena tautoga ke fai pelā me se Naseli e se ‵tau eiloa o ‵vele tena ulu.+ E ‵tau o tumau a ia i te tulaga tapu mai te faka‵loaga o ana laulu i tena ulu ke oko ki te taimi e palele atu ei a aso e ‵vae kea‵tea ei a ia mō Ieova. 6 E se ‵tau o fakapilipili atu a ia ki se tino mate i aso katoa e ‵vae kea‵tea ei a ia mō Ieova. 7 Kafai e mate tena tamana, tena mātua, tena taina, io me ko tena tuagane, e se ‵tau o fakalailai+ ne ia a ia eiloa, me i te fakailoga o tena tulaga e pelā me se Naseli ki tena Atua koi nofo i luga i tena ulu.

8 “‘E ‵tau eiloa o fakatapu a ia ki a Ieova i aso katoa e fai ei a ia e pelā me se Naseli. 9 Kae kafai e mate fakapoi se tino i ana tafa,+ kae fakalailai ne ia a laulu kolā e fakamailoga ei tena ‵vae kea‵tea mō te Atua, e ‵tau o ‵vele ne ia ana laulu+ i te aso e fai ei tena faka‵māga. E ‵tau o ‵vele ne ia i te fitu o aso. 10 Kae i te valu o aso e ‵tau o avatu ne ia a lupe e lua io me ne punua lupe e lua ki te faitaulaga i te mataloa o te faleie o maopoopoga. 11 Ka fakatoka ne te faitaulaga te manu e tasi mo fai te taulaga mō agasala kae ko te suā manu mo fai te taulaga ‵sunu kae fai se faka‵māga mō ia mo tena agasala+ ne fai e uiga ki te tino mate. Tenā ko fakatapu ei ne ia tena ulu i te aso eiloa tenā. 12 Kae e ‵tau o ‵vae kea‵tea ne ia a ia eiloa mō Ieova i aso e fai ei a ia e pelā me se Naseli, kae ka aumai ne ia se tamā mamoe telā ko tasi te tausaga mo fai te taulaga mō mea ‵se. Kae ko ana aso mua ka se lau me i a ia ne lailai i tena tulaga e pelā me se Naseli.

13 “‘Tenei te tulafono e uiga ki te Naseli: Kafai ko oti a aso e fai ei a ia e pelā me se Naseli,+ ka aumai a ia ki te mataloa o te faleie o maopoopoga. 14 E ‵tau o ofo atu ne ia i konā a tena taulaga ki a Ieova: e tasi te tamā mamoe tagata ‵lei telā ko tasi te tausaga mo fai te taulaga ‵sunu,+ e tasi te mamoe fafine ‵lei telā ko tasi te tausaga mo fai te taulaga mō agasala,+ e tasi te mamoe tagata ‵lei mo fai te taulaga ‵kai fakatasi,+ 15 se kete o falaoa puku‵puku sē faka‵fete kolā ne palu ki falaoa ‵mata kae ‵lei mo sinu, falaoa manifinifi sē faka‵fete kolā ne nani ki sinu, mo olotou taulaga meakai+ mo olotou taulaga meainu.+ 16 Ka ofo atu ne te faitaulaga a mea konā i mua o Ieova kae ofo atu tena taulaga mō agasala mo tena taulaga ‵sunu. 17 Ka ofo atu ne ia te mamoe tagata mo fai te taulaga ‵kai fakatasi ki a Ieova fakatasi mo te kete o falaoa sē faka‵fete, ko ofo atu ei ne te faitaulaga a tena taulaga meakai+ mo tena taulaga meainu.

18 “‘E ‵tau o ‵vele ne te Naseli a laulu i tena ulu*+ i te mataloa o te faleie o maopoopoga, kae puke ne ia a laulu kolā ne faka‵loa i te taimi ne fai ei a ia pelā me se Naseli kae ‵sunu atu ki te afi mai lalo o te taulaga ‵kai fakatasi. 19 E ‵tau o puke ne te faitaulaga se tuauma o se mamoe telā ne saka,+ e tasi te falaoa pukupuku sē faka‵fete mai te kete, kae tasi te falaoa manifinifi sē faka‵fete kae tuku atu ki alofilima o te Naseli māfai ko oti ne ‵vele kea‵tea a te fakailoga o tena tulaga e pelā me se Naseli. 20 E ‵tau mo te faitaulaga o fakagasuesue a mea konā ki mua mo tua e pelā me se taulaga fakagasuesue i mua o Ieova.+ A te mea tenā se mea tapu mō te faitaulaga, fakatasi mo te fatafata o te taulaga fakagasuesue mo te vae telā e tuku atu mo fai se meaalofa.+ Ka oti ko mafai ei o inu a te Naseli ki uaina.

21 “‘Tenei te tulafono e uiga ki te Naseli+ telā e fai tena tautoga: Kafai e tauto a ia kae e mafai o ofo atu tena taulaga ki a Ieova e silia atu i lō te mea telā e manakogina mō tena tulaga e pelā me se Naseli, e ‵tau eiloa o tausi a ia ki tena tautoga, e ‵tusa mo te tulafono o te Naseli.’”

22 Tenā ne fai atu ei a Ieova ki a Mose: 23 “Fai atu ki a Alona mo ana tama tāgata, ‘Tenei te auala e ‵tau ei o fakamanuia+ ne koe a tino Isalaelu. Fai atu ki a latou:

24 “Ke fakamanuia atu a Ieova ki a koe+ kae puipui ne ia koe.

25 Ke maina atu te mainaga o mata o Ieova ki luga i a koe,+ kae ke talia ne ia koe.

26 Ke i luga i a koe a mata o Ieova, kae tuku atu te filemu ki a koe.”’+

27 Kae e ‵tau o taku atu ne latou toku igoa ki tino Isalaelu,+ ko te mea ke fakamanuia ne au a latou.”+