Esoto

17 Ne tiakina ne te fakapotopotoga kātoa o tino Isalaelu a te koga lavaki o Sini,+ kae olo atu latou mai te suā koga ki te suā koga e ‵tusa mo te fakatonuga a Ieova,+ kae ne ‵nofo latou i Lefiti.+ Kae e seai ne vai i ei mo inu a tino.

2 Ne kamata o kinau atu a tino ki a Mose+ kae fai atu: “Tuku mai ne vai mo omotou inu.” Kae ne fai atu a Mose ki a latou: “Kaia e kinau mai ei koutou ki a au? Kaia e tofotofo faeloa ne koutou a Ieova?”+ 3 Kae ko tino ne fiainu malosi ki vai i konā, kae ne mui‵mui faeloa latou ki a Mose+ kae fai atu: “Kaia ne aumai ei ne koe matou kea‵tea mai Aikupito ko te mea ke ‵mate matou i te fiainu fakatasi mo omotou tama‵liki mo omotou lafu manu?” 4 Fakamuli loa, ne kalaga atu a Mose ki a Ieova kae fai atu: “Ne a aku mea ka fai ki tino konei? E se leva nei kae ka peipei ne latou au ki fatu!”

5 Tenā ne fai atu ei a Ieova ki a Mose: “Fano i mua o tino, kae puke ne koe ne toeaina o Isalaelu mo tou tokotoko telā ne ‵kini ne koe ki ei a te Vaitafe ko te Naila.+ Puke ne koe i tou lima ko sasale atu ei koe. 6 Kiloke! Au ka tu atu i ou mua i te kaupapa o Holepa. E ‵tau o ‵kini ne koe a te kaupapa, kae ka ‵sali mai i ei a vai, ko inu ei a tino.”+ Ne fai eiloa ne Mose a te mea tenā i mua o toeaina o Isalaelu. 7 Ne fakaigoa ne ia te koga tenā ki a Masa*+ mo Melipa*+ ona ko te kinauga ne fai ne tino Isalaelu, kae ona foki ko te tofotofoga ne latou a Ieova+ i olotou pati kolā ne fai atu: “E mata, e ‵nofo fakatasi tatou mo Ieova io me ikai?”

8 Tenā ne o‵mai ei a tino Amaleka+ o taua atu ki tino Isalaelu i Lefiti.+ 9 Ona ko te mea tenei ne fai atu ei a Mose ki a Iosua:+ “Fili aka ne tāgata kae olo o taua atu ki tino Amaleka. I te aso taeao ka tu atu au i luga i te taulu o te mauga, mo te tokotoko a te Atua tonu i toku lima.” 10 Tenā ne fai ei ne Iosua a mea katoa kolā ne fakatonu atu ne Mose,+ kae ne taua atu a ia ki tino Amaleka. Kae ko Mose, Alona mo Hulo+ ne olo aka ki te taulu o te mauga.

11 Kafai e sisi faeloa a lima o Mose i luga, ne manumalo a tino Isalaelu, kae i te taimi eiloa e tuku ifo ei ana lima kae ne manumalo a tino Amaleka. 12 I te taimi ne ‵vale ei a lima o Mose, ne aumai ne lāua se fatu ke sagasaga a ia i ei. Oti aka, ne ‵tu atu a Alona mo Hulo i ana feitu o taofi ana lima ko te mea ke tumau eiloa penā ke oko ki te taimi e tō ei te mata o te la. 13 Tenā ne fakatakavale ei ne Iosua a Amaleka mo ana tino ki te pelu.+

14 Ne fai atu a Ieova ki a Mose: “Tusi a pati konei ki te tusi e pelā me se fakamasauaga kae toe fakamatala atu ki a Iosua, ‘Ka ‵ta fakapalele ne au a tino Amaleka i luga i te lalolagi, kae ka seai se tino e toe masaua ne ia latou.’”+ 15 Tenā ne faite ei ne Mose se fatafaitaulaga kae fakaigoa ne ia ki a Ieova-nese,* 16 ana muna: “Ona ko tena taua atu o ‵teke ki te nofogaaliki o Ioa,+ ka taua atu faeloa a Ieova ki tino Amaleka i kautama takitasi.”+