Te Muamua Samuelu
16 Fakamuli ifo, ne fai atu a Ieova ki a Samuelu: “E pefea te leva ka fanoanoa ei koe ona ko Saulo+ me ko oti ne ‵teke ne au a ia mai te fai pelā me se tupu o Isalaelu?+ Utu te sau o te mamoe ki sinu,+ ko fano ei koe. Ka uga ne au koe ki a Iese+ te tagata Peteleema me ko oti ne filifili aka ne au se tamaliki tagata mai i ana tama tāgata ke fai mo tupu.”+ 2 Muna a Samuelu: “E mafai pefea o fano au? Kafai e logo a Saulo i te mea tenei, ka tamate ne ia au.”+ Ne tali atu a Ieova: “Puke se tamā pulumakau o fano mo koe kae fai atu, ‘Au ne vau o ofo se taulaga ki a Ieova.’ 3 ‵Kami mai a Iese ki te faiga o te taulaga; kae ka fakailoa atu ne au ki a koe a te mea e ‵tau o fai. E ‵tau mo koe o fakaeke a te tino telā e fakasino atu ne au ki a koe.”+
4 Ne fai ne Samuelu a mea kolā ne fai atu ne Ieova. I tena okoatuga ki Peteleema+ a toeaina o te fakai ne pole‵pole i te ma‵taku i te fetauiga mo ia, kae ne fai atu latou: “E mata, a koe ne vau mo te filemu?” 5 Ana muna: “Au ne vau mo te filemu. Au ne vau o ofo atu te taulaga ki a Ieova. E ‵tau o faka‵ma koutou kae o‵mai ke olo tatou ki te faiga o te taulaga.” Tenā ne fakatoka ei ne ia a Iese mo ana tama tāgata ke ‵ma, oti aka fai atu ei a ia ke olo atu ki te faiga o te taulaga. 6 I te lotou uluatuga ki loto kae lavea ne ia a Eliapo,+ ana muna: “E mautinoa eiloa me tenei te tino fakaekegina a Ieova ko tu i ana mua.” 7 Kae ne fai atu a Ieova ki a Samuelu: “Sa saga ki ana foliga mo tena loa,+ me ko oti ne ‵teke ne au a ia. Me i te auala e kilo ki ei te tagata e se ko te auala e kilo ki ei te Atua, me i te tagata e kilo fua ki mea e lavea ki mata, kae ko Ieova e kilo ki te loto.”+ 8 Tenā ne kalaga atu ei a Iese ki a Apinatapu+ kae fai atu ki ei ke sasale i mua o Samuelu, kae ne fai atu a ia: “E se tenei foki te tino ne filifili ne Ieova.” 9 Oti aka, tuku atu ei ne Iese a Sama+ ke sasale i mua, kae ne fai atu a ia: “E se tenei foki te tino ne filifili ne Ieova.” 10 Ne fai ne Iese ana tama tāgata e tokofitu ke sa‵sale i mua o Samuelu, kae ne fai atu a Samuelu ki a Iese: “E seai se tino i a latou konei ne filifili ne Ieova.”
11 Fakamuli loa ne fai atu a Samuelu ki a Iese: “Konei katoa au tama tāgata?” Kae ne tali atu a ia: “A te toekimuli+ tenā ne tiakina; a ia e tausi a mamoe.”+ Tenā ne fai atu ei a Samuelu ki a Iese: “Uga se fekau ki ei ke vau ki a au, me i a tatou ka se saga‵saga eiloa ki lalo o ‵kai seiloga ke oko mai a ia.” 12 Tenā ne uga ei tena fekau ki a ia ke vau, kae ne vau ei a ia. A te tamataene tenā e matagali kae taulekaleka.+ Kae ne fai atu a Ieova: “Tu ki luga, fakaeke a ia tenā, me tenei eiloa te tino!”+ 13 Ne puke ne Samuelu a te sinu+ telā ne utu ki te sau o te mamoe kae fakaeke a tou tagata i mua o ana taina. Kae ne kamata o galue a te agaga o Ieova i a Tavita mai te aso tenā o fano ki mua.+ Ne tu fakamuli aka a Samuelu kae fano i tena auala ki Lama.+
14 Ne fano kea‵tea te agaga o Ieova mai i a Saulo,+ kae ne mataku a ia ona ko te agaga masei mai i a Ieova.+ 15 Ne fai atu a tavini a Saulo ki a ia: “E lavea ne koe me ko mataku koe ona ko te agaga masei mai i te Atua. 16 Tou ‵malu, fakamolemole, fakatonu au tavini i ou mua ke ‵sala aka se tagata poto i te tātā kitala.+ I so se taimi e oko mai ei te agaga masei mai te Atua ki a koe, kae ka tātā tena kitala, ko ‵lei ei koe.” 17 Ne fai atu a Saulo ki ana tavini: “Fakamolemole, ‵sala mai aka ki a au se tagata poto i te tātā, kae aumai a ia ki a au.”
18 Ne fai aka se tavini e tokotasi: “Kiloke! Ko oti ne lavea ne au te apo o te tama tagata a Iese te tagata Peteleema i te tātā, kae ko ia foki se tagata loto toa kae malosi.+ E poto a ia i te faipati, kae tinogali,+ kae ko Ieova e fakatasi atu ki a ia.”+ 19 Tenā ne avatu ei te fekau a Saulo ki a Iese, ana muna: “Uga mai ki a au tau tama tagata ko Tavita, telā e tausi ne ia te lafu mamoe.”+ 20 Ne tuku atu ne Iese ki luga i se asini a falaoa, se fagu uaina ne faite ki pa‵kili o manu, se tamā kouti kae uga atu ki a Saulo fakatasi mo tena tama tagata ko Tavita. 21 Tenā ne fanatu ei a Tavita ki a Saulo kae kamata o tavini atu ki a ia.+ Ne fiafia malosi a Saulo ki tou tagata, kae ne fai a ia mo fai tena tino ave meatau. 22 Ne avatu ne Saulo se fekau ki a Iese: “Fakamolemole tuku mai aka a Tavita ke galue i a au, me ko oko loa toku fiafia ki a ia.” 23 I so se taimi e oko atu ei ki a Saulo te agaga masei mai i te Atua, ne puke ne Tavita te kitala kae tātā ne ia, kae ne maua ne Saulo se feoloolo kae fano o ‵lei, kae ne fano kea‵tea te agaga masei mai i a ia.+