Esoto

18 Ne logo a Ietelo te faitaulaga o Mitiana, te tamana o te avaga a Mose,+ i mea katoa kolā ne fai ne te Atua ki a Mose mo ana tino Isalaelu, i te aumaiga ne Ieova a tino Isalaelu ki tua mo Aikupito.+ 2 A Ietelo, te tamana o te avaga a Mose, ne puke ne ia a Sepola te avaga a Mose i te taimi ne fakafoki atu ei ki a ia, 3 fakatasi mo ana tama tāgata e tokolua.+ A tena tama e tokotasi ne fakaigoa ki a Kelesoma,*+ me ne fai atu a Mose, “Au ne nofo e pelā me se tino fakaa‵tea i se fenua fakaa‵tea,” 4 kae ko te suā tamaliki ne fakaigoa ki a Eliesa,* me ne fai mai a ia, “A te Atua o toku tamana ko toku fesoasoani, telā ne fakasao ne ia au mai te pelu a te Falao.”+

5 Ne olo atu a Ietelo, te tamana o te avaga a Mose, fakatasi mo tama tāgata a Mose mo tena avaga ki a Mose i te koga lavaki telā ne nofo a ia i ei i te mauga o te Atua tonu.+ 6 Tenā ne uga atu ei tena fekau ki a Mose: “Au, Ietelo,+ te tamana o tau avaga ko fanatu ki a koe fakatasi mo tau avaga mo ana tama tāgata e tokolua.” 7 I konā eiloa ne fanatu a Mose o fakafetaui ki te tamana o tena avaga, kae ifo kae sogi atu ki a ia. Ne fesili atu te suā tino ki te suā tino me e a mai a ia, olo ei lāua ki loto i te faleie.

8 Ne fakamatala atu ne Mose ki te tamana o tena avaga a mea katoa kolā ne fai ne Ieova mō tino Isalaelu+ ki te Falao mo te fenua o Aikupito, mea faiga‵ta katoa kolā ne fe‵paki mo latou i te lotou malaga+ mo te auala ne faka‵sao ei latou ne Ieova. 9 Ne fiafia malosi a Ietelo ona ko mea ‵lei katoa ne fai ne Ieova mō tino Isalaelu mai te faka‵saoga o latou mai Aikupito.* 10 Tenā ne fai atu ei a Ietelo: “Ke vikia a Ieova, telā ne faka‵sao ne ia koutou mai Aikupito mo te Falao, kae faka‵sao foki ne ia a tino mai lalo i te pulega a Aikupito. 11 Ko iloa nei ne au me e sili atu a Ieova i nisi atua katoa,+ ona ko mea ne fai ne ia ki tino kolā ne ‵teke atu mo te fakamata‵mata ki ana tino.” 12 Tenā ne aumai ei ne Ietelo, te tamana o te avaga a Mose, se taulaga ‵sunu mo nisi taulaga ke ofo atu ki te Atua, kae ko Alona mo toeaina katoa o Isalaelu ne o‵mai o ‵kai fakatasi mo te tamana o te avaga a Mose i mua o te Atua tonu.

13 I te suā aso, ne sagasaga ifo a Mose e pelā mo te masani o tavini e pelā me se famasino ki tino, kae ko tino ne ‵tu atu faeloa i mua o Mose mai te tafataeao ke oko atu eiloa ki te afiafi. 14 I te laveaga ne te tamana o te avaga a Mose a mea katoa kolā e fai ne Mose mō tino, ne fai atu a ia: “Se a te galuega tenei e fai ne koe mō tino? Kaia e sagasaga tokotasi ei koe i konei kae ko tino katoa e ‵tu i ou mua mai te tafataeao ke oko atu eiloa ki te afiafi?” 15 Muna a Mose ki te tamana o tena avaga: “Ona ko tino e o‵mai faeloa ki a au ke maua ne fakamatalaga mai te Atua e uiga ki a latou. 16 Kafai e isi se tagi e sae aka, e avaka te mea tenā ki a au ko fakamasino ei ne au a tino e tokolua konā, kae fakailoa atu ne au a fakaikuga a te Atua tonu mo ana tulafono.”+

17 Ne fai atu te tamana o te avaga a Mose ki a ia: “A te mea tenā e fai ne koe e se ‵lei. 18 E fakafi‵ta fua ne koe a koe eiloa mo tino konā e ‵nofo mo koe, me i te galuega tenei se galuega ‵mafa ‵ki mō koe kae e se mafai o amo tokotasi ne koe. 19 Nei la, fakalogo mai ki a au. Ka tuku atu ne au ne pati fakatonutonu kae ka fakatasi atu a te Atua ki a koe.+ E sui ne koe a tino konei i mua o te Atua tonu,+ kae e ‵tau o avaka ne koe a tagi a tino ki te Atua tonu.+ 20 E ‵tau o fakailoa atu ne koe ki a latou a fakatonuga mo tulafono+ kae ke iloa ne latou te auala e ‵tau o sa‵sale latou i ei mo te galuega e ‵tau o fai ne latou. 21 Kae ke fili aka ne koe mai tino konā a tāgata fakatuagagina+ kae e ma‵taku ki te Atua, ne tāgata kolā e fakatalitonugina kae takalia‵lia ki faifaiga sē fakamaoni,+ kae faka‵sopo a latou konei mo fai ne takitaki o taki tokoafe, takitaki o taki tokoselau, takitaki o taki tokolimasefulu mo takitaki o taki tokosefulu.+ 22 E ‵tau o fakamasino ne latou a tino māfai e isi ne tagi e ‵sae aka,* kae ka avaka ne latou ki a koe a tagi faiga‵ta katoa,+ kae e fai ne latou a fakaikuga ki tagi faigo‵fie katoa. Ko fakafaigofie ei ne koe a te mea tenā ki a koe eiloa mai te amo fakatasi ne koutou te amoga tenā.+ 23 Kafai e fai ne koe a te mea tenei, kae fetaui mo te fakatonuga a te Atua, ka māmā tau amoga kae ko tino katoa ka ‵foki atu mo te lotoma‵lie ki olotou fale.”

24 I konā eiloa, ne fakalogo a Mose ki te tamana o tena avaga kae fai ne ia a mea katoa kolā ne fai atu ne ia ki a ia. 25 Ne fili ne Mose a tāgata fakatuagagina mai Isalaelu kātoa kae faka‵sopo latou ke fai mo takitaki o tino, ko takitaki o taki tokoafe, takitaki o taki tokoselau, takitaki o taki tokolimasefulu mo takitaki o taki tokosefulu. 26 Ne fakamasino ne latou a tino māfai e isi ne tagi e ‵sae aka. Kafai e isi se tagi faigata, e avaka ne latou ki a Mose,+ kae e fai ne latou a fakamasinoga ki tagi faigo‵fie katoa. 27 Mai tua ifo i konā, ne fakamāvae atu a Mose ki te tamana o tena avaga,+ foki ei a ia ki tena fenua.